Su mesun experiencia cu violencia domestico como mucha a hibe na compromete su mes na un bida como trahador social. Procedente for di St Lucia, Clementia ta bin di un famia di 7 yiu, na unda su tata tabata un alcoholico. “Como mucha mi no kier tabata na cas, pues di un edad hopi hoben mi a cuminsa haci actividadnan como scout y girl guide, pa ora mi tabatin 18 aña ya caba mi tabatin mi mesun grupo di muchanan bou mi guia”. Su prome estudio tabata como secretario y apenas terminando esaki el a fungi como secretario pa director di servicionan social. Den e funcion aki su pasion pa trabou social a desperta y el a priminti su mes c’un dia e mes lo bira e director di servicionan social.

Cu e edad di 26 aña el a bay studia como trahador social y el a haci e soño aki un realidad. Como un adulto el a dedica hopi di su tempo na Misa Catolico y asina a haya e oportunidad pa studia Missionary Catechesis na Pontificia University of Mater Ecclesiae na Roma. Bibando awor pa 14 aña na Aruba e ta un miembro activo di e parokia di Sta Anna. Su interes mas profundo ta pa contribui na un mundo na unda muchanan ta wordo protehi pa crece den un ambiente sigur y cu nan por sigui pa biba un bida cu nan por balora.

Na St Lucia, Clementia a pasa hopi trabou como director di servicionan social, pa convence autoridadnan di gobierno cu proteccion di mucha ta un prioridad nacional. Na varios ocasion el a wordo bisa cu servicionan social no ta yuda contribui na caha di gobierno. E realidad ta cu inverti den mucha y famia lo contribui grandemente na desaroyo economico den futuro.

“Asina mes mi argumentonan y strategianan pa purba convence nunca no tabata suficiente y mi a dicidi di emigra pa Aruba pa por haya mi PHD y duna les den Social Work and Development Program na Universidad di Aruba”. E estudio cu Clementia ta presenta awor ta su doctoral research hypothesis.

E estudio aki ta duna algun resultado hopi preocupante. Un di nan ta cu abuso fisico ta esun mas comun cu muchanan ta experencia na Aruba. 8 di cada 10 mucha a experencia abuso di un forma of otro. Di e muchanan cu ta experencia abuso, solamente 1 di cada 3 ta ricibi ayudo.

E muchanan aki NO ta disfruta di e 10 capacidadnan humano central pa desaroya di un forma sano y digno. E abuso cu e muchanan ta experencia tin consecuencianan hopi profundo a corto pero tambe a largo plazo pa nos comunidad.

Tambe tabata sorprendente pa lesa cu e area na unda muchanan ta experencia mas abuso na Aruba ta Oranjestad (22.9%) sigui pa Noord (22.2%) y despues Santa Cruz (10%). Abuso sexual den famia y negligencia tabata mas prevalecente den area di Santa Cruz. Mas ainda mi tin cu conclui cu lastimamente violencia structural ta den nos DNA, transmiti di un generacion pa otro y formando nos norma y balornan.

“Hopi mucha ta acudi na scol pa ayudo y pesey ta importante pa scolnan ta ekipa pa por trata cu esaki”. Clementia ta duna e sugerencia pa IPA aplica e Codigo di Proteccion den su curriculum. Tambe introduci Social and Emotional learning and Child Safety Education den curriculum di scol. Finalmente introcuci un School Social Worker na TUR scol.

“Den e estudio mi a conclui tambe cu hopi mucha ta acudi serca nan amigonan di scol pa confia nan den casonan di abuso y mi por imagina con pisa esaki ta pa muchanan cu sa e detayenan di e trauma cu nan amigo por ta pasando aden”.

Gobierno di su banda tin e rol di reconoce e problema serio aki y mira e relacion entre maltrato di mucha y Aruba su desaroyo social- economico den futuro.

Clementia ta conclui bisando cu nos tur mester ta cuidadanonan responsabel paso hopi caso no ta sali na claridad. “Si bo sa di casonan di abuso di cualkier forma, yama police of bureau sostenemi, keda yama te ora bo ta sigur cu un intervencion a tuma lugar”.


ENGLISH

TopBuilt with Shorthand