Cu su 25 aña, Valentina Londoño ta balansa tres rol: mama orguyoso di su yiu Leilani di dos aña y mei, Branch Representative na un compania financiero, y fundadora di Island Inspirations by VL.
E idea pa Island Inspirations a nace manera un hobby durante su temporada di estudio na Hulanda. E tabata buscando un manera pa expresa su creatividad y aki ta unda pintamento a bira su encuentro. “Na principio e no tabata nada serio,” e ta conta. “Tabata simplemente mi espacio pa relaha.” Pero e pasion a sigui crece. Ora el a bolbe Aruba, cu su yiu chikito y e gran deseo pa pasa mas tempo cu su famia, el a dicidi pa tuma un paso balente: transforma su hobby den un negoshi. Pakico no?
Island Inspirations ta un concepto simpel pero poderoso: sip and paint den e setting cu cliente ta eligi, sea na lama, na cas, of un ambiente special crea pa eventonan personalisa. Pa Valentina, cada sesion ta mas cu arte; nan ta union, inspiracion y un recuerdo cu ta keda. “Mi deseo ta pa cada experiencia keda un recuerdo special, y pa tur hende sinti inspira y comparti alegria cu nan ser keri. Island Inspirations no ta solamente arte; e ta inspiracion, union y un momento cu ta keda den bo curason.”
Valentina Londoño
Valentina Londoño
Pero como tur negoshi nobo, e trayecto tabata un reto. Valentina a kere den su idea, pero e tabata busca un guia mas structura. Ey mes cu a yega Qreative Business Academy di Qredits. “Mi a dicidi di participa den Qreative Business Academy, cu a duna mi mas conocemento teoretico di con pa maneha un business y a spark creatividad cu strategia y approach nobo pa mi negoshi.”
Durante 10 siman di curso, el a haya no solamente teoria di maneho di negoshi, pero mas importante: confiansa. “Conocemento ta poder, pero creatividad ta bo firma personal. E curso a mustra mi con pa pensa mas grandi,” Valentina ta bisa. “Mi no a finalisa mi estudio na Hulanda, pero Qredits a duna mi un trampolin.”
E experiencia aki a cambia e manera di pensa di Valentina. El a siña compronde cu creatividad no tin frontera y cu crecemento personal ta crea un efecto domino. “Ora nos ta crece como individuo, nos ta inspira un henter sector creativo tambe. Mi ta desea cu e curso por sigui y cu mas hende por tuma e oportunidad aki.”
Awor Island Inspirations ta na su fase di expansion: colaboracion cu hotel y restaurantnan, tayernan priva, y eventonan creativo como weddings y proposals. Pa Valentina, e bida empresarial ta apenas cuminsando, pero su meta ta cla: sigui crea espacio pa alegria, union y arte cu ta keda pa semper den curason di tur hende cu ta pasa.
Built with Shorthand