Ora un afiliacion politico cuminsa contradici principionan personal, idea-, y creencia nan, un cambio ta inevitabel. Esaki ta e storia di e hoben politico Gerlien Croes (36) kende a anuncia su decision pa para como un forsa independiente den e parlamento, kibrando su afiliacion di 6 aña na partido AVP (Arubaanse Volkspartij). Gerlien Croes, kende a studia na Universidad di Maastricht na Hulanda y a profundisa y specialisa den leynan Europeo, leynan internacional y den globalisacion ta e politico muher cu a logra mas voto den su prome salida cu AVP durante eleccion na 2017 cu 982 voto. Pa e di dos eleccion, e tabata e unico muher di e unico dos candidatonan cu a bay dilanti den voto den e partido cu 1919 voto. Hopi tabata mira e hoben politico como e futuro lider posiblemente pa tuma rienda di e partido berde, kende a bin ta sufri un cantidad di golpi ya pa algun eleccionnan tras di otro. Cu acusacion di deslealtad dirigi den su direccion simplemente pa defende su creencia nan, e discordia creciente aki, hunto cu falta di transparencia den e partido, a conduci na su salida for di AVP. Entre e discordia aki tabata e.o. e liberacion di responsabilidad di un anterior politico (Eddy Briessen) di partido MEP (Movimiento di Pueblo), no divulga na dje pa su mesun coleganan, te durante un reunion parlamentario publico, cu a conduci na su ruptura irevocabel cu e partido. Un decision dificil, sin duda, pero e ta kere cu esaki tabata e decision corecto.

E berdad tras di cortina ta haya contesta den e siguiente articulo cu ta representa e crecemento personal, resiliencia, y e buskeda pa integridad den servicio publico di e hoben politico.

Kico tabata e motibo principal tras di bo decision pa laga AVP?
E forma di pensa y traha di partido AVP ya no tabata den linea cu mi pensamentonan, principio y tampoco mi ideanan mas. Mi no por a reconoce mi mes mas den nan manera di maneha e organisacion, decisionan cu tabata wordo tuma y sin cambio den forma di hiba politica. Sierto momento nos a crece for di otro, na lugar di crece pa yega na otro. Lo tabata diferente si tabata aprecia y brasa e diferencianan y no bringa (contra)nan.

Den e caso di Eddy Briessen, kico p’abo tabata inacceptabel?
Falta di transparencia di un colega sr. de Meza y di partido, y e hecho cu mi mesun partido (awor ex-partido) a exonera un ex-politico/ minister di partido MEP di tur su responsabilidad y no bisa esaki promer c’un reunion publico den parlamento a tuma lugar unda cu documentonan a divulga hechonan irreparabel. Pa motibo di decisionnan di e 2 partidonan aki, ta pone cu awe pueblo tin cu paga pa tur e consecuencianan cu ta suma un total di 2 miyon florin.

Bo a sinta banda di un colega politico acusa di varios delito y cu awor a haya un sentencia castigabel pero ainda ta sinta riba e mesun stul representando pueblo. Bo a bisa cu cada ken cu nan consenshi kico nan ta haci. Si e rol tabata cambia y tabata abo den precisamente mesun situacion, lo bo keda sinta riba e stul parlamentario of lo bo retira?
Mi lo a tuma un distancia temporario mientras cu e proceso huridico ta continua. Aunke decisionan asina ta facil pa bisa y kizas dificil pa tuma, na final mi ta kere esaki lo ta e mihor opcion.


Por bo describi e momento ora bo a realisa cu bo mester a separa di bo partido AVP?
E tabata momento y dianan cu bo ta biba c’un poco ansiedad, pasobra bo no sa kico lo bira e resultado di bo decision, pero alavez mi tabata sinti tambe cu mi ta cla pa sigui e lucha y confronta cualkier consecuencia cu e decision aki bin cu ne. Na un momento, e curashi pa e lucha a surpasa cualkier otro sentimento cu mi por tabatin. Ta juist na e momento aki, e decision a sinti como esun natural conforme tur loke mi ta para p’e como persona y politico.

Pakico bo a tuma (casi)/3 siman) pa anuncia bo decision pa laga partido AVP?
Un decision asina grandi den bida y pa mi carera y lasonan asina fuerte entre organisacion cu famia y sostenedornan a rekeri pa duna tempo necesario pa por papia, analisa den un forma responsabel kico ta e mihor decision. Mi ta sinti cu tabata na su lugar pa a duna y tuma e tempo y duna valor na e proceso cu mi a considera necesario pa a yega na un conclusion y no a base di cualkier presion aheno.

