Nomber Unico: Guizza; bo tin un nomber hopi diferente, kico ta e storia tras di bo nomber?
Guizza: "Tin un Bron di awa na Italia cu ta yama Guizza y na Italiano Guizza ta nifica chispa di candela. Esey t’ami, un chispa di alegria."
Influencia Cultural: Bo a nace na Hulanda pero a crece na Aruba c’un mama Arubiano y un tata Hulandes, con bo ta kere cu e mix cultural aki a influencia bo expresionnan artistico den baile, canto y modelahe?
Guizza: "E influencia sigur ta den mi estatura. Mi ta hopi largo di estatura dor di ta un Hulandes. Mi tin e soltura di lo Caribense den mi movecion y e calor Arubano den mi manera di expresa. No obstante mi ta simplemente Guizza."
Arte di Palabra: Bo ta activo den arte desde bo ta chikito, participando den Arte di Palabra, canto y baile. Por bo comparti un experiencia memorabel den e artenan aki?
Guizza: "Si, mi ta hopi orguyoso di ta tres aña consecutivo ganador di Arte di Palabra den mi categoria y mi ta tambe ganador entre e tres islanan, e prome aña. Pa un ‘Arucambita’, esaki ta super great. Mi ta stima mi Papiamento."
Motivacion pa Participa: Apesar cu bo nunca a participa den un concurso di reina di carnaval prome, bo a tuma e decision e aña ‘ki , Pakico?
Guizza: "Mi motivacion: Esaki t’e ultimo aña cumi mag di participa. Semper e tabata mi soño. Desde chikito mi tabata bay scondi, bisti e Corona di mi Mami, Michella Lacle Reina 1995. Y ora mi a bin biba na Aruba 10 aña pasa, mi tabata participa den Carnaval pero nunca tabatin un lugar p’ami, dus it is now or never! Yolo."
Michella Lacle Reina Coastal 1995
Michella Lacle Reina Coastal 1995
Hopi atencion ta riba bo y esaki ta trece comentarionan di sosten pero tin biaha critica tambe y hasta loke por cualifica como ‘bullying’. Un di esaki tabata riba bo estatura. Con bo ta maneha e comentarionan aki?
Guizza: "Nan ta bisa e mihor perfume ta bin den un empake chikito. Pero tin bez nos mester wak mas aya cu normal y comprende cu e contenido di un ser humano ta valioso den ki tamaño cu e por ta, ki color, hasta si bo ta un ser special. Hopi a bisami bay pa Miss Teen, pero ami ta gusta Carnaval y ‘afterall’, mi ta hopi cabes duro y determina."
Rol di Famia: Bo tin un famia cu ta un sosten obvio grandi y fuerte bo tras. Con importante esaki ta p’abo y pa bo preparacion pa e certamen di youth carnival queen?
Guizza: "P’ami ta hopi special di mira mi famia manera semper hunto den tur cos. E amiganan di mi Mami pa mas di 35 aña ta bin bek hunto awor pa sosten. Pero mi mesun amiganan di mas cu 10 aña pasa t’akinan. Un famia grandi cu ta haci e ‘journey’ djis maraviyoso. ‘One happy family’. Esaki ta e parti mas importante p’ami."
Pakico bo a scoge TOB?
Guizza: "Mi ta baila tur aña sin excepcion pa TOB den Carnaval Infantil. Awor a yega e dia cu ami ta bay pa e grupo di adulto hoben den Parada Grandi. Tribute of Brazil ta den mi curason y tambe mi ta representa mi scol Colegio Arubano, cu ta djis magico."
Participacion y crecemento: Carnaval ta un evento cultural vibrante y significante na Aruba, mas awor cu ta trata di nos carnaval #70. Con bo ta mira bo participacion den e concurso di Reina Hubenil di Carnaval y bo crecemento personal?
Guizza: "Cultura ta NOS, nos mester mantene y asina mi ta bay contribui na Carnaval skirbiendo mi storia c’un pasion unico. Y asina demostra cu tur loke bo pone den bo mente bo por logra. Mi ta inclui hoben nan den tur nos actividad, mustrando cu nos, hobennan, ta responsabel pa e parti bunita aki di nos Cultura sigui bibo."
Ronchi lo ta bo diseñador pa Carnaval. Con e proceso di colaboracion a bay te cu awor, y con su diseño lo bay refleha bo estilo personal y e spirito di carnaval?
Guizza: "Despues di hopi aña Oompie Ron ta participa den Carnaval. P’ami algo super y un honor cu e kier bolbe p’ami y cumi. Su diseño lo refleha un parti, e bunita storia di Africa. Y e lo ta ami, e chispa di bida, simplemente Guizza. Mi a yora masha hopi mes di emocion e prome biaha cu mi a bisti e creacion unico aki. Danki Oompie."
Mirando mas leu di carnaval, kico ta bo aspiracionnan den e terenonan di baile, musica y modelahe?
Guizza: "Mi kier sigui traha cu mi Besties na Sonrisa. Un proyecto cu ta yega na mi curason. Desde e prome bishita 10 aña pasa, semper e persona special y vooral na Sonrisa ta den mi curason. Mi tin como meta y ta warda ansiosamente, pa haya un biaha mas, un invitacion pa participa na un workshop Internacional cu e mihor coreografonan di Baile na California, na April. Y mi ta bay un aña mas pa e premio di Arte di Palabra. Pa loke ta modelahe sigur mi kier yega e pasarela Internacional cu diseñadornan cu ya mi a conoce atravez di Art Fashion y Aruba Fashion Week."
Guizza: "E simpel oportunidad di por participa na Aruba su Carnaval ta fantastico y esaki ta demostra cu bo no mester laga bo soño bay djis pasobra otro ta pensa cu bo no ta na e lugar indica. Arubiano ta nos tur cu ta stima Aruba, ta stima su idioma y su tradicionan. Carnaval ta un fiesta popular pa mundo henter disfruta. Y ta dor di participa bo ta mantene Bibo. Mi ta stima Aruba y tur loke ta su Cultura y herencia mi ta haya unico y fascinante.”
Built with Shorthand