Inspira pa su role model, Audrey Hepburn, Gavriëla di 21 aña ta cla pa representa Aruba den e certamen di Miss Aruba, cu su caracter fuerte y spirito compasivo. Mas cu representa, e tin un mensahe profundo na tur cu kizas ta pensa cu nan no por logra algo cu si, tur cos ta posibel. Descubri mas di Gavriëla…
Pakico bo a inscribi pa MISS UNIVERSE ARUBA?
Desde cu mi ta corda mi tabata tin e deseo di participa den Miss Aruba, semper mi a admira e certamen di beyesa na unda e hende muhe por ta un muher poderoso cu tin e oportunidad pa cambia bida di hende den un aspecto positivo. Di chikito mi ta carga un pasion pa yuda cualkier persona rond di mi, si nan kier of no kier. E pasion aki por tin un impacto di transformacion si mi persona ta balor´e y kere den e “imposibel”, cu ta cambia mundo pa miho. Aki ta unda Miss Aruba ta drenta den e imagen y ta brinda e oportunidad pa mi, no solamente yuda esnan rond di mi, pero e pais y universo completo. E regalo di mas grandi ta pa obtene e oportunidad pa por pone den practica, e pasion di mi curason. Un stap grandi pa un hende muhe cu nunca a forma parti di e mundo di beyesa, pero cu a kere den e soño di su curason. Pa mi por motiva otro pa tuma accion y para pa lo cual nan ta kere, mi mes mester a tuma e paso ey prome.
Nombra 3 cualidad nan unico cu bo ta posee cu ta haci abo, e persona ideal pa representa Aruba riba un escenario internacional?
Pa por representa Aruba un persona mester kere den su pais y tin e deseo pa wak Aruba progresa. E tres cualidad cu mi persona ta posee ta cu mi tin e pasion pa e bienestar y progreso di Aruba y su hendenan , mi ta considera mi mes un persona optimista cu ta busca pa haya e solucion pa resolve un dilema y cu no ta core for di un situacion dificil pero ta enfrente. Ademas un caracter di curashi y fortalesa ta biba den mi y p’esey mi ta aki awe pa demostra e mundo cu si, Bo Por.
EXPERIENCIA DI BIDA
Conta un experiencia cu a formabo den e persona cu bo ta awe y con esaki ta motiva bo den bo participacion di e certamen di Miss Universe Aruba?
Durante mi adolescencia mi a pasa door di un etapa scur. Den e tempo aki mi a conoce kico e kiermen pa rindi y no sinti cu mi por sigui mas. E resultadonan tabata cu mi a isola mi mes di mundo y tur ser keri pa un temporada, mi a stop scol y no tabata tin autoestima. E tabata parce un situacion sin speransa, pero cu e ayudo di nos Creador mi a logra haya e luz bek. Awe mi por bisa cu recientemente mi a gradua y logra sali best geslaagde. Awor mi tin confiansa bek den mi mes y mi a siña stima y aprecia bida. Esaki ta mi experiencia y mi kier ta un ehempel pa tur esnan cu ta pasando den mesun situacion y bisa nan cu tin speransa y nunca GIVE UP.
Aruba ta conoci pa su atraccion turistico pero ta enfrenta desafionan a causa di e crecemento di turismo y construccion di hotelnan. Kico ta e pasonan cu abo ta kere cu mester keda tuma pa balansa crecemento economico y preservacion ambiental?
Pa nos stabilidad economico ta conoci caba cu nos como pais no por tin un pilar economico so cu ta turismo. Mi ta kere ta tempo pa cuminsa apoya negoshi y industria cu ta enfoca nan mes riba preservacion ambiental como un entrada mas pa e economia door di ahusta nos leynan cu ta apoya e inversionista nan cu ta inverti den proyectonan ecologico. Ademas e pilar turistico cu nos tin caba nos tin cu transforma esey den un cu ta sostenibel, por ehempel, hotel nan den renobashon mester cuminsa uza productonan ecologico den e architectura y diseño interior.
Den un era unda nos comprendemento y comprension di beyesa ta evoluciona, kico ta bo definicion di beyesa como un participante den un concurso di beyesa?
Beyesa di exterior ta subhetivo y p’esey ta importante pa desaroya bo mesun identidad pa logra wak y aprecia tur detaye cu ta formabo como persona y haci abo bunita. Beyesa ta consciencia propio cu ta balora tur locual ta defina abo y esey ta inclui bo experencia.
Built with Shorthand