E inspirante storia di Antoniette, e prome GZ-psicologo den e area Caribense cu a lucha pa logra su soño. Esaki ta su trayectoria y desafionan enfrenta hunto cu su perspectiva riba e importancia di kibra e taboo di salud mental na Aruba.
Antoniette a crece cu 1 soño: bira Psicologo.
E reto tabata grandi, pero na su 17 aña, el a bay Hulanda pa studia y a logra su propedeuse den su prome aña na HBO Hogeschool Utrecht. “Na inicio, mi mes no a kere cu mi soño di bira psicologo lo tabata posibel como cu mi tabata lucha pa caba mi HAVO na Colegio Arubano.” Sinembargo, cu e logro di su propedeuse, e porta a habri pa Antoniette por sigui su educacion riba nivel universitario. Na 2012, el a gradua for di Universiteit Utrecht; su soño a bira realidad pero apesar cu e no por a keda Hulanda, e tabata sa cu e no tabata cla. Antoniette a bolbe Aruba cu mas reto nan pa enfrenta.
Antoniette a bolbe Aruba despues di studia na Hulanda, no pasobra e tabata kier, pero pasobra e no por a haya trabou na Hulanda. E tabata planea di traha algun aña na Aruba y despues bay Hulanda atrobe. Pero finalmente, el a dicidi di keda na Aruba. E ta comprende e dificultad di bin bek bo isla ora cu e posibilidad nan pa ‘young professionals’ ta limita. Pero e tin un mensahe hopi importante pa comparti cu nos comunidad via su storia. “Na final mi a dicidi di keda Aruba y mi meta, keto bay, ta pa crea locual cu mi ta sinti cu falta. Soñonan sa bira realidad, toch? Dus “manos a la obra”. Asina ta cu incentiva pa por motiva nos ‘young professionals’ bolbe cas ta importante!. Awor mi tin 11 aña trahando den e ramo di Psicologia. Hunto cu mi pareha, nos tin un yiu di 6 aña. Na 2022 mi a gradua como prome GZP- Psycholoog cu a studia esaki den area Caribense. Den mi trayecto laboral mi a traha na EPB-scholen y despues na Respaldo. Cu awa na wowo, dia prome di Januari 2023, mi a dicidi di bay traha priva y habri mi mesun practica di psicologia cu yama Psyched Aruba.
KIBRANDO E TABOO DI SALUD MENTAL NA ARUBA
Salud mental ainda ta un taboo na Aruba, y esaki ta algo cu Antoniette kier cambia." Mi tin cliente cu ta scoge pa no conta nan famia cu nan ta hayando tratamento, pa miedo cu nan lo wordo mira como loco. Esaki ta straña mi, pasobra si bo pia ta kibra of si bo ta malo, bo ta bay dokter, pakico no busca ayudo pa bo salud mental? Un diferencia cu mi ta mira ta cu hoben nan di awendia mas y mas ta sali puntra nan mayornan cu nan kier ayudo y kier papia c’un hende. E ‘rise of TikTok’ ta yudando inmensamente pa kibra stigma y taboo tocante salud mental.”
NO TA TUR HENDE POR YAMA SU MESUN UN PSICOLOGO
Antoniette ta mira e importancia pa proteha e titulo di un psicologo, algo cu no ta posibel na Aruba. Den e area di psicologia lamentablemente, e tituto di psicologo no ta protehi. Cualkier hende por yama su mes psicologo. Pa por ofrece e cliente un bista riba calidad nos ta mira por ehempel na Hulanda e BIG-register caminda cu e titulonan eyden manera e GZ-psicologo of e Klinisch Psycholoog ta titulonan protegi."
E CAMINDA DI CRUZ PA AYUDO PROFESIONAL SPECIALISA
“Na Aruba, ainda tin dificultad pa haya ayudo profesional specialisa. Sigur despues di COVID-19 nos por a mira un ‘vraag’ mas grandi pa ayudo psicologico, cu ta surpasa e ‘aanbod’ cu tin.” Antoniette ta compara esaki c’un ring di boxeo, caminda bo ta hayabo den un lucha constante. "Pa ora cu bo durf di busca ayudo, bo ta hayabo manera den ring di boxeo, den un skina di e ring tin wachtlijst enorme ta sali punch bo. Benta abou bo ta mira bo coach, bo seguro basico, cu serbete blanco den man. E referee ta count down 10, 9, 8, AZV+ pa ambtenaar y gelijkgestelden so ta cover costo parcial, 7, 6, 5, Aruba no tin ayudo psicologico den basispakket, 4, 3, 2, one Happy Island." E ta spera cu lo tin mas cobertura di seguro pa sesionnan psicologico na Aruba den futuro. “Leu aya toch un luz na final di e tunnel. Ki bunita e ta pa mira con cierto companianan particular ta provee nan trahadornan cu un seguro cu ta cubri sesion psicologico. Caminda e trahado, su casa y yiunan, cada aña, por haci uzo di servicionan priva, servicionan importante pa salud mental. Petje af!
Kico por spera di bo columnanan den Xclusivo Magazine?
"Esaki ta e era di consolida informacion. Na punta di bo dede bo por haya cualkier informacion, tecnologia AI ta dominando e escena, content creators cu ta hacibo curioso ta esnan cu mas tanto ta reach hende. Mi ta spera di por haci e miembronan di Xclusivo curioso cu mi topiconan tocante salud mental. Den e proceso kisas conscientisa nos comunidad, kibra stigma y motiva politica y leynan cu ta facilita acceso na ayudo pa salud mental. Mi no ta pidi hopi, simplemente soñando un tiki mas. Y soño sa bira realidad.
Built with Shorthand