Cu su 27 aña, Karol ta comparti su storia personal di superacion, su soñonan di chikito pa representa Aruba den e certamen di Miss Aruba y con e tin pensa pa usa e plataforma ‘ki pa educa y empodera su comunidad. Descubri un poco di Karol…
Pakico bo a inscribi pa MISS UNIVERSE ARUBA?
For di chikito mi tabata gusta wak e certamen di Miss Universe cu mi mama y imagina cu algun dia mi lo representa mi isla. Awendia mi ta wak e certamen mas cu solamente un certamen di beyesa. Mi ta wak e certamen como un oportunidad pa continua mi crecemento personal y cu esaki crea un impacto positivo den nos comunidad y tambe na nivel internacional.
Nombra 3 cualidad nan unico cu bo ta posee cu ta haci abo, e persona ideal pa representa Aruba riba un escenario internacional?
Mi creatividad, carisma y balentia. Sigur lo lagami resalta ariba un escenario internacional pasobra nos hende muhernan Arubiano sa di demostra cu semper nos ta un lus y ehempel pa logra nos metanan.
EXPERIENCIA DI BIDA
Conta un experiencia cu a formabo den e persona cu bo ta awe y con esaki ta motiva bo den bo participacion di e certamen di Miss Universe Aruba?
Den mi hubentud mi a pasa door di un relacion no saludabel cu a kibra mi soñonan y a baha mi self esteem. Mi a logra surpasa e experencia aki door di a busca ayudo profesional y duna di mi banda. Atraves di e plataforma di Miss Universe Aruba mi kier inspira y motiva e hobencita y damanan pasando door di un situacion similar pa kibra e ciclo. Pasobra den bida ta importante pa bo siña stima bo mes, balora bo mes y sa kico bo kier. Y abase di esaki lucha pa bo soño y metanan den bida.
Aruba ta conoci pa su atraccion turistico pero ta enfrenta desafionan a causa di e crecemento di turismo y construccion di hotelnan. Kico ta e pasonan cu abo ta kere cu mester keda tuma pa balansa crecemento economico y preservacion ambiental?
Nos economia ta sumamente importante pero teniendo esey na cuenta nos medio ambiente mester keda un prioridad. Mi ta di opinion cu e ta hopi importante pa re-enforsa e leynan cu ta proteha nos medio ambiente durante construccion. Y tambe pa educa nos comunidad en especial nos hobennan riba e importancia di turismo sostenibel. Pa asina nos por traha huntu den direccion pa perserva nos beyesa natural. Y na mes momento cu esaki traha pa crea un economia estabel.
Como un posibel embahador pa Aruba, con lo bo usa bo plataforma pa mehora imagen di nos isla y contribui na su desaroyo?
Mi lo usa mi plataforma pa representa e identidad di nos hendenan y promove nos cultura y turismo. Pero tambe mi lo kier empodera nos hobennan emprendedor atraves di mi plataforma pa asina na un nivel internacional nan tambe hanja e oportunidad pa yuda Aruba diversifica den economia.
Den un era unda nos comprendemento y comprension di beyesa ta evoluciona, kico ta bo definicion di beyesa como un participante den un concurso di beyesa?
Beyesa ta mas cu loke wowo por mira. Beyesa ta cuminsa di paden door di amor propio. Y e ta manifesta door di e lus cu ta briya den bo wowo.
Built with Shorthand