Pa añanan, e ta conoci como un figura confiabel den comunicacion, un periodista cu ta serca di hende, di noticia y di realidad. Awe, cu su 46 aña, e ta sigui presente den e espacio publico, pero for di un luga mas liber y mas independiente: como emprendedora, comunicador social, y fundadora di Verbum Works. Ora cu pidi’e pa describi su mes den un palabra, e no ta scoge un palabra “grandi” pa impresiona. E ta bisa: “Consciente.”
ELIZABETH
ELIZABETH
Su lema di bida ta: “Biba den balans, cana cu integridad, papia cu proposito y stima cu curashi.” E mes ta reconoce cu e ta admira hopi hende muhe, y cu e no por pone djis uno riba un pedestal, pasobra: “nos tur ta ser humano cu nos virtud y tambe defectonan.” E mirada ey, humano, realistico, real, ta core den tur su storia.
Elizabeth ta describi su mes como un muhe “c’un gran curiosidad pa bida” y cu tur dia, kier ta e mihor version di su mes. E ta un mama cu orguyo, un “mama (bear)” manera e ta referi na su mes den e rol aki, cu ta disfruta enormemente di mira su yiunan crece y bira nan propio individuonan. Y e ta un persona cu a pasa den diferente etapa di bida, pero cu a scoge pa sigui fiel na su esencia. Ora e papia di criansa y famia, e ta pone e fundeshi simpel y fuerte: nan a siñ’e hopi cos, pero principalmente responsabilidad y empatia. Y e frase cu ta keda pega den mente ta esaki: “Mi criansa ta un prueba cu amor ta un escogencia cu bo ta haci tur dia y bo ta traha duro pa loke bo kier den bida.”
Y aunke hopi hende por mira forsa di caracter, e ta bisa cu tin un parti di dje cu no semper ta sali na bista: su vulnerabilidad. “Hopi biaha hende ta mira e forsa di caracter, pero mi ta esencialmente un persona hopi sensibel.”
E decision pa skirbi su propio caminda profesional no tabata “djis un momento.” E tabata, segun e, “un desaroyo organico a traves di añanan.” Un custumber di tuma oportunidadnan cu ta presenta cu curashi y ora e no tabata sa algo, e ta busca pa siña y “esey mi ta keda haci ainda.” E transicion pa traha pa su mes tabata real, y e no a romantisa e proceso. E parti mas dificil tabata: “E inseguridad inicial y responsabilidad total. Structura bo mesun vision y operacion.” Pero den e mesun responsabilidad ey, el a descubri algo mas grandi di loke e tabata pensa di su mes: “Cu mi tin mas resiliencia, creatividad y credibilidad di loke mi a pensa.” Y e ta agrega un berdad simpel cu hopi hende mester tende: “Cu ora bo ta kere den bo mes, otro hende tambe lo haci esaki.”
ELIZABETH
ELIZABETH
Ora bo busca nificacion di e palabra Verbum, e ta indica; palabra. Den filosofia, religion y comunicacion, Verbum por referi na: E poder, impacto di palabra, expresion di e berdad.
Verbum Works awe a bira e realidad di Elizabeth. E ta un simbolo personal: “Verbum Works ta un simbolo di fe den mi mes, di e momento cu mi a scoge pa laga miedo atras y confia riba mi experiencia.” E ta libertad pa crea, pa traha cu proposito, y pa alinea su balornan personal cu su trabou. E ta e prueba cu e por construi algo propio, cu integridad, y cu sentido.
Elizabeth ta sigui activo riba radio como comentarista, y p’e esaki ta “un bendicion.” E reaccion cu e ta haya ta un sorpresa grato cada biaha. Pero e satisfaccion ey ta bin c'un otro peso tambe: e ta sinti un responsabilidad mas profundo pa ta veridico y imparcial, pasobra: “T’ami y solamente ami ta para tras di loke mi ta bisa.” Con e tempo, e relacion cu exposicion publico a madura. Awe e ta “mas trankil y comodo cu escenario,” y su enfasis ta pa conecta cu su audiencia, sea ta 1 persona of 100 hende den e sala. Y si, e ta papia diferente cu prome? E contesta ta cla: “Definitivamente mas autentico.”
Lantando yiunan mientras e tabata trahando riba su carera a siñae un les importante: “Cu no tin perfeccion, pero si tin compromiso cu mehoracion.” Y tambe: “Cu bo por cuida otro sin laga di cuida bo mes.” Awe, un di su yiunan ta studia afo di Aruba y e otro ta grandi caba., formando su caminda. Mirando bek, con e mes ta mira e Elizabeth di prome? E ta bisa cu:“Orguyo y gratitud cu mi mes, y cu tur cu a forma parti di e caminda. E no tabata facil, pero definitivamente ta bale la pena.”
P’e, “para riba bo propio pia” no ta solamente un frase. E ta:“Independencia emocional, financiero y spiritual.” Sin laga afor tambe, un confiansa: “Confia den bo mes y den Dios su sabiduria di kico e ta pone den bo caminda y pakico.”
Hopi hende ta papia di un di dos oportunidad. Elizabeth ta habri na e idea, pero e no ta pone un final. E ta bisa cu por ta e di dos oportunidad ta existi, pero no kiermen cu e ta e ultimo oportunidad. Pasobra tanten cu e tin bida, salud y curiosidad, e lo keda purba crece, diversifica su mes, semper den forma autentico. Desde cu el a scoge pa traha riba su propio termino, el a crece mas ainda den un area como muhe; “Den balora mi mes, y pone limitenan.” Y cua talento el a siña aprecia mas? “Mi capacidad pa comunica y interpreta ideanan cu mensahenan di impacto.”
Emprendemento tin momentonan di duda, y Elizabeth no ta pretende cu esaki no ta igual p’e. Loke a sosten’e ora no tur cos tabata cla of sigur tabata sigur, su proposito y su fe den esaki.
E les cu a keda cune momento mas dificil ta:
“Bo no por controla tur cos, pero bo por controla con bo ta reacciona.”
Y su conseho sin filtro pa un muhe cu kier bira independiente ta directo: “Durf! Si bo faya mes, bo ta siña toch.”
Ora Elizabeth mira su bida awe, kico ta loke mas e ta orguyoso di a logra?
“Keda lanta bek y cria mi yiunan cu amor, disciplina y respet.”
Y kico self love ta nifica p'e awe?
“Uff… un pakete completo di cuida mi mes fisicamente, mental, spiritual y financieramente.”
Y si un otro muher ta lesa su storia, kico e kier pa e saca afor di e articlo aki?
“Cu nan tin den nan e curashi necesario pa scoge pa nan mes, pa crea nan propio caminda y pa sa cu nan voz tin balor.”
Built with Shorthand