Un muher multifacetico cu ta encarna e spiritu di biba bida te na e maximo, siguiendo su conviccion cu mester persigui tur loke bo curason desea, tanten cu bo ta disfruta, keda humilde y amabel. 

Biba !

Gassant Photography

Gassant Photography

Skirbi pa: Jacqueline Wernet

CUALIDADNAN 
Ta un persona culto y bon informa, un hende di tur hende, ta humilde sa scucha y respeta grandi y chikito, no discrimina. 

Mi ta stima bida y hende, y ta encanta retonan e rush di adrenalina ey ta ponemi sinti bon y satisfecho cu mi mes. Yama mi ‘hyper’. Mi ta considera mi mes un muher c’un caracter fuerte pero flexibel, sensibel y alegre. Mi ta gusta combersa, comparti, scucha y mi ta un bon amiga. Mi t’ey semper pa mi famia y mi amigonan dedica y mi ta bay e extra mile pa nan. Extroverti, generoso, critico y franco…’down to earth, what you see is what you get’.  Mi ta leal , mi ta gusta paz, naturaleza, aventura , harmonia y husticia mi ta kere den humanidad. Mi ta un boluntario di curason, semper, cla pa yuda.

INSPIRACION
Mi inspiracion semper tabata mi mayornan cada un den nan forma. Ambos trahado, cumplido, cu perseverancia y cu e obhetivo pa ta The Best You can be y mi yiunan. For di mucha mi tabata curioso pa sa con comunicacion verbal tabata hinca den otro y con hende por a pensa y papia  y mi a studia Fonoaudiologia(Logopedie). Di Logopedista pa presentado na television, pa comunicador, otro reto tabata pa bay den e area di medicina/mercadeo y benta como visitador medico atrobe studia y traha. Sin laga e mundo di television atras. Reto tabata pa keda cu pia riba tera sin bay tras di e popularidad cu ta un aspecto momentaneo di e trabao na TV. Despues comunicador na SVb y awor otro reto miembro di directiva di Musica y di SMAC. Deal cu hopi critica pero manera mi a bisa un amiga dimi cu a puntrami: Cher e ta bale la pena? Mi a bise …si pasobra un hende tin cu haci’e y pasobra mi ta kere cu nos y ami por. Complace tur hende nunca ta posibel pero si ta posibel pa haci bo maximo esfuerzo pa haci tur cos na beneficio di nos comunidad y di nos hendenan. No lubida cu mi ta un carnavalista di curason.

CON ABO TA INSPIRA?
Mi ta un persona positivo y cu semper ta kere c’un logro ta posibel basta haci esfuerzo, ta dedica y ta enfoca. Importante biba contento.

MOTIVA UN OTRO
Traha riba e aspecto emocional prome. Ta sigur cu emocionalmente bo ta suficientemente fuerte pa enfrenta decisionnan cu bo mester bay tuma. Planea bo bida visualisa unda y con bo lo cana. Busca ayudo si mester ,esaki por tuma su tempo pero ta haci bo mas fuerte al fin alcabo, nos ta humano y nos estado mental mester ta balansa y fuerte esaki ta e base pa enfrenta bida.

ORGUYOSO LOGRO
Di por a bolter di ta un Logopedista pa transforma den un comunicador. Di ta un bon Mama. Di ta capaz di pordona y let go y no di no keda carga situacionnan cu mi no por remedia esey ta dunami trankilidad y paz mental.

Balans no ta facil, tin ora mi mes tin e tendencia di inclina pa ta demasiado ocupa y lubida mi mes un tiki. Pero e bon cos ta cu un persona mester sa scucha su curpa y esnan rond di dje, wak pabo cumpli cu bo to do list. Conoce bo curpa y cuanto bo por exigi di dje y di bo famia, saca tempo pa bo mes. Ta ok pa bisa no ora cu trabao ta bira di mas. Break haci ehercicio, haci algo cu bo ta gusta haci dedica tempo na bo mes pa relaha sinti cu bo merece esaki y break. Stima bo mes.

KICO TA HACI ABO, UN MUHER CU TA INSPIRA?

Hahaha esaki ta un bon! Mi ta kere cu mi ta wak semper e bon den tur cos, mi ta sincero  y bondadoso. Y mi ta hopi directo y ta semper dispuesto pa yuda y duna conseho.

BENEFICIO

Muhernan cu ta inspira ta bira rolemodel pa hobennan y ta yuda nan kere den nan mes y ta guía nan pa logra nan soñonan. Nan ta influencia nan famia, nan amistadnan ta duna conseho, nan ta incentiva y ta guía organisacionnan y gruponan pa traha y logra cosnan bunita pa nan prohimo.

