Beyesa, un palabra cu hopi hende ta defini y asocia na un cara perfecto of un curpa flaco. Pero pa Ivana J. Werleman (37), ex-Miss Aruba International, mama di un yiu homber y Front Desk Manager, e ta nifica un storia cu definicionnan cu a bay ta cambia den su bida. Tras di su sonrisa di semper, e tin su trayecto como un ex-reina tin un lucha di peso, autoestima, y presion pa cumpli c’un standard cu nunca tabata realmente su mes. Awe, despues di a pasa den un ciclo di dieet, Ozempic y CrossFit, Ivana ta papia abiertamente di e forsa real: e tipo cu ta nace ora bo kibra, cay lanta bek, siña y renace. Su meta cu su entrevista ta pa inspira otro di e nificacion real di e palabra beyesa.

“Mi a cuminsa den mundo di certamen cu 17 aña, ora mi a participa na Miss Teen Aruba 2005. For di e momento ey semper varios persona nan den e ramo tabata bisami: ‘Bo tin cu baha un tiki mas peso’. Mi a entrena hopi duro, duna tur loke mi por, y mi a logra cay den e top 5.” Cuater aña despues, el a keda yama pa participa na Miss Universo Aruba. “E ora ey mi tabata mas diki, y semper mi tabata purba di baha mas. Mi a logra gana Miss Aruba International 2009/2010 y a sali den e top 3 di finalista. Pero hopi hende tabata semper cordami riba mi peso. Nan tabata bisa: ‘La gorda quedó’. Tin momento cu hende ta bisa: ‘Hopi bon Ivana, bo a keda mantene bo curpa, pero ainda bo falta hopi mas pa baha,’ y esey tabata dal duro.”

Durante e tempo ey, Ivana a train c’un personal trainer, a sigui un plan di come saludabel, y a purba keda den balans. Pero e parti mas duro no tabata fisico, sino e parti mental. “Mi tabata bringa cu mi self esteem; mi no tabata stima loke mi ta mira den spiel. Den mi mente, mi semper lo keda ‘gordo’.”

Ivana no ta lubida e peso emocional cu e palabra “peso” mes por tin. “Mi peso semper a afecta mi salud mental,” e ta bisa sin rodeo. “Mi a realisa cu mi mester siña stima mi mes manera cu mi ta, y believe it or not, esey ta un les cu mi ta siña cada dia.” Un dia, ora e tabata na su punto mas halto di peso, 96 kilo, un persona a bras’e y bisa, “Holo, cada biaha cu mi brasabo, mi brasa ta bira mas hancho.” “E comentario ey a kibra mi completamente,” e ta confesa, “pasobra e no tabata un joke…e tabata un recordatorio di con mi mes no tabata felis cu mi mes.”

“E mundo di beauty pageants di 2009 no ta mesun cu awor. E tempo ey bo tabata mester ta basicamente un skinny model. Mi tabata mira mi mes den spiel y pensa: waw, mi no ta skinny.”

Si e por cambia e mundo di beyesa? “Mi lo pone mas enfoke riba originalidad, autoestima y diversidad real. Mi ta desea pa muher nan por stima nan mes manera nan ta, sin e presion pa cumpli cu un ‘standard’. Beyesa mester ta inspira pa lidera, no pa midi.” Ainda despues di e certamen, e presion pa “keda bunita” no a para. “E ta un lucha constante. Pero cu tempo mi a siña cu e no ta pa agrada otro hende, e ta pa mi mes. E meta awor ta sinti mi mes felis, sigur y autentico.”

Na november 2020, ora e balansa a mustra 96kg, Ivana a tuma un desicion. “Mi autoestima tabata abou. Mi miho amiga, Jeanelly (Bebecita), a sigui pushami. Un dia, ningun di nos tabatin gana di train, y el a bisa: ‘Bebecita, ban purba CrossFit noh?’” Ivana a asumi e reto, aunke cu duda. “Mi a bisa: ok, pero e mester suave, pasobra mi nunca tabata kier. Mi tabata pensa cu CrossFit ta pa hende fuerte, no p’ami.” Pero e dia ey, el a conoce un cambio den su bida. “Desde e momento ey… mi no a stop.”

“E ta pa tur hende, sin importa peso of edad. Mi a descubri cu mi por hopi mas di loke mi a kere. Ta e mente cu ta kibra prome, no e curpa.” Awe, despues di bolbe bek na Februari 2025, e ta sinti un cambio real. “Mi no ta ainda unda mi kier ta, pero mi ta determina. Mi autoestima a subi. Mi ta sinti mi mes mas sigur, no djis pa mi figura, sino pa e forsa cu mi a desaroya.”

“E mente ta esun cu ta limita bo. Ora bo kibra e barera mental, e fisico ta sigui.” Pa Ivana, CrossFit ta mas cu un deporte, e ta un confrontacion cu bo mes. “E ta abo contra bo mes. Tin dia cu e workout ta matabo, pero ora bo caba, bo ta mira: mi por. Esaki ta e sentimento mas dushi: cansa, pero satisfecho.”

“Si, mi a uza Ozempic. El a yudami na principio pa controla mi apetit y haya e motivacion pa sigui. Pero Ozempic no ta un milagro. E no ta pa keda riba dje. Bo mester cambia bo estilo di bida tambe. P’ami, e tabata un jump start. Un push cu mi a uza pa mi por bolbe kere den mi mes. Pero e resto ta disciplina, alimentacion y movimento.” Na esnan cu ta critica Ozempic, e ta bisa: “E no ta un shortcut si bo ta traha riba bo mes. E ta un hermit, no un escape.”

“Duna bo mes permiso pa ta humano. E proceso pa sinti bo mihor fisicamente y emocionalmente no ta un linea. Tin dianan facil, tin dianan dificil, tur paso pa con chikito, ta conta. Trata bo curpa cu respet. No laga opinion di hende defini bo balor. Rondona bo mes di hende cu ta stimula bo crecemento. Pasenshi y disciplina ta e secreto. Un bida saludabel no ta un castigo, ta un regalo pa bo mes.”