Glenn Marugg - E rol di ForenSys

Señor Glenn Marugg a join un compania, incorpora na Aruba desde 2015, chikito al principio, pero di sumamente importancia, yama ForenSys Aruba. E vision di e compania tabata pa crea un sistema detaya, organiza y efectivo pa asisti companianan di seguro y cuerpo policial local door di documenta incidentenan di trafico. Awendia, ForenSys, ta un prueba di e vision aki, demostrando un record impecabel y un reputacion pa exactitud detaya.

ForenSys a keda funda basa riba e concepto di exactitud, loke a yuda pa simplifica e proceso di documenta incidente- y accidente nan na Aruba. Cu un team di 23 persona, Glenn a pone man na obra y cuminsa na crea loke awe kizas ta un di e companianan mas completo y preciso den informacion y data di incidentenan di trafico na Aruba.

Desde cu el a cuminsa cu maneho di ForenSys, e esencia di su meta tabata semper pa agilisa e trabou di su clientenan, cu ta companianan di seguro na Aruba, p’asina nan por tin acceso na tur informacion, pa por haci nan trabou na yega na conclusion di un incidente pa e compensacion na nan aseguradonan den un forma mas liher.

"Nos ta documenta tur detaye di e incidente y pone e data disponibel na nos clientenan, pa asina nan por evalua y finalisa e proceso di claims hopi mas lihe y eficiente” - Glenn Marrug ta splica.

Tambe, e trabou di ForenSys a duna autoridad nan policial e balor na nan tempo y e discrecion pa nan t’ey na incidicentenan cu ta rekeri nan presencia. Tur esaki, na beneficio di seguridad di e comunidad di Aruba.

Desde e momento cu ForenSys a keda incorpora, e tabata un necesidad pa tin un sistema di aplicacion pa colecta data, cu ta funciona den forma optimal. Awendia, e sistema aki, crea pa e compania mes a conoce varios ‘upgrade’ y ta unico den su formato, unda na sitio (‘ter plekke’) caba, e personal entrena di ForenSys por load tur informacion, di texto relatando e sucedido pa potret, video, declaracion di audio di e persona nan involvi, documentacion disponibel, condicion di clima y hasta por detecta e “gps” location. Pues, un precision exacto.

“Imagina nos personal via su i-pad ta pone tur informacion na e momento cu nan yega na e sitio di incidente y upload esaki den nos sistema di aplicacion pa nos clientenan. Ningun tarea no ta keda poni pa e dia siguiente. Cada incidente ta keda meticulosamente controla y completa den e aplicacion.” Ya di eynan caba, companianan di seguro tin acceso pa haya e informacionnan cu nan mester, mesora.

ForenSys su prioridad no ta solamente pa brinda documentacion preciso, pero tambe tin un personal entrena y pa salvaguarda informacion nan personal. P’esey entrenamento y etica ta aspectonan clave di nan operacion.

“Ora un persona cuminsa traha cu nos compania, e ta pasa den un entrenamento riguroso di por lo menos 6 siman cu ta cubri di reglanan di trafico pa reglanan di etica. Etica ta hopi importante y nos tin hopi technologia di seguridad pa sigura cu ta cumpli cu esakinan tambe. Nos team mester sigui tur regla cu ta proteha e privacidad di e situacion y di esnan envolvi y pa esaki nan ta firma clausulanan di privacidad", Glenn ta bisa.

Actualmente e compania ForenSys Aruba su database tin alrededor di 80mil incidentenan di trafico registra. “Nos trabou ta di suma importancia.” Pa motibo di tur e detayenan envolvi, ForenSys su rol den comunidad ta agrega na e importancia pa documenta incidentenan cu precision p’asina cada partido por haya un evaluacion husto y correcto.

ForenSys ta bai tur incidente di trafico cu tin un vehiculo envolvi pa documenta esaki. Asina nos por percura pa e proceso cu bo compania di seguro por cuminsa cana mas liher.

Na momento nos yega na e sitio, nos ta identifica nos mes na prome lugar y consecuente controla documento di tur esnan envolvi. Nos ta saca potret di e caretera y e autonan encontra na sitio, incluyendo e daño na e vehiculonan. Ta tuma declaracion di tur hende y “scan” e documentonan. Ora ta cla cu e proseso aki, nos ta upload tur cos den nos database pa e ta disponibel pa e compania di seguro haya pa traha cune.

ForenSys ta bay accidente di trafico so?

No, nos ta asisti na tur incidente cu den cualkier manera por a trese daño na bo vehiculo. Por ehempel joyriding, robo di wiel/tire of otro parti di e auto, si nan kibra glas pa horta den e auto, vandalismo, daño ocasiona door di piedra of sushi cu ta bula di otro auto, buraco den caminda etc.

Con por identifica un Unidad di ForenSys?

E pregunta aki ta hopi importante, paso por pasa cu tin biaha otro hende ta identifica nan mes na e sitio di incidente como personal di ForenSys pa haya informacion di e accidente, mientras nan NO ta nos empleadonan.
Pa identifica corectamente nos unidad nan ta yega na e sitio den un auto di nos compania, cu un uniform di ForenSys bisti y un badge cu ta indentifica nan.

Si na cualkier momento un persona por tin duda si e persona cu a presenta na e sitio ta un empleado di nos compania, nan por yama libremente 165 pa verifica.