Ora Claudia Caralps Faro a cuminsa su proceso pa studia na Merca, el a topa hopi obstaculo, duda y falta di direccion. Pero den tur esey, el a haya un motibo tambe pa haci algo positivo cu esaki. Aki ta unda e inspiracion pa lanta un plataforma cu por sirbi como luz riba e caminda pa otro. E resultado? Beyond Aruba – un website forma for di experiencia real, cu ta guia y inspira hopi otro studiantenan Arubiano den nan propio aventura educativo.
Claudia Caralps Faro
Claudia Caralps Faro
Mi nomber ta Claudia Caralps Faro, y mi ta studiando actualmente Business c’un enfoke riba Finanzas na Valencia College na Florida. Aunke mi ta studiando den exterior, Aruba semper ta serca di mi curason, e ta cas, y tur loke mi ta haci ta cu e speransa di haci un impacto positivo eynan, sin importa con chikito.
Claudia Caralps Faro
Claudia Caralps Faro
Un tiki tocante mi; mi ta gusta biaha y conoce lugar nan nobo, mi ta gusta lesa buki, specialmente esunnan cu mi ruman ta recomenda, semper curioso pa siña algo nobo specialmente si e ta yudami crece personalmente of profesionalmente. Pero un di e cosnan mas grandi cu mi ta descubri desde cu mi a muda pa Merca ta cuanto mi ta disfruta di yuda otronan, particularmente otro studiantenan Rubiano cu ta considerando studia den exterior.
Claudia Caralps Faro
Claudia Caralps Faro
Beyond Aruba no tabata algo cu mi a plania pa añas, en realidad e la sali for di mi mesun experiencia di purba di saca afo con pa studia na Merca. Ora mi a cuminsa e proceso, mi a sinti mi completamente perdi. No tabatin un guia cla of ningun recurso local cu realmente a kibra esaki den paso a paso, specificamente pa studiantenan di Aruba. Cada pida di informacion cu mi a haya tabata mucho general of parti riba diferente website.
Mi mester a pone tur cos hunto a traves di hopi prueba y eror, oranan di investigacion, pidiendo yudansa, y siñando for di cada eror chikito na caminda. E tabata sinti overwhelming na momentonan, pero tambe el a pone mi realisa algo importante: si tabata luchando asina hopi, probablemente asina hopi otro studiante nan Rubiano prome cu mi a sinti.
Ta e ora ey e idea pa ‘Beyond Aruba’ a cuminsa forma. Mi tabata kier a crea un espacio caminda studiante manera ami por a haya informacion confiabel tur na un solo luga, for di scoge e scol corecto p’abo te na compronde proceso nan di Visa, haya apartamento, ahusta na un cultura nobo, y tur cos entre nan. Pero mas cu djis un website, mi tabata kier pa e sinti manera un sistema di sosten, un luga caminda studiantenan por sinti nan mes comodo haciendo pregunta y haya conseho di un hende cu tabata den nan sapato.
Ora mi a trece e idea dilanti na mi famia pa prome biaha, nan tabata super supportive manera semper. Mi ruman homber cu ta mucho mas tech savvy cu ami, a bisami cu mi tin dos opcion: contrata un hende pa construi e website p’ami of purba haci’e mi mes. Mi a puntr’e cla “Bo ta kere cu mi por haci’e mi mes?” y sin duda, el a bisa cu si. Esey tabata tur e push cu mi tabata mester. Si e tabata kere mi por, mi tabata sa cu mi lo por.
For di eynan, mi tin un note book cu mi a scirbi tur paso aden durante mi proceso, mi tabatin tur e informacion acumula. Den un siman pareu cu traha riba scol, paso pa paso, siñando segun cu mi tabata bay y calcula esaki pida pa pida mi a crea e website. Mirando bek, mi ta orguyoso cu mi a tuma e reto ey pasobra el a pone mi realisa cu mi ta capas di hopi mas cu mi a pensa.
Mi meta ta pa Beyond Aruba bira un go-to source pa futuro generacionnan di studiante Arubiano. Mi kier pa e ta e fuente cu studiantenan ta acudi na dje ora nan cuminsa plania nan biahe pa Merca, no solamente un website util, pero e prome lugar cu scolnan na Aruba ta recomenda ora studiantenan bisa cu nan kier studia na Merca. Mi kier traha cu scolnan na Aruba pa nan guia studiantenan directamente pa Beyond Aruba como nan punto di salida, haciendo sigur cu ningun hende no mester pasa door di e proceso aki nan so.
Despues cu mi gradua cu mi Associates Degree na December 2025, mi plan ta pa transferi pa un Universidad di cuater aña pa completa mi Bachelors Degree den Finanzas. A largo plaso, mi ta spera di haña experiencia di trabou na Merca prome cu eventualmente mi regresa Aruba pa contribui na e negoshi di construction y desaroyo di mi famia.
Na mes momento, mi kier sigui crece
Beyond Aruba, pasobra yuda otro studiante logra specialmente studiantenan di Aruba ta algu cu mi a bira realmente pasiona cune. Sea cu nan ta sigui e mesun caminda cu mi a sigui of scoge algo completamente diferente, mi kier pa Beyond Aruba ta un recordatorio cu no ta importa con leu bo bay, semper tin un comunidad na cas cla pa sostene bo.
Built with Shorthand