Cu su 24 aña, Milenka ta comparti su storia inspirador y su pasion pa representa Aruba den e certamen di Miss Universe. E ta un persona fuerte y determina, cu un deseo pa inspira otro muhernan cu su storia y haci nan sa cu nan por supera tur desafionan. Descubri un poco di Milenka…
Pakico bo a inscribi pa MISS UNIVERSE ARUBA?
Mi soño for di ora cu mi tabatin 15 aña tabata pa para riba e podio di Miss Universe. Mirando tur e muhernan fuerte den nan shimis bunita a haci mi soña cu un dia lo mi ta para riba e mesun podio. Ora mi a bira mas grandi, mi a comprende cu e ta hopi mas cu solamente bisti e shimis y smile riba un podio grandi. E ta trata di liderazgo, di empodera otro y di pone un ehempel pa muhernan hoben. E comprendemento aki a haci cu mi a inscribi mi mes pa Miss Universe Aruba 2023.
Nombra 3 cualidad nan unico cu bo ta posee cu ta haci abo, e persona ideal pa representa Aruba riba un escenario internacional?
Mi ta kere cu mi ta apto pa representa Aruba pasobra mi ta un muher amabel, generoso pero toch fuerte. Mi tin e deseo pa inspira otro cu mi storia y mi kier pa muhernan hoben wak cu nan no ta so y cu nan futuro ta briyante.
EXPERIENCIA DI BIDA
Conta un experiencia cu a formabo den e persona cu bo ta awe y con esaki ta motiva bo den bo participacion di e certamen di Miss Universe Aruba?
Mi a haya mi prome pareha ora mi tabatin 18 aña. Na comienso e relacion tabata bon, pero despues di algun tempo mi ex a bira mas y mas controlador y abusivo. E tabata insultami, grita mi y hasta a dal mi den algun ocasion. Mi tabata sinti mi hopi inseguro y infeliz pero mi tabata sinti miedo pa lag'e. Mi tabata pensa cu su comportamento tabata un fase y cu e lo a cambia pero lamentablemente e cos a bira solamente mas malo.
Un dia, mi a acerca mi famia y amigonan tocante e abuso. Nan a animami pa termina e relacion y busca ayudo. Desde e tempo ey mi a cuminsa cura y reconstrui mi bida. Superando mi traumanan no tabata facil, pero mi a siña pa stima y respeta mi mes. Finalmente mi a haya mi pareha actual cu ta trata mi cu amabilidad y respet.
Mi storia ta un di hopi otro muher. Mi kier ta un ehempel y mustra tur hende cu ta sobreviviente di violencia domestico no ta defini bo. E ta solamente haci bo mas fuerte!
Aruba ta conoci pa su atraccion turistico pero ta enfrenta desafionan a causa di e crecemento di turismo y construccion di hotelnan. Kico ta e pasonan cu abo ta kere cu mester keda tuma pa balansa crecemento economico y preservacion ambiental?
Economia di Aruba ta basa mayoritariamente riba turismo asina ta cu pa e isla ta hopi importante pa mantene e turismo bibo, sin embargo tambe ta hopi importante pa pensa riba cambio climatico. P'esei mi ta pensa cu e pasonan cu mester tuma ta inclui construccion di hotelnan eco-amigable cu ta usa por ehempel bakinan di reciclaje, dusnan cu fluho abou y lampinan LED. Sigur cu uzo di energia renovable manera energia solar ta necesario riba un isla cu solo manera Aruba. Asina nos por mantene tanto turismo como naturalesa bibo.
Como un posibel embahador pa Aruba, con lo bo usa bo plataforma pa mehora imagen di nos isla y contribui na su desaroyo?
Mi lo ta un embahador pa nos isla bunita door di mustra e cultura unico y beyesa natural di Aruba. Mi lo promove turismo sostenibel y demostra nos tradicionnan vibrante. Aruba ta un isla chikito, pero hopi diverso y mi ta hopi orguyoso pa ta parti di esey.
Den un era unda nos comprendemento y comprension di beyesa ta evoluciona, kico ta bo definicion di beyesa como un participante den un concurso di beyesa?
Mi ta kere cu beyesa ta cuminsa cu cualidadnan interno manera compasion, amabilidad y honestidad. Pa mi, un alma bunita lo straaya pafor y esey ta defini belleza pa mi.
Built with Shorthand