Den tur seriedad, cu apenas 14 aña, Daniel Alejandro Franco ta apenas cuminsando; e ta mantene un GPA perfecto, e ta un di e mihor landadonan den South Texas, y entre tur esaki, e ta disfruta di su PS5 y di cuminda di su abuela stima, Nilka Franka, ora e bay di bishita na Austin.
Pero e loke ta haci cu Daniel ta resalta asina hopi no ta su disciplina unicamente, sino e motibo mas profundo pa kico e ta haciendo tur esaki. “Mi no ta simplemente landando ‘laps’, mi ta landando c’un proposito.“ "Mi a nace na Aruba. Esey ta semper mi cas. Un dia, mi kier represent’e riba e tarima Olimpico.”
Na 2017, Daniel a muda pa Houston hunto cu su mama. E tabatin apenas seis aña. For di lama trankil di Aruba pa e ritmo rapido di Texas, un cambio grandi. Pero ya, promer cu el a cumpli shete, e tabata den un club di swimming. El a purba basketball, flag football, y hasta football como 'defensive lineman' den su di 8 klas. Pero na final, el a dicidi y e esfuerso pa scoge pa cua deporte e keda haci, no tabata dificil. “Football tabata hopi dushi, pero ta den pool mi ta sintimi, mi mes.”
Na 2023, Daniel y su mama a muda pa Austin. Ey nan a descubri Waterloo Swim Team, caminda el a keda entrena, bou di guia di Coach Brooke. “E tabata duro na cuminsamento,” Daniel ta bisa. “Pero mi gusta traha duro. Mi gusta mehora” Na 2024, el a ricibi e titulo di MVP pa e temporada di short course, y awor e ta den e Top 20 landador nan di South Texas den su categoria (13–14 aña), un grupo hopi competitivo. Segun Daniel, e combinacion di exigencia y fe di su coach ta loke a pone subi nivel. “Coach Brooke ta spera hopi di nos. Pero e ta kere den nos tambe”
Aunke cu e ta biba na Texas, e curason di Daniel ta keda na Aruba. Pa tres aña consecutivo, el a bolbe Aruba pa train y competi cu Giants Swim Club bou di Coach Jordy. Den Campeonato Arubiano, el a trece medayanan pa Aruba.
E aña aki, pa e prome biaha, el a keda na Texas pa haci try-out pa e team di su ‘high school’. For di 75 estudiante, Daniel a logra drenta. Awor e ta train pa STAGS Long Course Championship den San Antonio, unda el a cualifica pa TAGS State Competition, e nivel mas halto pa su categoria den Texas.
Na scol, Daniel ta mantene un GPA di 4.0 den klasnan avansa, mustrando cu e mester traha mes duro den awa y su estudio.
E credito e ta duna su mama. “Mi mama a sacrifica hopi p’ami. Mi kier cu tur loke mi ta haci, ta conta pa algo.”
Pafo di scol y landamento, Daniel ta un teenager normal. E gusta bay road trip cu su mama y su cacho Grayson, pasa dia cu amigonan, y mas cu tur cos, pasa tempo cu su wela stima Nilka. “Ora mi wela ta bin, e ta cushina e mihor cumindanan. E ta cordami di Aruba."
Daniel no ta papia di soño sino di plan. Siguiente: TAGS. Esey ta sigui pa high school varsity. Despues NCAA. Y si Dios kier, Olimpico.
Built with Shorthand