Ella

UNI PA AMOR

Amiganan den
BON & MALO

Con nan ta inspira?

HERMANDAD, LEALTAD Y AMOR INCONDICIONAL

^{NAN DEMOSTRACION DI AMOR NA NAN AMIGA MYANDRA CROES DURANTE SU ENFERMEDAD TA E INGREDIENTENAN CU BIDA TA CONSISTI DI DJE Y A BRIYA MAS CU NUNCA, DEN CARA DI CANCER.}

Mi ta un persona cu hopi humor, mi gusta hari y pone hende hari. Mi ta mama di un hobencito di 17 aña di edad y mi ta sumamente orguyoso di dje. Den mi tempo liber mi gusta ta rond di e hendenan cu mas mi stima, mi famia y amistadnan. Mi gusta bay movies, come y baila. Tambe mi ta forma parti di e “Rejoice Gospel Group”. Mi ta stima mi hendenan y semper lo mi tey pa cada un di nan, yudando unda cu mi por.

GHISLAINE

Na prome lugar mi ta un mami di dos princess di 11 y 15 aña, Arabella y Isabella. Mi ta hopi alegre y ta stima bida y hende, pa razon cu mi ta traha tambe den Human Resources. Mi gusta cana mainta trempan y lesa buki den mi tempo liber. Mi ta stima mi amistadnan serca y ta encanta pasa tempo cu nan pa just relaha of pa hunto nos yega na un meta hunto, of manera nos ta yamanan, aventura.

AFRA

Mi ta un persona asertivo y dedica, mi ta kere den inverti tempo den tur loke ta importante pa bo. Esaki ta di bo ser nan di mas keri te na hobby y trabou. Tuma tempo pa tur local ta hacibo feliz y ta saludabel pa bo. Mi gusta canta, baila, hike, lesa buki y pasa tempo cu mi famia y ser kerinan. Mi ta forma parti di Rejoice Gospel Group cu ta mi di dos famia caminda nos ta comparti masha hopi hunto.

INSPIRACION

“Crea bo grupo di amistad, busca hende muhernan cu tin e mesun interes cubo,
pero cada un cu su mesun talento”
Afra, Ghislaine, Ela

Myandra rondona pa su amiganan stima.

INSPIRACION

E inspiracion pa por haci tur e actividadnan pa crea conscentisiacion pa MCB tabata y lo sigui ta Myandra, cu di ora e la wordo diagnostica e la percura pa nos ta bon informa di e tipo di cancer cu e tin y cu e no tin cura. Y e la scoge pa conta su storia pa inspira otro y mustra e realidadnan di su lucha. Pero con e la sigui biba, alegre y cu hopi amor pa tur hende. E tabata e empuhe cu nos tabata tin mester pa por a haci su soño bira realidad y mirando e impacto cu e tipo di cancer aki tin riba e persona cu tine y su famia, ta pone cu bo kier crea conscientisacion tambe. Su soño a bira nos meta y promesa pa sigui den futuro.

CUALIDADNAN

Un hende muher cu kier trece e diferencia den nos comunidad mester tin e abilidad di liderazgo, ta comprensivo y determina. E hende muher cu ta trece cambio ta un hende muher cu ta durf di tuma e stap pa cuminsa. Como grupo bo tin un meta en comun y asina hunto bo ta traha pa logra e meta aki. Como grupo bo ta usa e mihor cualidad di cada miembro, por ehempel, creatividad, “public speaking”, liderazgo, esun cu por comunica mihor por escrito, etc.

CON BOSO TA INSPIRA?

Apoyando cada un den locual nan ta bon aden, recorda nan con fuerte nan ta y cu cada un ta riba e mundo aki pa cumpli un proposito, unico den su mesun forma.

KICO TA HACI BOSO, MUHERNAN CU TA INSPIRA

Cu nos ta determina pa cumpli cualkier meta cu nos pone nos dilanti. Apesar di tur contratiempo nos sa di keda lucha. Como grupo di amistad,nos sa con pa tey pa otro y eleva otro na momento cu tin mester. Entre amiga mester tiki palabra pa compronde otro.

BALANS

Pone prioridadnan prome riba un lista, trata na planifica lo mas posibel. Si bo no a alcansa un meta e dia ey, corda cu semper tin mayan. Bida ta un rato so, biba cada dia manera ta bo ultimo. Pa bo tin un bon balans corda cu bo trabao no ta bo bida, plania tempo pa bo mes y cu esnan cu mas bo stima.

Como grupo di amistad nos ta sumamente orguyoso di por a logra “Light up MBC” pa nos amiga stima Myandra por a experencia, esaki tabata un momento di hopi emocion pa nos tur como miembro di MBC squad. Pa mira e alegria riba nos amiga su cara. Paso tur esaki nos a haci pe.

CONSEHO

“Don’t take no for an answer”. Sa cu si bo a haya un deseo na bo curason, esaki ta pasobra bo por logra esaki. No laga otronan kibra bo moral ni bo soñonan. Ora bo no sa algo haci pregunta, trata na forma parti di un “community”, tin un grupo di amistad cu semper bo por rely riba nan, aki bo por haya conseho y cada un tin nan mesun cualidadnan cu nan por guia abo.

BENEFICIO
Pa nos hobennan sa cu como hende muher tambe nan por logra nan soñonan. Mirando hende muhernan progresa y triunfa ta duna nan tambe e motivacion pa ta triunfante.

BARERA
Den nos cultura nos ta custumbra di aserca un ser masculino pa soluciona problema. Paso cu nos a lanta y crece cu e ser masculino ta esun na cabes. Pero sa cu como hende muher bo tin e mesun forsa. Nos mester apoya otro mas, conseha otro y guia otro.

Nos inspiracion di mas grandi ta nos amiga stima Myandra q.e.p.d. Mya a biba su bida alegre y cu hopi amor. E la stima y trata tur hende cu hopi amabilidad, e la guia / conseha hopi hende den nos comunidad pa logra nan metanan y tabata un inspiracion pa hopi.

UN MOMENTO INOLVIDABEL DI INSPIRACION

Como grupo nos a inspira hopi hende cu tur e actividadnan cu nos a logra pa cu MBC-Aruba. Nos a yega na otro cu un solo meta, pa mira nos amiga stima Myandra feliz, pa cumpli cu tur su deseonan ora cu ainda e tabata na bida. Cu e por experencia tur esaki ta un bunita logro pa nos.

MUHERNAN NA ARUBA

Sumamente orguyoso, durante añanan nos tin mas y mas hende muhernan den posicion nan importante, tumando decisionnan importante pa nos pais.

INSPIRA NOS MUCHANAN

Door di ta un ehempel pa nan, mucha ta siña door di mira y asina nan ta purba imita bo. Nan lo crece mirando e hende muhernan fuerte y balente den nos comunidad.