Tin sostenedornan di AVP ta argumenta cu ora bo ta den un partido, bo mester ta un ‘team player’ na tur momento. Kico abo ta pensa?
Sigur, specialmente den politica, pero no na momento cu bo principionan como persona lo mester wordo poni un banda of negocia. Bo tin cu corda cu bo no por pone bo norma y balornan un banda of sacrificanan, mucho menos pa algo cu no ta corecto. Nunca bo mag di perde bo mes of lubida ken bo ta y kico bo ta para pe!

Bo ta kere cu e sosten cu bo a ricibi ora bo tabata un miembro di AVP ainda ta cu bo of nan tabata mas bien sostenedornan di e partido?

Mi ta kere e ta mixto.

Bo ta sinti cu bo a keda laga nan caya of ta desapunta pa e lider di AVP?

Si, mi tabata desapunta entre otro pa e manera con a acepta y aproba e forma cu otro miembronan y personanan afilia na partido por a trata mi pa motibo di tin un diferencia di opinion y para pa locual den mi conviccion, ta corecto. Incidentenan cu a sosode den su presencia y durante reunion cu e lider mes a organisa, ta momentonan y anecdotanan cu dificilmente bo por pone un banda. Como cu ta atakenan permiti cu ta bay directamente riba ken mi ta, kico mi ta para p’e, pa mi mes y conforme mi vision cu mi tin riba humanidad y cada ser humano riba e pais aki.

Bo a keda ofreci e liderazgo di e partido AVP. Den ki forma y pakico bo no accepta esaki?


A yega di trece e topico dilanti den pasado, y despues di e ultimo incidentenan, a hiba un combersacion ofreciendo un fase transitorio indefini pa un posibel cambio. Esaki a sinti como un reaccion y “promesa” despues di mi desapunto. Esaki no tabata e forma, momento y mucho menos e punto principal di discusion.

“Suicidio politico ta perde bo credibilidad y negocia bo principionan. Cualkier sea e resultado den futuro, e trankilidad cu bo semper lo por biba cu ne ta cu bo a tuma un decision corecto y integro"
Gerlien Croes

Por bo comparti bo mihor momentonan y esnan peor di bo experiencia como parlamentario/politico te awor?

Mi ta biba mi mihor momentonan cada vez cu mi ta sali na defensa y vocifera pa mi pueblo. Peor experiencianan ta di mester soporta atakenan baho, infunda y personal di politiconan cu no sa con pa hiba politica ariba nivel, specialmente di nos actual Ministernan y Minister President.

Awor cu bo ta independiente den parlamento, con bo ta anticipa cu bo rol lo cambia?

Nada no lo cambia, al contrario, mas aun lo mi sigui lucha pa mi pueblo y pais. Mi ta desplega cu consenshi limpi e trabou cu pueblo a escogemi pa eherce. Esaki mas cu un deber ta mi pasion.

Bo ta kere cu tin futuro pa bo como un politico independiente of bo ta mira bo mes fundando un partido nobo of uni na un otro?
Cua opcion ta mas interesante
p’abo?

Ainda mi no tin esaki defini pa mi mes, mi ta pidi pueblo dunami e tempo y oportunidad pa analisa lo necesario y dialoga pa yega na e mihor decision.

POLITICA NA ARUBA

Hopi ta pensa cu atakenan ta parti di politica? Con abo ta wak’e?

Atakenan personal, infunda, baho y cu meta di difama contricante politiconan mester yega na un fin. E forma aki di hiba politica a crea demasiado desunion den nos pais y nos tin e responsabilidad y deber moral di mustra pueblo cu Aruba por diferente y sigur hopi mihor riba e area di politica. Na final di dia, cada ciudadano di e pais aki merece pa nos por crece y desaroya como pais y como ser humano. Crecemento y desaroyo sigur no por existi door di kibra otro.


Ta un figura publico ta nifica cu aspectonan personal di bo bida por bira centro di atencion/discusion. Con bo a maneha ora a usa e problemanan legal di tata di bo yuinan contra bo den discurso/atakenan politico?

E atakenan aki nunca a influencia mi determinacion pa keda duna e mihor di mi mes den mi carera como politico. Ademas, ta sumamente preocupante con Minister President di Aruba ta politisa cualkier incidente y individuo cu e meta di purba gana simpatia politicamente.

Kico ta e cambionan cu bo ta anticipa den e panorama politico di Aruba den e añanan venidero?

