Daniel Maduro di DM PROPERTY

✍🏻: Jacqueline

No tur negoshi ta lanta riba ‘glamour’ of ta sali di un oficina bunita. Tin negoshinan cu ta consisti di trabou duro bou solo cayente y cu sudor na granel. Esaki ta un forma cu por describi e negoshi di Daniel Maduro cu el a duna e homber di DM Property Care. Hunto cu su ekipo, nan ta yega den un cura di un cas of edificio descuida, haci esaki limpi y dune un cara cu completamente nobo. Pues, un negoshi di landscaping y mantenimiento cu ta drey rond di traha duro, keda consistente y sa con pa transforma su trabou den arte. Cu su 27 aña, el a construi su empresa den un sector di limpieza cu tin un impacto grandi pa e paisahe y e mundo di real estate na Aruba.

**DANIEL MADURO di DM PROPERTY**

**DANIEL MADURO di DM PROPERTY**

Daniel a nace na Colombia, pero a lanta na Aruba for di su tres luna di bida pero durante su crecemento, a bay biba na Colombia tambe pa un temporada. Esaki a dun’e chens pa mira bida for di dos perspectiva: di lucha y oportunidad. “E hecho di por tin tur dos mundo pa mira pa un regalo grandi di bida”, e ta bisa. Su experiencia personal den dos sistema di bida, un mescla di dificultadnan, lesnan y presion, a moldi’e pa bira e persona cu e ta awe.

Un di e desafio mas grandi pa Daniel Maduro ora el a cuminsa su propio negoshi tabata gana confiansa, no solamente di clientenan, pero tambe den su mes y di esnan mas serca di dje. E ta corda un tempo caminda ni su famia no tabata kere den su idea; nan tabata mira su proyecto manera algo sin futuro.

Pues, e tabata un lucha no solamente fisico sino tambe mental p’e. Pero Daniel no a laga esaki strob’e. Desde prome dia, el a pone enfoke riba construi confiansa mustrando un manera di traha organisa. “Confiansa ta un apuesta c’un cliente ta pone riba bo, y si bo logra gana esey, bo por gana un cliente pa semper,” e ta agrega.

Daniel a traha den diferente sector prome cu el a funda su propio empresa. Esaki, segun e, tabata su scol di berdad. “E experiencia a pone mi den situacionnan di presion y reto cu a forsami pa siña bende, duna servicio, crea sistema, maneha proyectonan, trata cu hende, y, mas importante ainda, ehecuta riba cualkier nivel cu e situacion ta pidi.” El a siña keda alerta, adapta su manera di pensa..

Pa Daniel, evalua su trabou ta un proceso continuo. E no ta basa su exito solamente riba kico un cliente kier, pero riba kico e mes por mira como un trabou digno tras di su nomber. “ E ta manera bo tin 10 aña y bo ta hunga futbol tur dia, pero ora bo por bay stadion pa wak bo hungador preferi, e dia despues bo ta purba haci e mesun ‘move’. T’asina bo ta crece. E mesun pensamento aki, ta aplica pa negoshi.” Daniel ta kere den inspira otro, pero tambe den evalua su mes: si e no por “bende” e resultado, literal of metaforico, e trabou no ta cla. Su standard ta uno: tur proyecto mester refleha pasion, calidad, y intencion.

“Nos ta kere den laga cada propiedad den un forma cu e ta ‘instagrammable’.. Pero no tur cliente kier esey. Tin hende ta yama pa corta un palo y laga e palo ey mes, y tin otro cu kier pa kita cada yerba for di e tereno. Pero e cultura di nos empresa ta cla: si nos no por ‘bende’ e resultado, nos no ta cla.”

Tin tipo di trabou cu bo ta rechasa?

“Nos ta bay na cada cita cu e intencion pa yuda, pero tin proyecto cu simplemente no ta pa nos. Si e vibe no ta conecta, si comunicacion no ta flui of simplemente si e planning no ta cuadra cu e schedule di nos, nos ta referi e trabou na un colega cu tin e structura corecto.”

Bo ta crea orden for di chaos. Con bo ta trata cu e “carga” sentimental di e proyectonan di limpiesa grandi?

“Trabou duro ta algo cu hopi hende por haci. Pero tabatin tempo cu mi tabata haci tur proyecto mi so. Ora bo por bira e persona cu ta crea un legado pa bo mes y bo famia, e carga sentimental ta bira un meta pa supera, no un obstaculo. E ta motiva bo pa sigui, paso bo ta wak bo vision aserca, y e vision ey ta bira mas fuerte cu e peso cu bo ta carga.”

Clientenan ta sorprende ora nan wak bo?

“Ora nos cuminsa, tabatin hopi duda. Pero ora cliente nan topa cu ken nos ta, nan ta wak cu esey mes ta nos bentaha. E sorpresa ta bira confiansa.”

“Awendia, e momento cu mi ta mas stima ta ora ami y e cliente ta conecta riba un vision pa nan cas. Nos ta biba e plan hunto. Pero mi no por lubida mi prome cas. Nos no tabatin ni herment ainda. Mi a drenta Kooyman y cumpra cos cu mi no tabata ni mester, djis pa cuminsa.”

Con bo ta mira bo trabou su impacto riba paisahe y propiedadnan di Aruba?

“Loke nos ta haci no ta cambia djis un solo un cas, pero e bario tambe. Nos a mira un efecto domino den cierto zona. Sea nos of e competencia ta trece e nivel ey. Nos ta sugeri e cliente pa inspira su paisahe den naturalesa di Aruba y bo por wak e inspiracion ey riba mercado.”

“Semper tin un manera miho pa haci algo.”

“Acepta e posicion cu bida a duna ‘bo. Pero corda cu bo tin libertad y boluntad tambe. Bo ta e combinacion di condicion y eleccion. Bo por haci mas cu bo ta kere.”

Share on WhatsApp