Prome cu cualkier cambio fisico cu nos conoce awe di Eslaine, ya e tabata presenta su mes cu hopi seguridad. E tabata semper bisti loke e kier, comparti su entrenamentonan y celebra su curpa den tur tamaño. Pero e ta honesto na bisa cu e confiansa ey, no tabata algo di tur dia. “Mi ta humano,” e ta bisa. Tabatin momento cu e no tabata sinti su mes, pero un cos e tabata sigur di dje: ta su curpa, y e merece respet y cuido. Eslaine tabata comparti video y momentonan di su mes riba social media, manera e tabata, manteniendo su mes activo. Pa Eslaine, su curpa no tabata trata di estetica, pero di su capacidad: e tabata sinti su mes fuerte, resiliente y funcional y esaki ta loke a cambia su forma di pensa. Cu tempo, el a siña balora y stima su mes, independientemente di su midi of peso. E proceso tambe a pone realisa cu “skinny / pretty privilege” ta real. Hende ta wordo trata diferente basa riba apariencia.

Y si, el a sinti e presion pa e forma nobo di pensa aki. Comentario manera “mi kier tin bo confiansa” of “ami nunca lo bisti asina” tabata bin regularmente. Pero el a compronde cu confiansa no ta algo fiho; tin dia bon tine y tin dia mi no tabata sa kico pa mi bisti. Awendia, mi ta wak cu e lucha ey ta cu hende di tur size." Na final, el a realisa cu hopi di e comentarionan tabata proyeccion di otro hende.

Dado momento, na Januari 2025 Eslaine a pisa 82 kilo, loke tabata afectando su lomba cu ya caba a pasa den un operacion. Despues di haci investigacion, el a opta pa cuminsa cu Mounjaro, pa baha peso. “Sigur mi tabata skeptico y cu duda, pero mi meta tabata pa mehora mi salud, no precisamente pa ta djis mas flaco,” e ta bisa. Den un forma habri, el a opta pa comparti esaki cu su siguidornan riba social media.

Comentario manera “pero bo tabata bon caba” no a cambia su decision. P’e, “bon” ta algo subhetivo. Su escogencia tabata basa riba con e tabata sinti fisicamente y mentalmente, no riba aprobacion externo. El a keda husga den tur dos momento di su trayecto: ora e tabatin mas peso, y tambe ora el a bira mas flaco. E experiencia ey a re-afirma algo importante: Ningun hende no por dicidi pa bo ora bo mester cambia ni ora bo no mester.

Pa Eslaine, transparencia tabata esencial. E periodo ey tambe a yud’e drecha su relacion cu cuminda despues di un lucha anterior cu desorden alimenticio. El a siña disciplina, pasenshi y respet pa su limitacionnan. El a compronde cu cambio real no ta extremo, pero consistencia, auto-conocemento y mentalidad cla. E proceso aki no djis a cambia su curpa, pero a fortalece su resiliencia.

Eslaine ta conta cu amor a yega den su bida, desde prome cu tur e cambionan aki y sin spera. Jean Pierre a stim’e pa ken e ta; su personalidad, su esencia real y manera e tabata mustra ora nan a conoce otro. E base ey tabata crucial, pasobra mi trayecto nunca tabata trata di cumpli expectativa di otro hende. Durante Eslaine su proceso cu Mounjaro, su cambio di estilo di bida y hasta cu cirugia, Jean-Pierre a keda na su banda. Jean Pierre mes tambe a pasa door di su propio journey pa baha peso, pues e por a compronde, guia y anima Eslaine sin presion. E tipo di ‘partnership’ ey ta laga bo crece mas ainda. E ta reconoce cu e sosten aki no tabata parcial. Jean Pierre no tabata solamente presente den loke hende por mira; e tabata presente den tur etapa, baha peso, cirugia y hasta crecemento di su negoshi. E consistencia ey tin balor. “Not everyone shows up that way,” e ta bisa, y e no ta tuma esaki como algo garantisa. E sa cu e tipo di apoyo firme ta algo especial.

Su terapeuta a yega di bis’e: “You can’t pour from an empty cup.” Prome cu el a cuminsa cu e relacion aki cu Jean Pierre, e tabata den un proceso di sanacion, trahando riba su mes y poniendo su bienestar na prome lugar. E tabata hasta ok cu idea di keda su so, si esaki tabata loke tabata su destino. Awe amor ta sinti mas calmo, mas real. No mas chaos ni buskeda di validacion, e ta agrega.

Pa Eslaine, su definicion di amor propio a evoluciona cu tempo. “Mi tabata lucha prome cu inseguridad paso e tempo ey, amor propio tabata nifica aceptacion, presenta manera mi tabata y biba completo sin mester warda pa yega na un cierto ‘standard’. Awe, amor propio no ta solamente aceptacion; e ta responsabilidad y cuido. Pone su salud prome, marca frontera, tuma decisionnan consciente y ta honesto riba loke e mester fisicamente y mentalmente.”

Ora Eslaine ta mira bek na su bida awe, e ta sinti cu el a gana paz, confiansa, independencia y confianza den su mes. Nada no a bin mesora; tur cos a keda forma pa medio di experiencia, sanacion, enseñansa y decisionnan dificil. El a haña perspectiva riba ken e ta, kico e ta representa y kico e ta acepta den su bida. E claridad ey ta laga e move dilanti basa riba su propio decisionnan, no riba expectativa di otro hende.

Si un otro muher ta lesa su storia, su mensahe ta cla: " bo trayecto ta di bo. No tin un solo caminda corecto. Bo por usa hermentnan, busca sosten y tuma decision nan informa.