Gino Montsanto - Un dieet a cuminsa tur cos 'Keda Keto'

Increibel pa pensa cu e idea pa un ijscream a cuminsa e momento cu su creador tabata riba un dieet. Gino Montsanto tabata riba e popular forma di baha peso conoci como Keto Diet pa casi 1 aña caba. E mes, un amante di ijscream, unabes cu e tabata riba e dieta aki, el a bin ripara cu e no por a haya un ijscream cu tabata cuadra cu e exigencia nan di e dieta aki. Asina e idea pa crea un ijscream perfecto segun e reglanan di Keto a cuminsa. E ijscream cu a haya e nomber chistoso di KEDA KETO.” Esaki a bin prome den forma di un joke cu amigonan pero cu despues a pega. (E no ta pa bo ‘keda keto’ di no papia pero di ‘keda riba Keto’…got it?) Den un forma spontaneo, Gino y su pareha Larissa a pone man na obra pa haci KEDA KETO, un realidad, pero facil e no tabata.

E prome reto tabata conocemento. “E tabata hopi dificil como cu ami mes no tabatin ningun conocemento den produci ijscream y mester a siña esaki for di “scratch”. E prome ‘sample’ cu nos a produci tabata mas duro cu beton. El a tuma hopi anochi sin drumi y ‘endless research’ cu mester a keda haci, no solamente den produccion, pero tambe pa sondeo di e diseño pa logo, empake y branding ideas.” E di dos reto cu a sigui tabata tempo pasobra tanto e como su pareha Larissa tin nan mesun trabou, di tempo completo. Pero ambos tabata fiha riba un solo meta; crea un ijscream unico, na beneficio di e dieta Keto. “E sacrificio mas grandi cu ami mes a haci tabata bende mi auto p’asina inverti den e mashin profesional cu tabatin mester pa produccion. Door di haci nos team di 4 persona tambe cu mi mama Trisia, na encargo di maneho di e compania, awor nos a logra ta mas consistente y tambe pa crece KEDA KETO na locual e ta awe,” Gino ta splica.

E momento cu nos a haya noticia cu nos a sold out den 3 dia nan un di e puntonan di benta, tabata unda nos a realisa cu hende a gusta e producto. Esaki a pone mi sinti mane “wow, nos ta logrando”.

Si bo mester bolbe na e inicio, cu tur e desafionan y triunfonan cu tabata dilanti, lo bo a haci tur cos atrobe? Sigur cu si, nos lo haci tur cos di nobo. E logro nan, cada un chikito y grandi ta haci tur e tempo nan duro “worth it”. Wak con leu nos a yega cu asta awor nos a logra e entrevista aki.

Tur nos ijscream nan ta keda traha sin sucu y e producto nan vegan sin ningun producto di bestia. Door di haci hopi investigacion y informa nos mes nos a yega na uza ‘Monkfruit’ como e sweetener. Esaki ta pas perfectamente den un dieta saludabel. E idea ta pa no solamente keda mira como un opcion ‘keto-friendly’ pero, mas como un opcion mas saludabel den freezer, compara cu e otro producto nan riba mercado. E ta hopi trabou y tempo como cu ta enfoka riba cada detaye cu ta bay den e produccion. E ta rekeri hopi investigacion y “Trial and error”.

Nos ta uza productonan manera mango, coco, mispel y tambe otro frutanan local p’asina duna un gevoel mas sentimental na nos producto. Nos ta purba bay bek den tempo di Mispel di Mr. Wever y Mr. Piet p’asina wak con nos por traha un producto, mas saludabel y mantene e smaak unico. E idea tras di esaki ta trece un sentimento di nostalgia bek pa nos local nan y alabes un opcion mas saludabel.

Nos ta hopi agradecido pa e reaccion positivo cu nos a y ta hayando for di nos comunidad local. Hopi bes nos ta keda aserca riba caya of ta scucha hende ta papia di e producto. Esaki ta haci nos hopi contento y ta un bendishon grandi, nos kier bisa danki pa esaki.

Ta dificil pa duna uno specifico cu ta mas popular. Ta depende di cada lugar cua ta keda mas bendi. Por ehempel unda turista ta cumpra, mispel ta uno mas dificil como cu nan no sa kico esaki ta. Pero unda mas tanto local ta bay, e sabor aki ta caba masha liher mes. Mester bisa si cada un sabor ta haya feedback tremendo y ta bende hopi bon.

E ta dificil pa compara nos cu cualkier otro producto cu tin riba shelf como cu nos ta produci cu producto nan local. Y tambe produccion ta tuma lugar aki mes. Loke nos ta haci pa nos ta diferente di tur otro producto ta refina e receta nan mas posibel p’asina ofrece un sabor unico di Caribe. Asina nos ta resalta banda di e otro nan.

Hopi sabor mas ta na caminda y nos ta super contento pa comparti esaki cu e comunidad! Tambe nos ta den proceso pa sera un acuerdo p’asina logra nos prome freezer truck. Esaki lo yuda engrandece e compania mas ainda.