Pensando bek, Denzil ta bisa cu aunke cu musica no tabata un punto central den su bida, di un manera of otro, toch esaki tabata presente. Pa cuminsa, e gran musico conoci di Aruba Juancho Kock+ tabata e omo di e wela di Denzil. Banda di esey, su experiencia cu musica a cuminsa cu e tradishon di Dande. Y di un dia pa otro el a pasa, e interes pa musica a spierta den dje. “Mi tabatin 12 pa 14 aña. Mas mi tabata toca, mas sigur mi tabata cu esaki ta locual mi kier haci pa semper,” Denzil ta bisa.

Cuarta tabata su prome instrumento aunke e kier a bay les di drum, pero como cu e tabata mucho chikito, esaki no tabata posibel. E mes ta admiti awe cu tabata su training nan riba su cuarta loke a dune un bon sentido di harmonia for di trempan caba y asina e fundeshi pa musica a cuminsa keda construi. Despues di a studia musica na Aruba, traha cu otro musiconan local y haci varios proyectonan musical na Aruba, Denzil a tuma e decision firme pa sigui studia musica. E ta kere cu tin futuro den musica sigur…

“E cultura di Aruba semper a fascina mi, esaki a influencia mi den diferente manera pero esun di mas impacto ta e ritmonan. Ritmonan di Aruba tin asina hopi variacion cu el a yudami defende mi mes ritmicamente den diferente evento cu otro tipo di musica.”

Despues di 12 aña di studia musica cu Carlos Bisslip, con bo maestro a influencia bo estilo y enfoke musical? Con lo bo resumi kico tur bo a siña?

Mi mentor Carlos Bislip, mas cu claro, ta un pilar fiho den mi carera. No solamente el a influencia mi pero tambe a duna mi hopi oportunidad di hoben caba pa conoce e mundo di musica y tur locual e ta trece cune. Carlos semper a wak mi manera un tipo di yiu y esaki a haci cu e combersacion nan y lesnan tabata profundo y personal. Esaki a yudami desaroya algun abilidad cu no a yuda solamente patras di mi instrument, pero tambe backstage, rehearsals, reunion y training individual e.o.. Carlos Bislip a yudami prepara mi mes musical y personalmente pa e mundo cu mi ta aden. Aparte di esaki, mi ta toca diferente percusion, tambe mi a tuma les di piano pa 2 aña serca Mr. Jhonny Croes y mi a bay les di solfeo pa 2 aña serca Franklin Granadillo. E dos klasnan aki a yudami hopi cu mi conocemiento harmonico tambe. Esaki ta yuda cu ora mi ta tocando cu banda, mi ta compronde kico tur e otro intrumentonan harmonico ta haciendo y esey ta yuda mi toca mas adecua cu e banda. Mi genero preferi na e momentonan aki ta reggae. Pero mi ta tende casi tur tipo di genero, esaki ta yuda mi amplia mi vocabulario musical mundialmente. Un genero cu mi ta haya hopi interesante y cu mi kier profundisa mi mes mas den dje den futuro ta Tambu di Aruba. Lo mi kier studia esaki pa mi yuda innova esaki.

Bo tabatin e oportunidad pa toca cu diferente grupo y banda na Aruba. Cua ta algun di e experiencia nan mas memorabel?

Un di e momentonan mas special pa mi den mi carera tabata na aña 2016, Caribbean Sea Jazz festival, mi tabata tocando cu Caribbean Combo. Caminda cu mi tabata improvisando y ora mi a bira wak na banda di escenario, mi a mira Tony Succar para cu 3 otro miembro di su banda ta wak nos toca. Nan a wak mita set! Como hoben, e tabata un di e motivacion nan di mas grandi den mi bida. Ta musiconan cu ami tabata tende riba youtube tabata para eynan ta mirandomi y disfrutando di nos musica.

Mi a scoge Codarts pasobra nan tin un seleccion hopi amplio di cultura y estudio y esaki ta locual mi kier probecha di dje p’asina por sigui defende mi mes riba diferente ramo di musica. Keda accepta no tabata facil. Mi mester a haci 4 Online meeting caminda un di nan tabata mi 'presentacion' di tres cantica cu mi mester a toca 5:30 di mainta, door di diferencia di ora entre Aruba y Hulanda.

Con e sosten di bo famia ta cu bo decision pa studia musica?

Mi famia semper a sostene mi cu mi carera den musica. Mi mama y mi tata tabata mi lift pa tur training y toca cu mi tabatin, prome cu mi a haya mi rijbewijs. Hopi biaha nan tabata hasta sacrifica nan mesun tempo, pa por a cumpli cu mi. Ora mi tabata mas hoben, nan no tabata mesun sigur di musica p’ami, pero mas mi a toca y haci presentacion nan, mas mi ta kere nan por a wak cu mi tin un vision di kico mi kier logra cu musica. Asina nan a dicidi pa pone nan confiansa den mi cu mi lo logra. Si no ta pa nan tempo y energia, lo mi no por a cumpli cu tur cos cu mi tabata haya mi cune.

CLICK AKI PA MAS INFO

E industria musical por ta beneficioso, pero tambe un reto. Tin hopi talento na mundo, no tur ta haya e ‘big break’. Con bo tin pensa pa purba make it den musica?

Mi ta di opinion cu e ta hopi importante siña con pa haci negoshi cu bo arte, sigur si bo kier biba di bo arte. E no ta necesario, pero si bo por haci hopi uzo di esaki door di colabora cu otro artista of organisa bo propio evento/concierto/actividad. Por ehempel, Tropical, un evento cu ami hunto cu Stephen Diaz ta organisa. Semper bo lo tin 2 banda di medaya. Bon y malo. Y e ta depende di bo unda bo ta posiciona bo mes y ken bo ta rondona bo mes cune. Y esaki lo resalta tambe den e arte. E por ta hopi duro tambe pasobra semper lo tin un tipo di competencia, pero tanten cu abo percura pa bo mes y pa bo arte progresa y innova, semper lo tin resistencia.

Mi ta uza social media hopi pa hende wak kico ta e bida cu un musico ta biba. E ta hopi mas cu e arte so. Mi ta kere ta importante hende wak kico otro ta pasa den un musico/artista su bida. Esaki ta yuda conscientisa con serio e trabou ta. Esaki por haci cu muchanan ta keda motiva pa scoge musica como ofishi y tambe hisa e balor di artista na Aruba bek. Banda di esaki mi ta post videos di percussion of short clips tocando c’un banda, educando riba mi ramo como percusionista y e cultura di Aruba.

Mi lo kier traha cu mas artista posibel den mi carera; musico, poëta, pintor, cantante etc. principalmente di nos region di Caribe. Mi ta kere colaboracion ta un yabi hopi importante den arte pa yega leu. Lo mi desea di trece cultura di Aruba y Caribe na mundo. Y despues di esey, claro, lo mi kier traha cu artistanan internacional di otro paisnan.

ENGLISH
TopBuilt with Shorthand