Loke bo man drechi haci bo man robes no mester sa"

BARERA

E falta di kere den nos hende muher (y hombernan esaki ta conta pa e hende homber tambe). Mi ta kere cu nos por logra hunto hopi mas  si nos comunidad por duna mas critica constructivo. Si nos puntra prome cu papia, si nos por scucha prome cu zundra, si nos busca e berdad prome cu asumi, si nos ta menos sensacionalista. Si nos ta mas sincero y duna tur hende e mesun oportunidad pa briya. Si nos ta mas uni, e hende muher cu su cualidadnan di lider lo ta mas dispuesto pa ta eyfo pero ta nos mesun negativismo como comunidad por tranca of por influencia un persona pa keda den su bubbel pa no wordo intimida, molestia of ofendi.

SOLIDARIDAD, CON?

Accepta cu semper lo tin muhernan cu mas of menos capacidad, cu mas of menos carisma, cu mas of menos vision, educacion, pasion etc pero cu cada un di nos ta unico y special na nos manera y cu nos t'ey pa complementa otro. No wak kico abo tin menos of mas, wak con abo hunto cu ne por logra mas.

UN OTRO MUHER CU TA INSPIRA BO

Ami ta gusta hende. Den mi famia mes mi tin rolemodels  y den mi amiganan y amistadnan cu ta hopi tambe. Mi no ta kere cu mi por menciona un solo persona. Ami ta scoge semper e aspecto positivo di un persona pa ta e injeccion di positivismo, inteligencia, sabiduria, pasion  y of curashi pa ta mi inspiracion. Na Aruba nos tin hopi hende muher cu ta inspira otro pero hopi biaha nos no ta conciente ni ta duna nan e credito cu nan merece.

CONSEHO:
Nunca descurasha, si bo mester cuminsa di nobo djis haci esaki. Ta habri pa siña, scoge profesionalnan cu por guia bo y scucha di esnan cu a logra pa haya sa con nan a haci esaki, nada no ta cay di shelo, bo tin cu traha p’e. Sea cumplido pa otronan cumpli cu bo. Kere den bo mes y si algo no ta sinti bon no haci’e, aunque cu tuma riesgo ta parti ci bida pensa prome cu actua of papia...

MUHERNAN NA ARUBA

Nos ta riba bon caminda pero nos no a yega ainda. Mi ta kere cu esaki ta debi cu nos hende muhernan mes ta fomenta e machismo y ta demasiado dependiente di e ser masculino. Nos mester complementa otro. Mi no ta kere cu pasobra e hende homber ta fisicamente mas fuerte esaki automaticamente ta haci cu e tin mas derecho. Cada genero tin su aspecto individual pero si ta importante pa nos ta consiente cu ta inacceptabel cu dos persona un hombr y un muher, ta haci e mesun trabao y tin diferencia den salario. Of cu cierto posicion gerencial no por keda ocupa pa e ser femenino. 

UN MOMENTO INOLVIDABEL DI INSPIRACION
Den mi añanan como Logopedista, mi a conoce un famia cu ta tin 3 yiu, tur 3 cu problema di oido. Mi tabata Terapista di nan tur 3 y a yudanan cu terapia y aparatonan di oido y te ainda e mama ta yama mi danki cada biaha cu mi top’e. Y tambe cu hopi satisfaccion mi por bisa cu mi ta un di e fundadornan di Quota International Service Club cu traha riba concientisacion di perdida di oido for di 1987. E casonan cu ta keda marca sin embargo ta e añanan cu mi tabata miembro di directiva di Fundacion Respeta Mi y e añanan cu mi a traha como Logopedista na scol, mi no por amplia riba e casonan aki door di mi zwijgplicht cu mi profesion.

INSPIRA NOS MUCHANAN
Lo mi tin cu comparti loke ami a lanta cune: Semper haci bon no envidia otro semper lo tin hende cu tin mas of menos cubo, ta sincero. Nunca discrimina raza ni religion, yuda otro no kibra otro. Nos yiunan mester wordo lanta cu e bon ehempel di wak y haci mescos, nos ta nan spiel, nos tin cu mustranan cu riba mundo nos tin un mision pa cumpli cune, esey ta pa biba apoyando otro y corigiendo otro. Si algo no ta bon durf di bisa cu e no ta bon y mustra con por mihor. Siña nos yiu muhernan cu educacion ta importante pa por ta independiente, siña nan, nan derecho pero tambe nan deber. Respeta pa haya respet y no lubida di stima bo prohimo. Keda humilde, keda siña, comparti pero vocifera semper bo pensamento y ta empatico. Bida no ta facil pero semper ta orguyuso di bo trabao y di ken bo ta. 

TopBuilt with Shorthand