Den hopi cas, e bida ta mandabo un solo direccion. Pa Arianne Westerburger, bida a hib’e riba mas c’un caminda. Ballet, canto, futbol, y finalmente coaching, cada un di su pasonan a guia su ruta, pero nunca a limita su destino.
Su amor pa deporte? Ta den su sanger. Su welonan a hunga futbol pa RCA y a gana Copa Antiyas pa Aruba na 1962. Lanta den un ambiente deportivo, su ruman tambe a hunga, y Arianne mes a crece mane club, mane cancha, mane ritmo.
Aunke el a cuminsa den canto y baile, su pasion pa futbol tabata domina. “Drentando den mi adolescencia y estando constantemente na Club di RCA den mi grupo di amiga nan, nos a keda aserca pa e conocido mr. Eric Gomez, pa lanta e ekipo di futbol di damas pa RCA y haci esaki hunto cu mi amistad nan di mas serca di cas. P’ami e tabata ideal y mi por bisa cu di eynan mi amor y disciplina pa e deporte a crece tambe.”
Arianne Westerburger
Arianne Westerburger
Arianne ta coach pa grupo U13 y U15. Como coach, su estilo ta adapta segun e nivel y edad di e muchanan. P’e, logra gana ta hopi bon, pero crecemento ta prioridad.
Su experiencia como ex-hungador di seleccion nacional a forma su liderazgo. Di e presion, e desilusion nan y e victorianan, asina el a siña con pa guia, motiva y crea trabou di grupo y resiliencia.
“Mi formacion general tanto den deporte como na nivel personal a yuda mi desaroya un manera di pensa mas strategico, comunicativo y empatico. Esaki ta esencial como coach, pasobra mi mester compronde cada hungador individualmente, motiva nan y adapta mi strategia pa logra e mihor resultadonan pa e team.”
Bo ta coach y trahando fulltime. Con bo ta logra balansa bida personal, famia y compromiso den deporte?
“Si, mi ta coach banda di esaki mi tin un trabou fulltime, pero e clave pa logra un balans saludabel ta structura y planificacion. Mi ta mama di dos yiu, for di cual uno ta un atleta di futbol tambe. E combinacion di rolnan di mama, eherce mi trabou na Setar, coach, cantante y doño di un small business ta sin duda desafiante, pero mi ta pone hopi enfasis riba un draaiboek diario estricto. Asina mi por planifica e momento nan importante pa mi famia, mi trabou, mi pasion pa canto y mi compromiso cu deporte. Aunke e ta exigi hopi disciplina y sacrificio, e satisfaccion cu e ta trece cune ta grandi."
Arianne
Arianne
Como coach muher den futbol masculino, Arianne a confronta duda, resistencia y desconfiansa. No semper ta facil pa un muher keda tuma na serio den un deporte historicamente masculino. Pero su energia, disciplina y e resultado di su team, ta papia pa su mes.
Na nivel di RCA, el a tuma rol den bestuur como secretaria, pero su curason tabata den cancha. “Mi ta hopi satisfecho y orguyoso di e forma con nos (bestuur) a traha hunto pa reformacion y cambionan importante cu a keda haci den tempo corto na beneficio di nos farmsystem.” El a drenta campo pa guia directo e mucha hombernan den disciplina, esfuerzo y confiansa.
Mas muhernan den deporte?
“Si, pero, claro, e caminda ta largo ainda jena di desafionan cu ainda ta visibel, manera falta di apoyo, duda di capacidad of falta di representacion na nivel mas halto. Pero diferente for di antes, nos ta mira mas interes” Arianne ta sinti cu e mentalidad ta cambiando. Mucha muhernan ta tribi mas pa drenta futbol. Arianne ta mira cu e damita nan no ta mira como un excepcion sino como pilar den team. Aunke falta representacion, apoyo y visibilidad, e cambio ta presente.
Un anecdota:
“Mi ta kere algo cu mi no lo lubida nunca y cu ta keda ripiti su mes ta cu tur cuminsamento di temporada nobo, mi mester a gana no solamente confiansa pero tambe respet di e mucha homber nan. Ora nan experiencia mi forma di duna traininng specialmente nos preparacion fisico ,sea na lama, hooiberg of gym, mi no ta nan favorito pero al final ora tur e training duro y sacrificionan aki duna resultado durante campeonato, mi a gana tur confiansa y e mas importante p’ami nan cariño y respet.”
Arianne no ta solamente riba cancha. El ta tambe narador di partidonan deportivo na radio y television. Cu voz fuerte pero empatico, e ta duna claridad, humor y contexto. Realmente, Arianne a crece den mundo di radio y TV for di hopi hoben y esaki ta haci cu e ta sinti natural, pero como comentarista di futbol, e ta tuma su preparacion serio pa por comenta cada partido bon.
Pa Arianne, naracion ta mas dificil cu coach, pasobra e tin cu keda preciso, profesional y informativo. Pero ambos ta un oportunidad pa duna ehempel, forma pensamentonan y trece pasion na bida.
Arianne y Devin ta un duo unico. Nan dinamica ta natural, complementario, y yena di respeto.
Arianne ta admira Devin su disciplina y entrega, y ta mira nan rol como parte di un cambio mas grandi.
E impacto cu deporte tin riba nos comunidad ta inmenso, segun Arianne. E ta uni hende, forma caracter, y trece salud mental y fisico. E lo gusta mira un centro deportivo di nivel mundial, accessibel pa tur bario, cu coach, psicologo, nutricionista y mas.
E ta spera cu mama hoben sinti cu nan por. Cu deporte, e por duna nan yiu un fundeshi di disciplina, union y speransa.
Pa mucha muhernan cu tin duda?
"Bay p’e sin miedo. Bo unico limitacion ta bo mes."
Un frase of motto cu bo ta kere aden?
“Trust the process” es decir kere firmemente den e proceso.
Mensahe
"Si un mucha muhe lesa esaki y pensa: ‘si nan por, mi tambe por’... ya mi obhetivo ta logra."
Built with Shorthand