E miho cualidad cu nos hende muher mester tin ta entre otro optimismo, flexibilidad mental, humildad y gratitud.

Carlos Velasques

Carlos Velasques

Skirbi pa: Jacqueline Wernet

Semper mi  tabatin e vocacion di a scoge un profeshon unda mi lo por yuda y ta mas serca di otro persona, unda mi por a duna voorlichting y cu e mester ta den tereno di salud. Ora mi a caba Colegio Arubano, mi a opta pa no bay afor pero keda aki y studia MBO+ verpleegkundige conhunto cu hospital Aruba.  Debi na circumstancia di bida mi no ta eherciendo esaki pero sin sa cu Dios y bida tabata preparando mi pa  enfermera di mi mesun yiu. Studia enfermeria a duna mi e hermentnan necesario pa por compronde e proceso completo di mi yiu su diagnostico.

Mi ta un mama di 4 bunita ser, cual un di nan, Aïsha Melissa Grace, a nace cu mitar curason. Esaki a haci cu awe, mi ta mama y enfermera personal di mi propio yiu, desde dia cu el a nace te cu awor, yegando su di 5 aña. Mi ta y mi mi tin hopi rol nan cu mi mester eherce. Mi ta un muher disciplina, motiva y determina. Emprendedora y autentica. Mi bida a dal un buelta di 360°grado casi 5 aña pasa unda mi mester a siña di ta fuerte sin tin opcion. E caso di mi yiu a siña mi con, como ser humano, mama y muher, nos tin un forza masha grandi mes cu tin biaha nos mes no ta realisa, te ora algo insespera presenta riba bo caminda. Te cu awor, Aïsha Melissa Grace a haci 3 operacion di curason caba.

CON ABO TA INSPIRA

Mi ta rondona mi mes cu pensamentonan positivo. Mi ta gusta sigui otro muhernan riba social media y nan journey. Mi ta un persona cu ta admira hende muhernan cu ta idealista, perseverante y optimista. Mi ta pone hopi enfasis na tur rond di mi pa semper sigui lucha y pa semper ta humilde. Pa hamas rindi, no importa e situacion cu ta presenta.  Mi ta ripiti mi storia over and over pa realisa con bo por tin tur cos awe, y den un habri di wowo, bo mester adapta full bo bida na un situacion cu hamas bo por a spera.  Pero, ata mi aki, desaroyando mi mes como un futuro emprendedora cu ta luchando sin stop, pa crea di nos producto familiar, no solamente un producto pero nos alma, den un producto artesanal cu receta nan autentico. Pa esunan cu conoce mi sa con mi ta luchando incansabelmente pa esey. E producto aki a dunami, despues di Dios un speranza di ta serca di cumpli mi soño y sinti mi plenamente como un muher cu ta inspira.

Sa cu tur cos den bida ta pasa pa algo y ora algo no bay bon pensa cu no ta su tempo pero nunca kita bo wowo foi bo obhetivo.

KICO TA HACI ABO, UN MUHER CU TA INSPIRA?

Mi ta un muher luchadora y loke ta yuda bo hopi pa haya bo proposito personal ta siña cu hamas bo mester scucha foi e palabra nan aki “bo no ta bay logra” “bo no por”. Mi ta un muhe cu foi semper mi a siña duna otro hende compliment, esey ta haci un hende su dia. Mester por cu mas hende muher duna otro compliment, esey ainda mi ta sinti ta limita.

BALANS

Mi no ta eherciendo mi profeshon pa un compania pero mi ta eherciendo un di mi profeshon cu ta enfermeria pa e cuidado di mi mesun yiu, incluso mi sa cu na otro pais manera Merca, nan tin oportunidadnan di trabou cu por contrata bo manera un enfermera unda bo ta haya pago pa cuida bo mesun yiu ,si e mester un enfermera. Esaki lo ta algo cu lo ta bon pa presenta aki na Aruba. Mi ta emprediendo den mi mesun cushina cu mi receta nan di churros artesanal cu ta un idea cu a surgi y cu trials and errors. Manera un mama y trahando riba emprendimiento nobo, tin biaha e ta pisa y mi ta sigur hopi cu ta combina esaki, sa con frustante e por ta tin biaha. Pero tur trabou duro tin su fruto y lo ta bo recompensa na final. Semper pone limite di orario y ta valido pa dianan di descanso ta yuda pa no overload bo mes.

MOTIVA UN OTRO
Sa cu tur cos den bida ta pasa pa algo y ora algo no bay bon, pensa cu no ta su tempo pero nunca kita bo wowo for di bo obhetivo. Pensa riba solucionan. Pensa cu cabes friew y corda cu semper tur cos tin un solucion. Semper ta valido pa aserca un persona cu por inspira bo of cu bo ta admira pa un bon conseho sabio.

Manera nan ta bisa nos tur por tin un pida di e bolo.

Nos ta mas fuerte uni cu si nos ta contra otro.

ORGUYOSO LOGRO
Mi promer logro den mi bida a cuminsa ora mi a haña mi diplomanan y mi diferente reconocimiento nan. Un cu mi lo hiba pa semper den mi curazon cu a marca mi hopi ora cu mi a bira  e promer president di mi student council di mi sector Salubridad ora mi tabata studiando enfermeria. Esey a pone mi explora mi liderasgo unda mi a kibra mi mes un expectations.

BARERA

Ainda mester por tin mas durf di duna otro hende muher compliment. Y prehuicio ainda ta hungando un rol pa demotiva un hende muher. Nos mester mas flexibilidad mental unda cu nos por encurasha nos hende muher mas envez kibra nan mas.

UN OTRO MUHER CU TA INSPIRA BO

Jennifer van der Biezen mi ta sigur cu e sa cu e ta un gran motivacion pa hopi. Toevallig e ta un ex-klasgenoot  y mi sa con su personalidad spontaneo y positivo semper a forma parti di dje. Ainda mi no a forma parti di su cursonan sorprendente cu e tin pero mi ta sigui su pagina y e semper tin e palabranan corecto na e momentonan corecto. Admirabel den tur sentido. Y asina mi por menciona hopi hende muher cu ta admirabel y motivador den nos cumidad cu durante aña nan ta birando mas y mas.

CONSEHO

Nunca rindi  y semper sigui pusha. Semper manisfesta  bo propositonan y traha duro pa loke bo kier y sigur bo lo logra.

MUHERNAN NA ARUBA

Mas y mas hende muher tin un rol importante den nos cumidad. Tin mas muher lider den nos comunidad. Durante e ultimo añanan, hopi ta e muhernan emprendedora cu a sa di motiva hopi otro hende muher pa sali dilanti of pa traha hunto, den beniestar di otro. 

TopBuilt with Shorthand