Devin de Veer; Coach - Comentarista

✍🏻: Jacqueline

Ora Devin de Veer subi riba cancha of sinta tras di microfoon of dilanti camara di television, e no ta simplemente presenta. E ta mustrando e caminda. Como coach, comentarista deportivo y miembro di directiva di AVB, Devin ta parti di un generacion nobo di muhernan cu ta lidera for di tur angulo. E no ta pidi espacio, e ta crea y proteha esaki cu hopi gana y hunto cu su amor pa deporte di Aruba, e ta habrie bista pa esnan cu ta bin tras dje.

C’un bos cu ta balansa autoridad cu empatia, y un vision cu ta inclui tur mucha, tur mucha muher, y tur esnan cu no ta keda tuma na cuenta den sistema, Devin ta creando cambionan grandi riba e forma con liderazgo den deporte mester ta, tur esaki, paso a paso y cu tur su trankilidad.

Den hopi cas, deporte ta un hobby. Pero den e cas di Devin de Veer, deporte ta herencia. Su welo tabata un landado y hasta ta landa ainda. Su tata tabata un atleta semper disciplina cu a entrena den diferente disciplina manera incluyendo track, wrestling, paintball, y ta un instructor den Tang Soo Do c’un black belt di segundo grado. Lanta den un ambiente asina, a siña Devin hopi liher cu deporte no ta solamente movecion. E ta disciplina, conexión y liderazgo.

Awe, como un di e poco coach nan muher den futbol, un comentarista deportivo y miembro di AVB, Devin ta sigui e bunita legado familiar aki, pero den su propio caminda y su mesun forsa y estilo. Devin no ta sigui e regla, e ta cambiando nan.

Devin a cuminsa su carera den piscina, representando Aruba den landamento sincronisa. Despues, el a hunga volleyball pa seis aña y a yuda su team bira
sub-campeon den New England Championship. El a coach tambe na Corsou prome cu el a bolbe Aruba pa sigui traha cu hoben nan den futbol. Di muchanan chikito (toddler) te na teenager, su estilo di coaching ta flexibel y adaptabel.

Cu mucha chikito, e enfoke ta riba diversion, base tecnico y confiansa. Cu grupo mas grandi, e ta trece structura, tactica y strategia den grupo.

Su formacion academico, un Bachelor den Sports Management y un MBA, ta eleva su instinto natural cu decisionnan tuma basa riba data real, plan strategico y liderazgo den ekipo. “Mi educacion a siña mi traha den grupo y cu respet pa opinion nan di otro”

Pa Devin, ‘coaching’ no tabata suficiente. E kier a yuda trece cambio den e sistema di deporte. Pues, el a tuma e paso pa asumi un rol den directiva di AVB — Federacion Arubano di Futbol. Su meta? Mas chens pa hoben nan, mas apoyo pa mucha muher nan, mas transpariencia y un federacion cu ta refleha nos comunidad.

Den media deportivo, representacion ta importa. Devin a crea su propio espacio despues di a acepta e proposicion di Erin Croes, pa ta un comentarista pa Magic FM cual despues a sigui cu peticion pa TeleAruba tambe. Hunto cu Arianne Westerburger y Cadochi Kock, nan a crea un team hopi gusta. Hopi liher a keda demostra tambe cu Devin no ta djis yega sinta tras di microfoon y papia, e ta investiga, analisa y trece contexto cu contenido.

Inspira pa Cadochi Kock y Carlmichael Bikker, Devin a desaroya su propio estilo: neutral, cla, dinamico y basa riba conocemento.

E ta duna un otro tipo di presentacion: pa hende cu nunca a tende un muhe narra un wega di futbol, awe nan ta mira cu e por.

;

Un di e parti mas poderoso di e storia di Devin ta su union cu coach y comentarista Arianne Westerburger.

Nan no ta competi, sino ta complementa otro. Y den un mundo masculino, nan ta mustra kico bo por logra ora dos muher ta traha pa lanta otro.

Devin ta bisa cu e sa di e presion cu mucha muher nan ta pasa aden ora di scoge pa un deporte manera futbol of baseball, cu ta mira como un deporte pa mucha homber.

Su Conseho?

Kere den bo mes. Sali for di bo ‘comfort zone’. Deporte no ta unicamente pa movecion, e ta tambe pa lidera, tin respet y ta confiansa.

Si bo por a realisa un soño si limite, kico e lo ta?

 “Logra un centro deportivo nacional, multidisiplinario, pa entrena atleta, coach y referee. Aruba tin talento. Mester duna nan espacio pa crece.”

Su Frase den bida:

“Strive with grace. Grow with grit.”  (Esforsa bo mes cu gracia. Crece cu determinacion.)
Esaki ta e forma tambe cu Devin ta biba, lidera y inspira, tanto den cancha, tras di microfoon y den reunionnan caminda cambio real ta tuma forma.

Share on WhatsApp