E tin medionan social boca abou desde cu el a cuminsa post su videonan mustrando con e ta haci barinan di sushi limpi rond Aruba.
Limpiesa c’un humor pero e berdad ta cu esaki a bira un negoshi nobo y prometedor pa Frits de Palm. E hoben entrepreneur a sondea diferente forma di negoshi desde cu e tabata studiando caba na EPI, pero tabata den 2023 cu un lus nobo a sende serca dje ora el a mira un oportunidad den duna un servicio diferente, haci barinan limpi pa casnan rond Aruba.
“Durante mi ultimo añanan na EPI mi a cuminsa un mobile car wash unda mi tabata bay na cas di hende cu mi van y tur ekipo pa laba nan auto. E concepto aki a hunga un rol grandi den e formacion awe di mi negoshi di laba bari. Como cu esaki no ta existi na Aruba ainda mi a mira un Market Gap cu mi por yena cu hopi potencial. Ora mi a presenta e idea na mi tata, e no a gusta pa nada. El a bisami pa mi busca algo otro pa dedica na dje y cu e no ta kere den e concepto. Despues di un par di dia cu mi a splik’e mihor y mustr’e ehempel di otro cu ta haci’e el a compronde e potencial y el a bay ful di acuerdo cumi. E apoyo di mi tata ta uno hopi importante p’ami.”
Frist ta aporta e mentalidad servicial cu ta algo cu el a siña durante su añanan na EPI, como un factor importante den su negoshi awe. Su pensamento ta draai rond di: Con mi por drenta un negoshi y alabes sirbi hende. E parti di sirbi tin hopi satisfacion aden cual ta hopi agradabel si bo por haya esaki den bo trabou.
“Hopi hende no ta realisa e importancia di mantene e bari limpi paso e semper ta pafor y leu for di bista. E berdad ta c’un bari sushi por atrae hopi problema mane insectonan manera bichi di musca, afurina di djaka, bacteria, holor fies, neishi di haraña, kakalaka, fruminga etc. Barinan cu ta keda manteni regularmente ta elimina tur e riesgonan aki cu ta mehora e hygenie y salud di e cas."
“E slogan Limpi Limpi a bini di e dicho popular di Arubiano ora algo keda bon limpi nan ta bisa LIMPI LIMPI. So mi a dicidi uze door cu e ta un dicho regularmente uza caba y hasta poni den mi logo oficial.
“Mi ta lanta tur dia 8’or di mainta. Mi ta wak mi schedule y pa 9or caba mi ta riba caya. Normalmente entre 2or cu 3or di atardi, ya mi ta full cla cu laba bari pa e dia. Ora anochi yega, mi ta repasa mi agenda y manda tur e invoicenan di e dia ey. Tin biaha ora mi tin hopi bari den 1 dia mi por sali for di 9or di mainta y ta yega cas te 7’or di anochi.
Como un hoben den e sector di limpieza, con bo ta mira e importancia di e servicio aki den bida diario y na beneficio di nos medio ambiente?
“Di berdad mi no por stress suficiente e importancia di limpiesa y mantenimiento. Vooral pa nos imagen internacional como un Isla turistico esaki mester ta un prioridad pa tur Arubiano. No djis prioridad personal pero tambe parti di nos cultura. Mantene nos curanan limpi, mantene cayanan, cas y camindanan publico limpi. E no ta djis importante pa nos imagen pero mas importante pa nos propio salud y paz mental. Tur hende ta contento ora nan ta biba den un ambiente limpi y hygienico.”
“Niun hende gusta susha nan man of haci trabou fies. Esey ta full comprondibel p’esey tambe mi a mira e potencial di e negoshi ki. Si tin algo cu mester keda haci pero niun hende kier hacie paso e ta fies, e ora bo mester busca un profesional pa hacie p’abo. Tanten e keda haci bon. Mi a siña cu tur hende ta dispuesto pa busca un profesional pa haci algo cu a nan mes no por of kier haci.”
