GIBRIEL-NA BIDA DANKI NA TRANSPLANTE DI STEMCELL

Kico un bida ta bal? Hopi biaha hende no por pone un prijs na esaki, pasobra realidad ta cu NO TIN UN PRIJS. Mientras awe tur cos por ta mustra perfecto, tur cos por cambia di un dia p’e otro. Gibriel tabatin 18 aña ora cu el a haya un di 2 chens na bida, danki na un transplante di stemcell. Un storia cu ta resonando awe mas fuerte cu nunca, mientras un famia a mobilisa Aruba completo y persona nan di nos region hasta na Hulanda, pa bira un donante di stemcell, tur den intento pa salba e bida di nan tanta stima Mayrin Croes, kende a keda detecta cu cancer Leukemia AML y cual chens pa salba su bida ta den e unico posibilidad pa haci un transplante di stemcell y haya un ‘match donor’, pues un donante cu ta cuadra cu e rekisitonan di DNA cu ta rekeri. Awe nos ta presentabo un prueba di e poder di salba un bida cu Transplante di Stemcell.

“For di mi prome memoria, semper mi tabata drenta y sali for di hospital. Mayoria di e biahenan den mi bida tabata solamente pa mi salud,” Gabriel (26) ta cuminsa conta, pero un cos cu e ta corda tambe di e temporada ki, ta cu semper e tabatin un actitud positivo, apesar di e monster yama Sickel Cell Anemia Hb SS Disease, cu el a keda diagnostica cune desde cu e tabata un baby caba. Apesar di su situacion, su famia tabata haci lo posibel pa e por tabatin un bida mas felis y normal posibel.

"Ainda mi tin recuerdo con ami cu mi ruman nos tabata hunga den mondi of nos weganan di baseball cu nos tabata hunga rond di cas. Berdad ta cu mi semper a purba di biba un bida normal, pero door di mi limitacion di salud, esaki a bira un dificultad. Mi mester a sigui un dieta dus mi no por a come ni bebe tur cos y mester a haci tur cos cuidadosamente pa asina no causa un crisis di Sickelcell, cual ta algo hopi doloroso.” Esaki ta un di e motibonan, cu toch aunke su famia tabata purba, e realidad ta cu Gibriel no tabata por a a biba un bida manera otro muchanan. Pero apesar di esaki, semper tabatin e speransa cu 1 dia, tur cos lo cambia…

Como tratamento, Gibriel mester a haci transfusionnan di sanger cu frecuencia. “Na e momento nos a cuminsa haci mas research riba e enfermedad aki door cu e ta algo cu no ta hopi conoci na Aruba. Hunto cu e dokternan di Aruba y di afo, nan a bin cu e plan di tratamento pa reduci e frecuencia di e crisisnan y e necesidad di transfusion di sanger. E tratamento di Hydroxyurea y Folic Acid tabata algo mi tabata bebe henter mi bida diariamente. Pero na 2015, despues di a keda manda Colombia (Cali/Bogota) cu urgencia via Air Ambulance door di un Acute Chest Syndrome cu a wordo causa door di e mesun Sickle Cell. Specialistanan na Aruba a duna un splicashon cu e chens nan pa sobrevivi di e episodio nan aki ta hopi tiki. Tambe na e velocidad cu e hemoglobina den mi sanger tabata baha, tabata alarmante. No tabata por a wanta mas cu 30 dia segun mi dokternan.
Aki ta e momento cu e decision tabata pa un transplante di stemcell urgente.” Gibriel su dianan tabata literalmente conta na 30 dia maximo mas.

E no tabata dianan facil pa Gibriel. Cu su 18 aña, den e flor di su hubentud, e tabata malo y cu su dianan conta. Stemcell tabata riba mesa pero di un donante, pero e donante perfect. Un ‘match’. E proceso di buskeda a cana hopi liher door di e urgencia di e situacion. E prome grupo cu por tin un porcentahe di ta un ta un ‘potencial match’ ta bo famianan di mas serca. “Door di esaki mi famia ta e prome nan cu a haci e test aki pa por sa si por tin un match. Danki na Dios despues di e promo testnan, na e.o. mi mayornan, mi ruman homber tabata un ‘perfect match’ pa por ta mi donante y den e dianan siguiente, tur preparacion a keda haci pa realisa e transplante na Hulanda cu sosten di AZV. Den mas o menos 10 dia, nos tabata den avion rumbo pa Hulanda. Tur cos a cana perfecto, danki na Dios.

Con bo curpa a responde na e transplante?

“Na cuminsamento, e tabata hopi duro door di e preparashon nan necesario pa haci un transplante di Stem Cell. E efectonan inicial di e chemotherapy a haci’e hopi fastioso. E side effects aki a sigui pa mas o menos 6-8 siman. Despues di esey, nos a sigui segun nos plan di recuperacion cu tabata inclui control diario na cuminsamento. Despues a bira 2 vez pa siman. E transplante riba su mes no tabata algo doloroso. Pa un recuperashon completo, el a tumami un periodo di 2 aña.

8 Aña despues, con bida ta awor?

“E parti aki di mi bida ta e parti mas alegre. Mi ta hopi contento y satisfecho cu e tratamento y su resultadonan. Porfin mi por biba un bida normal. E parti scur a pasa caba y awo mi enfoke ta pa disfuta di e cosnan mas bunita cu bida por ofrece. Mi atencion ta pa crece den mi carera, famia, djis den biba awor, un bida saludabel cu e meta pa crea un famia cu e persona cu mi stima.”

Mi ta invita tur persona pa registra pa ta un donante, bo tin e yabi pa salba un bida y den un forma unico, bira un heroe. E ta haci un bon pa bo prohimo. Bo nunca sa ki dia un hende serca dibo lo mester di e ayudo aki.”

Dia 1 te cu 3 di September 2023 na Cas Bon, lo tin e prome Donor Drive mescos cu e prome biaha cu e organization Nacional Hulandes di Stemcel "Matchis" ta colabora cu Caribe pa yuda den e proceso aki. E action aki lo bay yuda crea un data base di posible donatenan den nos region y di nos tipo di ADN, cu lo por yuda salba bida di hopi di nos hendenan den futuro. Por sigui Caribbean Stemcell Donors riba nan pagina di instagram, pa mas informacion. Bira un donante awe mes.

ENGLISH