Un comunidad cu ta mas abierto pa sostene un politica di contenido y laga los di custumber di voto y di politica di division. Un comunidad cu ta kere firmemente cu nos pais ta nos mes tin cu construye y carge. Un comunidad cu ta kere cu no tin limite pa nos mesun desaroyo personal y cu lo persigui pa ta critico, asertivo cu informacion cu nan ta haya pero alavez tin e empatia necesario pa genera sosten y pa crea un comunidad nobo y uni cu e meta pa tin y laga atras un mihor Aruba pa nos generacionnan di presente y futuro.


Bo ta kere cu partidonan politico mas chikito, ainda tin oportunidad contra e partidonan grandi tradicional manera AVP y MEP, cual ta domina politica Arubano pa tanto tempo?

Mi ta convenci cu Aruba tin espacio y necesidad pa un politica diferente na e politica cu e partidonan grandi a bin ta hiba. Nos cada un tin un voz, opinion, ideanan y metanan cu ta fungi como fundeshi pa saca no pais dilanti. Mi ta kere firmente cu e meta final mester ta haci nos pais grandi fortaleciendo su capital humano. E tradicion di voto tin e tendencia di crea e impresion cu mester accepta tur cos te hasta decision nan cu por ta destructivo y ta encontra di desaroyo di nos pais. Den e refleccion di kico ta acceptabel y inacceptabel pa nos como pais, mi ta sigur mira e oportunidad pa nos como ser humano determina nos rumbo y rumbo di nos pais.

Bo a bisa di a enfrenta atakenan directo hopi bez, incluyendo di e Prome Minister. Con e desafionan aki a formabo como un politico?

E atakenen no a forma parti di mi formacion politico, e atakenan bahonan aki mas bien a recordami pakico mi a drenta politica, netamente pa nunca forma parti di un nivel asina bergonsoso di politica. Ta momento nan sigur cu mi a mantene mi mes na mi esencia cu cordura, na final niun atake por cambia mi principio y mi esencia, sin mi permiso.

Como un muher den politica, con e ta sinti ora bo ta keda ataca pa otro muhernan den e mesun ramo?

Un desapunto inmenso y un tristeza pa netamente wak e figuranan femenino cu mester inspira otro ser femenino y sea un ehempel pa empodera, ta netamente haci lo contrario. Nos tur ta hende muher cu virtud y talentonan luchando pa e causa di nos pais. No tin necesidad pa rebaha otro pa crea podium pa pensamentonan y ideanan por existi. Si esaki ta e vehiculo cu ta uza pa hiba politica, dificilmente por convence e ser humano critico cu bo ta para pa crecemento di e ser humano y di tur cu ta forma nos pais Aruba.

Kico ta e mensahe cu bo lo manda na bo coleganan femenino, hasta esnan di e oposicion, tocante e rol di muhernan den politica?

Solamente inseguridad por crea miedo y pensamento cu nos tin cu competi cu otro den tur forma y momento. Al contrario nos mester reconoce y respeta cada ken, como hende muher, su virtud, talento y conocemento y empodera otro pa un dia nos por ta sosteniendo otro y logra yega na un representacion igual di genero den un mundo asina domina pa e ser masculino (hende homber).

Como mama hoben, con bo ta combina carera politico cu bida familiar? Bo yiunan ta consciente di bo trabou y locual bo ta haci?

E ta hopi pisa, pero e sosten cu mi tin di mi famia ta mi bendicion. Mi yuinan ta consciente pero nan ta haya mi falta continuamente, hopi bes nan ta puntra mi si pa semper lo mi keda tin asina hopi reunion y traha oranan largo y of te anochi, Ora nan ta cu mi socialmente of hasta nos bay di compras, nan ta compronde mihor awor cu mami ta combersa hopi y cu hopi hende paso mami ta un Politico. E sacrificio ta grandi y mi ta spera di curason c’un dia mi por laga atras un mihor Aruba pa nan y cu nan lo por compronde mihor e motibo di e sacrificio aki.

CONSEHO

Un di e funcionan di mas bunita cu lo bo por eherce den voz di bo pais y su comunidad, aunke sacrificando bo mesun bida y famia. Mi pensamento no a cambia, pero mi determinacion pa un cambio a bira hopi mas grandi despues di biba politica.

Cua ta realidad mas ‘crudo’ di politica cu bo no a imagina y awor bo conoce?
Manera a yega di ser bisa, politica ta cruel. Vooral pa e politiconan cu kier trece un cambio, como cu nan tin cu biba lucha contra e forma constante con ta purba asesina nan idealnan, principionan y caracter.

ENGLISH

TopBuilt with Shorthand