Skirbi: Jacqueline
Como un ex-tennista Arubiano, Ibian Hodgson (29) ta personifica e curason y perseverancia cu a yud'e logra exito den tennis, e deporte cu e ta stima asina tanto. Desde su humilde cuminsamento, e compromiso firme di Ibian a yud'e representa Aruba den e Junior Davis Cup di Tennis, creando su caminda conmovedor y di inspiracion.
Ibian mas chikito hunto cu su ruman Gian, Tanisha y coach Sanchez.
Ibian mas chikito hunto cu su ruman Gian, Tanisha y coach Sanchez.
Ibian a cuminsa hunga tennis cu 5 aña, inspira pa su famia cu ta stima tennis. “Mi ta bin for di un famia di tennis, mi welonan, tata, ruman muher y ruman homber a hunga tennis. Na un edad masha chikito, mi tabata mira mi ruman homber y ruman muher practica na Essoville cu mi tata y mi a gusta. Mi rumannan tabata hopi mas grandi cu mi y nan tabata practica un tiki mas den serio. Ami a sigui nan despues.
"Mi ta corda ora mi tabata tin 10-11 aña, mi tabata perde hopi, y mi no tabata por soporta esey. Pues, hunto cu mi tata y ruman muher, mi a cuminsa practica mas - 5’or di mainta prome cu scol, practica mas regular cu mi coach despues di scol, y practica extra cu mi tata . Mi no tabatin talento, asina ta cu mi unico caminda pa mehora y gana tabata pa traha mas duro cu cualkier otro hende. Esaki a duna su resultado, pasobra mi contrincantenan tabata practica solamente e minimo di un ora pa dia."
Apesar di tabata keda derota prome pa e otro hungadornan, cada derota tabata motiva Ibian pa traha mas duro ainda. El a persisti te ora finalmente, el a logra derota nan tur.
For di chikito, Ibian a siña cu nada por interveni den su caminda pa logra un bon prestashon den tennis, ningun fiesta di cumpleaño of actividad social. Cu 15 aña caba, el a laga Aruba pa bay practica na Buenos Aires, Argentina, caminda el a cuminsa scol online. Apesar di no sa Spaño bon y ta den un pais straño, e meta di Ibian a sigui ta e forsa tras di su accionnan.
C’un estilo di hunga caracterisa pa un enfoke agresivo y explosivo, e fortalesanan principal di Ibian riba cancha tabata su forehand y su serve. Semper e tabata usa e dos abilidadnan aki pa marca puntonan, tratando di controla su wega y tene control den tur momento
Marike, Stephanie Marchena, Thesally, Sarah Yeguez, Ibian, Franz, Alex lovera y coach Humphrey
Marike, Stephanie Marchena, Thesally, Sarah Yeguez, Ibian, Franz, Alex lovera y coach Humphrey
Ibian hunto cu Joshua y Lionel.
Ibian hunto cu Joshua y Lionel.
Su prome aña den WJTC tabata tambe e prome biaha cu Aruba a participa. E team a enfrenta un grupo duro cu encuentronan desafiante, y aunke nan no a yega na e prome lugar, nan a gana experiencianan valioso. Durante e torneonan aki, e tata di Ibian tabata e coach, haciendo esaki, ainda mas special. E momento favorito di Ibian a bin durante su ultimo aña den e categoria di 16 aña, ora e team a yega na e di tres lugar pa promer biaha.
Ibian ta enfatisa e importancia di tin un meta, kere cu bo por logra esaki y ta dispuesto pa paga e prijs pa logra esaki.
“Bo mester por perde 'matches', lanta y traha mas duro, perde atrobe y traha ainda mas duro atrobe. Bo mester ripiti esaki cu e mesun intensidad y finalmente, lo bo cuminsa gana. Bo pasion ta bira bo bida; mi no ta kere den balans."
Su dedicacion y compromiso na e deporte a duna su resultado, ganando un beka di tennis cu e tabata desea y e oportunidad pa representa Aruba den e Junior Davis Cup. Ibian ta atribui e experiencianan aki na e persona cu e ta awendia.
Ibian ta enfatisa e importancia di tin un meta, kere cu bo por logra esaki y ta dispuesto pa paga e prijs pa logra esaki.
Ibian Hodgson
Ibian Hodgson
TENNIS ARUBA: E FUTURO
Motiva pa su amor pa e deporte y e deseo di duna bek, Ibian a bolbe Aruba pa contribui na e desaroyo di tennis. Como miembro di e comunidad di Aruba Tennis Bond, e tin un vision positivo pa e futuro di tenistanan Arubano.
Ibian ta kere cu pa realisa nan potencial maximo, nos tenistanan aspirante mester ta dispuesto pa haci sacrificio nan y pusha nan mes te na nan limite. E ta planea pa sostene y desaroya e abilidadnan di hungadonan hoben dor di organisa mas torneo, mehora e forma di coach y ta ehempel pa nan.
Ibian ta mira un futuro briyante pa tennis na Aruba. Dor di su pasion y dedicacion, e ta compromete pa yuda forma e siguiente generashon di hungadonan di tennis talentoso na Aruba.
E ta spera di mira mas hungadonan Arubano logra exito riba e ramo internacional. Pa logra esaki, Ibian ta enfatisa e importancia di mantene un enfoke disciplina, consistente y ta resiliente den entrenamento y competencia.
"E ehempelnan di exito di tenistanan grandi, manera Rafael Nadal y Serena Williams, ta mustra cu ta posibel pa logra cosnan grandi si bo pone bo mente y alma den esaki."
Ibian Hodgson
Ibian su mensahe pa e futuro tenistanan Arubano ta cla: "e no ta suficiente pa simplemente tin talento, bo mester tin e pasion, dedicacion y hinca e trabou duro pa persigui meta- y soñonan cu bo tin den e deporte."
Built with Shorthand