Y ora bo a kere cu creacionnan unico y nobo no por sali di e suela di Aruba, ta topa cu Cherry Ras, un mama balente y visionario, cu a crea un negoshi nobo di te, di e yerba di Toronjil. Conoci pa su componentenan aromatico y abilidad di combati e.o. ansiedad, insomnia y indigestion y crea calmo, esaki a duna Cherry e idea pa crea algo unico na Aruba. E idea e tabata sigur di dje, loke e tabatin mester ta e hermentnan. Y esaki ta loke el a haci tambe. Como un persona cu semper gusta siña cosnan nobo y cu e lesnan di bida cu el a haya semper di su tata pa haci cu pasion tur loke e pone su cabes na dje, el a pone man na obra. Y ta precisamente den e proceso aki cu Cherry su caminda a crusa cu Qredits su programa di Agribusiness Academy haciendo ARUBA TEA COMPANY cambia di un simpel idea, pa un realidad! Esaki ta su storia…
PROME CU TUR COS…E PERSONA
“Ami ta Cherry Ras, un mama di tres yiu cu mi ta yama mi tres bendicion, pasobra di berdad nan ta un bendicion, den tur sentido. Mi ta hopi honra di ta nan mama. Como mama divorcia no tabata facil, pero tur obstaculo di bida t’ey pa haci bo fuerte. Awendia mi no ta mira problema como un problema, sino mas bien como un reto nobo pa enfrenta. C’un mente positivo mi ta experiencia cosnan positivo so y mi tin dushi hendenan cu energia bunita mes rond di mi. Mi ta hopi bendiciona mes di tin mi famia unda cu nos tur ta hopi creativo mes den nos mes estilo.
UN EMPRESARIO AGRICULTOR
“Mi tabata mester a manda toronjil den exterior y e tempo ey mi no tabata sa con pa mand’e y aki mi a bin topa cu e mundo di te. Asina mi pasion pa converti nos matanan di tera den te, a nace. Asina mi biahe como agricultor a cuminsa”. Prome paso cu Cherry a tuma ta sigui un curso di Agricultor na Santa Rosa. E cursonan tabata di Agripreneur, Good Agriculture Practices y di Agribusiness. Di eynan el a cuminsa cu su proceso cu ta cuminsa cu e mata cu e mes ta planta, despues e ta cambie den te y finalmente, paketa esaki pa despues pone pa bende. E negoshi tabata bon pero sin cu e mes por a spera, cu pandemia, cosnan malo a bin, pero tambe cosnan bon, manera e demanda grandi pa yerbanan manera pa moringa y toronjil. Aki ta unda Cherry a realisa cu su proceso di paketa, no tabata liher suficiente. “Esaki ta e motivacion cu a pone mi realisa cu mi mester bay en busca di un mashine pa paketa. Mi a mira cu Qredits tabatin e curso di Agribusiness…y mi a bay p’e.”
E oportunidad di por a siña con pa amplia y maneha su negoshi den e forma corecto ta un balor agrega na e exito cu awe Cherry tin tras di su compania di Aruba Tea Company. “Mi a siña con mi por hinca un business plan den otro y factornan cu mi mester tene cuenta cu n’e. Nos a haya informacionnan balioso di KvK, Departamento di Impuesto, di Santa Rosa, y ultimo di otro agricultornan cu ya tin nan negoshi . Nos a bishita otro negoshinan tambe y mester bisa cu mi a sinti hopi orguyoso mes di wak nan productonan cu ta produci aki mes na Aruba. Nos por hopi cos nos mes. Trahamento hunto ta hopi importante y e balor duna na e importancia di tin un sustainable product. Un bon presupuesto y maneha bo placa corectamente, ta di hopi importancia. Con ta mercadea bo producto, tur esaki ta parti di curso cu Qredits a duna nos.”
Kico AGRIBusiness Academy ta p’abo?
AgriBusiness Academy ta unda bo ta siña cu como agricultor bo ta bay haci negoshi di loke bo ta produci. Simpel bisa traha placa consciente di loke bo ta produci. Mi a uza e palabra consciente pasobra ta di hopi importancia pa tin un bon planning, mester ta bon organisa, bon maneho di placa, controla loke bo tin, evalua bo plan, importancia di networking, bo marketing y bo vision. Tur ta aspectonan di suma importancia cu e curso aki a siñami.”
E programa aki a impactami hopi mes y riba varios tereno. Mi ta sinti hopi agradecido mes pa e oportunidad aki cu Qredits ta duna nos. Mi tin e honor di a sigui e curso aki c’un grupo dushi mes di hendenan cu mi tin hopi admiracion pa cada un di nan. Sin lubida nos docente cu a duna e curso. E tin un energia sumamente positivo cu ta motivabo pa sigui.
E programa aki ta di sumo importancia pa Aruba. Pa di prome tur hende cu ta den e sector primario aki ta para riba mesun liña pa ora ta trata di lanta nan mesun negoshi. Networking ta hopi importante. Bo ta sinti mas balor y aprecio di nos mes productonan local. Bo sa kico tur nan a pasa aden pa por a yega na e producto final. Bo ta contribui y coopera mas lihe pa ora ta trata di cumpra un producto local. Importancia di tin un producto sostenibel ta bon pa nos tur cu ta biba riba e isla aki.
E ta lagabo mira oportunidadnan. Lo bo ripara cu no tin lugar pa competi cu otro pero COMPARTI cu otro, apoya otro, eleva otro, aprecia y educa otro. Mi ta sinti hopi orguyoso mes di nos tur cu a haci tur esaki posibel. Danki grandi di curason.
Built with Shorthand