“Sic parvis magna” — Grandesa for di cuminsamentonan chikito. E quote faborito ey ta captura perfectamente e bida di Susette Croes y Mirouska de Cuba, co-fundadornan di Family T-shirt Printing (FTP) na Aruba.
“Ongeveer 10+ aña atras nos a topa otro por medio di mutual friends y combersando a bin haya sa nos tur dos, tin un ‘special thing’ pa loke ta Design / Artwork / Printing.” Loke a inicia c’un amor comparti pa diseño, un heat press segunda mano, y un computer di un otro epoca, a crece pa bira awe un tayer di impresion dinamico, y awor un negoshi conoci na Aruba. Nan secreto? Determinacion, pasion, balornan familiar, y den un momento crucial…Qredits.
Mirouska y Susette
Mirouska y Susette
Susette y Mirouska a topa mas cu 10 aña pasa via amigonan comun, y hopi lihe, nan a descubri cu nan ta comparti un pasion pa arte, diseño y printing. Pa casualidad, nan tur dos a haya nan prome experiencia di trabou den un printshop, Susette den su bario y Mirouska serca su tata. E tata di Mirouska ta conta den forma gracioso cu ta e ta e “doño original” di FTP, cu su negoshi den e añanan ‘90.
Despues di presenta nan idea na su tata, el a dunanan lus berde y incluso, a regala nan e prome vinyl cutter y printer. Susette tabatin un computer bieu, y un heat press di segunda mano a keda cumpra di un amigo. Na April di 2015, nan a registra oficialmente Family T-shirt Printing, operando for di un camber chikito na cas di mayornan di Mirouska na Kudawecha.
Ambos tabatin un full-time job y tur placa cu nan a gana, nan a reinverti bek. Poco poco, mas y mas cliente a keda bin, e camber a bira chikito y asina eventualmente, nan a construi un espacio un poco mas grandi patras. Pa keda na altura cu innovacion den e mundo di diseño y impresion, nan a amplia nan makinaria y a inverti den varios otro mashinnan mas industrial.
Na 2020, den pleno Covid, nan a tuma un stap mas grandi. Siguiendo conseho di nan accounting, nan a transforma di un eenmanszaak pa un VBA cu e nomber SUSUKS Company VBA (SUS di Susette y UKS di e nomber di cariño di Mirouska).
Fast forward pa 2025: FTP ta basa na Tamarijn, un tayer moderno cu espacio grandi pa produccion y tecnicanan como Screen Printing, Vinyl, Sublimacion, Embroidery y nan ultimo orguyo: un mashin di DTF Printing.
Nan a soña grandi, pero a hinca tambe nan mente, man y curason den e trabou. Dianan largo, evento familiar perdi, vakantie cancela, tur cos pa keda na altura cu demanda di cliente. Manera nan mes ta bisa: “Ora un cliente ricibi su producto y ta contento, nos ta lubida tur e sacrificionan"
Susette
Susette
Den un temporada di duda durante Covid, ora tur cos tabata insigur, Susette y Mirouska tabata cla pa innova. Nan a pone nan bista riba un White Toner Printer, pero pa realisa e soño ey, nan a busca apoyo. E mesun dia, nan a aserca Qredits. "For di prome dia, e servicio tabata top," nan ta conta. Su Account Manager tabata eficiente, habri, sincero, cla y profesional. Aunke tabata nan prome bes cu nan a financia un ‘asset’ pa nan shop, Qredits a crea confiansa.
Mirouska
Mirouska
E financiamiento a yuda nan avansa pa e siguiente nivel, inverti den tecnologia y crecemento sostenibel.
Di e computer bieu te na un tayer moderno, FTP ta awe hopi mas c’un tayer di printing. Esaki ta literalmente un storia di pasion, determinacion y entrega. Tur dia nan ta den e shop, inspirando otro, creando idea y produciendo diseño cu ta crea sonrisa y sentimento di acceptacion.
Aki 5 aña, ambos ta mira FTP como un empresa bon stabilisa, lider riba mercado creativo y un modelo pa experiencia unico di cliente. Di e prome contacto te na entrega final, nan ta comprometi pa sigui eleva nivel.
Soña grandi. Traha duro. Y no tin miedo pa pidi ayudo.
Built with Shorthand