Chris Kross ta un figura conoci, un guitarista, compositor, y productor destaca. Di su inicio trempan tocando den bandanan y evento nan local na edad di 16 aña, te na su estudio na e prestigioso Berklee College of Music, gradua Cum Laude y awor, fundador di su propio empresa, Elevate Productions. Awor Chris a tuma un paso cu tin un mision importante, eleva musica bek na Aruba unda nos talentonan local por haya oportunidad pa demostra nan abilidad bek ‘live’ na tur oido.

1. Comparti un tiki riba bo trayecto?
Mi a cuminsa cu musica profesionalmente cu mi 16 aña. Mi a cuminsa tocando den banda y tambe como musico na diferente evento mi so y duo. Asina mi a gana hopi experiencia den hopi genero. Esaki nan tur a pasa prome cu mi a bay studia afo y tambe mi tabata atende lesnan na Arubaanse Muziek school. Pa despues sigui na Boston, di cual na aña 2019 mi a gradua na Berklee College of Music. Mi a bolbe Aruba y lanta Elevate Productions. Alavez por menciona cu e aña aki mi a gradua mi master den Music Education.

2. Kico tabata e impacto di bo estudio na Berklee College of Music den bo formacion como musico?
Berklee tabata e impacto di mas grandi academicamente pa mi carera. Combinacion di e parti academico y tambe pa forma mi como un profesional den hopi area, mirando cu muziek ta asina amplio. Na Berklee tambe mi a haya hopi conneccion cu otro artista nan internacional, por ehempel Paquito D’Rivera, Berta Rojas y hopi otro ganador nan di Grammy. Tambe mi a logra graba c’un sinfonia, cual ta algo hopi dificil pa haci.

3. Kico ta e inspirashon inicial tras di Elevate Productions?
E idea pa crea Elevate Production tabata pa bin c’un booking agency. Uno cu lo ta hopi innovativo y keda reta nos mes den e area artistico. P’esey e nomber. Mi a lanta e compania durante Covid, cu tabata un reto grandi caba pero mi a haci uzo di e tempo aki pa mi elabora mi mes den logistica di un compania y cu awe mi por ta creciendo cada dia mas.

4. Cua ta e tipo di artistanan cu por ‘book’ via Elevate Productions?
Nos ta traha cu varios artista. Mi tin un catalogo di diferente di artista basa riba edad, genero y mas. Pero mas importante nos ta traha cu loke e cliente ta desea. Y nos ta make it happen cu teamwork.


5. Con Elevate Productions ta sobresali y kico ta haci bo ‘approach’ diferente?
Loke ta laga Elevate sobresali ta e parti di e ‘extra mile’, innovacion, disciplina, servicio di cliente y training cu nos ta brinda na tur cu ta afilia na nos.


6. Den bo mesun palabranan, kico ta e mision di Elevate Productions?
E mision di Elevate Productions ta pa brinda un ‘entertainment’ di excelencia. Nos ta logrando esaki cu bon comunicacion cu team, training pa desaroyo personal y musical.

7. Hopi biaha tin e discusion di e mesun musiconan local riba e proceso dificil y/of complica pa haya trabou pa ‘perform’ y/of c’un pago husto mara na esaki. Bo pensamentonan riba esaki?


Mi mes sa scucha hopi discusion tocante e pago y trabou, local mi por bisa ta cu esnan cu ta trahando cu nos a expresa cu nan ta satisfecho cu e pago cu nan ta haya. P’ami personalmente esaki ta algo hopi importante y mi ta na haltura di e pago nan cu ta wordo haci rond. Pa Elevate e pago no ta solamente loke nan merece pa e trabou, pero mirando e trabou cu nan ta duna. Unda nan ta brinda e miho di nan y ta semper atento. Nan merece un bon compensacion.


8. Pakico sostene talento local?


E ta algo hopi importante! Pakico? Nos den e industria creativo ta e identidad di e pais. Imaginabo cu ora un turista bin Aruba, nan lo kier mira ken y kico ta Aruba. Y arte ta e miho manera pa expresa esaki.

9. Kico ta diferencia di musica ‘live’?


Awendia poco ta e biaha cu bo ta haya un banda completamente “live”. Mi no tin nada contra di esey, mi ta pensa si, cu si ta posibel y no tin nada miho cu musica “live”. Mi ta compronde si cu pa falta di integrante, instrumento of presupuesto ta haci cu tin ora esaki no ta posibel. Musica “live” ta keda miho paso e ta duna e musica bida, haci’e interactivo y hinca e emocion aden y esaki ta parti di musica.

10. Futuro pa Elevate Productions?
Pa nos keda un booking agency y tambe pa keda innova. Trece cosnan nobo, servicio nobo y keda crece. Nunca para. Esaki ta conta p’ami mes como musico pa keda crea proyecto nan nobo. Y crece y evoluciona musica na Aruba. Pa mira cambio den e hobennan, cuminsa traha mas riba banda nan y no solamente como solista. Tambe mi lo kier mira mas banda wordo funda den diferente constelacion y diferente genero.


ENGLISH

TopBuilt with Shorthand