Bo ta haci videonan chistoso di bo negoshi. Con e idea a nace y con bo ta kere cu esaki ta cambia e perspectiva di hende riba e industria di limpieza?
“E videonan chistoso ta parti di mi strategia di promove e negoshi. Ora hende wak un video cu ta pone nan hari (den cualkier industria), nan ta bay keda corda riba bo pa hopi tempo. Asina mi ta crea un relacion cu mi audiencia y cliente cu ta hopi mas personal. Despues di hopi video chistoso hende Io wak mi mas como un bisiña of amigo confiabel cu nan conoce pa hopi tempo.”
Cua ta algun di e lesnan mas valioso cu bo a siña for di Limpi Limpi, tanto profesionalmente como personalmente?
“Tin masha hopi les mi a siña caba den poco tempo. Mi ‘mensen kennis’ di berdad a keda sacudi basta trahando den Limpi Limpi. Mi ta traha cu hende di tur clase, circumstanica y ‘background’. Un les importante cu mi a siña ta cu no tur cliente ta mescos, cada uno ta individual y mester sirbi nan a base di nan gusto. Mi a haya mi mes un biaha cu e cliente a lubida pa habri e heki pa mi drenta y mi a haya mi mes ta bula e cura pa drenta, pero e cliente a bisami pa no haci esey nunca mas, mientras cu mescos a yega di pasami cu otro cliente y nan no a wory mes cu mi a bula cura. Esey a ponemi realisa cu mi no por trata tur igual zomaar paso tur tin diferente preferencia con pa keda sirbi.”
E reaccion mas chistoso of inespera?
“Tabatin un biaha ora mi tabata labando bari bandi retonde di Cumana anto un hende cu a pasa den auto a gritam FRITS Dl LIMPI LIMPI anto el a spantami paso mi no a spera un hende ta bay grita mi nomber.
Unda bo ta mira Limpi Limpi den 5 aña? Tin algun plan grandi cu bo kier comparti?
“Mi kier bira e compania #1 cu hende ta scoge pa nan labada di bari na Aruba. Ora hende wak nan bari sushi nan ta pensa di biaha riba mi compania. Mi kier Limpi Limpi ta sinomino cu limpiesa di bari pa delaster Arubiano. Aki 5 aña mi tin un team cu varios pickup ta operando no djis den limpiesa di bari pero tambe den pressure washing y limpiesa di glas pa tur mi clientenan.”
Cuanto cliente bo tin actualmente, y con bo a logra crece e cantidad aki door di tempo?
“Awor aki mi tin 50 cliente. Mayoria a bin for di mi propagandanan online y un otro parti a bin di bayendo cas pa cas y bati na porta. Mi tabata bati na varios casnan y parti flyers na cuminsamento pero ora cu mi a ripara e video nan ta trece clientenan hopi mas liher y efectivo, pues mi a dicidi pa dedica mas na esaki.”
Tin algun tipo di trabou cu bo no ta dispuesto pa haci dentro di e ramo di limpieza?
“E ramo di limpieza ta uno hopi amplío y mi pensamento ta mas pa diversifica y no limita mi servicionan riba caminda. Mi opinion ta c’un compania mester ta dinamico y flexibel pa por adapta na tur oportunidad cu ta presenta. Mi ta kere cu mi Io ta dispuesto pa tur tipo di trabou cu mi companía por ehecuta bon.
- Mi ta bisti paña ful tapa contra solo, handschoen, rubberboots y mi bril cu ta sirbi pa proteha mi wowo ora e awa sushi ta spat rond.
- Honestamente ora mi ta cla cu limpieza di bari mi ta bay strit den mi baño na cas, mi no ta durf drenta ningun caminda publico c’un persona por bira bisami cu mi ta hole mane un bari.
- Tabatin un biaha ora mi mester a bula den un cura (despues cu mi a yama e doño y splik’e mi mester bula pa drenta) anto un Meneer a wak mi anto cuminsa zundrami y yamami pa tur sorto di palabra malo. E meneer no tabata bon di cabes e momento ey y tabata keda tira palabra p’ami.
Built with Shorthand