Si nos kier, nos por. Sea prepara. Y nos tur por yuda un otro semper.

Gassant Photography

Gassant Photography

Skirbi pa: Jacqueline Wernet

Nan mester kere den nan mes, pero tambe nan mester sinti y reconoce cu tin un  necesidad cu nan por yuda cu ne.  Si nan kier nan por. Ora nos pensa cu nos no por, ya nos a stroba nos mes caba. Pensa cu mi no por, mi no tin tempo etc, nunca no por. Traha tempo y kier yuda. Y no worry pa haya danki, paso esey por tarda of kizas nunca pasa mes.

Mi ta un persona simpel, casa, mama di dos yiu, cu te kere masha hopi mes den duna bek na nos comunidad. Mi ta kere e hopi den haci tur cos e miho cu por y semper mi ta haci tur cos cu hopi pasion.  Sea ta trabou, bida, deporte, hobby, haci tur cos cu dedicacion y pasion. Y corda cu semper nos por yuda un otro, no biba pa bo so y bo famia, pero habri bo halanan pa proteha y yuda un otro cu mester di esaki, fuera di bo mes un famia. Semper por,  paso eyfo tin un hende cu mester di bo atencion, yudanza of empuhe.  Y nunca haci  nada pa show, haci’e di curazon.

INSPIRACION

Padvinderij ta mi manera di duna bek na nos pais/nos comunidad. Mi a join padvinderij or ami tabatin 6 aña, paso mi tabata un mucha hopi insigur y verlegen y poco social, e tempo aya, no tabatin e cuestion di bay un psycholoog of zo, asina facil, ta padvinderij tabata e actividad cu mayornan tabata usa pa nan yiunan siña mas disciplina, siña di naturalesa, haya mas amistad y siña kere den nan mas. Y esey a pasa cumi, y nunca mas mi a sali di padvinderij  tampoco. Semper tin reto ora bo ta traha cu hende, no tur ora bo ta eens cu otro, pero mester yega na un consensus.  Tambe haci trabou voluntario tur siman, ora yiunan ta chikito tambe ta dificil pero si bo pareha ta steun bo den esaki, eta bay hopi facil mes. Y trahando na CMB, cu ta un compania cu ta aplaudi  y ta encurasha su empleadonan pa haci trabou voluntario y yuda den comunidad, a yuda motivami mas ainda

CON ABO TA INSPIRA

Mi no ta kere cu nos ta enfoka pa inspira otro as such, pero serca mi, mi ta kere cu e ta e dedicacion y e energia cu mi ta hinka den tur locual mi ta haci,  lo ta inspira otro. Den padvinderij , e atencion pa cada un di nos muchanan, tambe segun mi ta inspira e muchanan.  Y ora nan bira grandi nan ta reconoce esey, paso oranan ta chikito eta mas  e confiansa cu nan ta haya den nos como nan lidernan, ta importante pa nan. Atrobe, haci tur cos cu pasion y sigur e resultado lo ta positivo. Traha duro semper. No haci cosnan mitar mitar of con cu ta. Of hacie bon, of no hacie.

Nos hende muhernan ta e balans den nos comunidad.

KICO TA HACI ABO, UN MUHER CU TA INSPIRA?

Kere den nos muchanan, enfoka riba nan, motivanan y dedica tur cu bo por na nan.  Scucha nan, hari cu nan, aplaudi nan, consehanan, y si mester hala nan atencion, hacie tambe. Cansancio ta bin despues, pero e satisfacion ta mas grandi cu e cansancio. Y e gana di kier yuda semper, unda cu ta y mas aun saca un man pa otro den necesidad, kizas ta inspira otronan.

BALANS

Cada un tin su propio lugar den mi bida, mi ta atende cu famia prome, zorg pa tur cos ta na ordo cu nan y despues enfoka riba  trabou. Nos trabou tambe ta importante pa nos famia.  Siña bo yiunan esey semper, asina nan tambe  lo resulta den hendenan dedica y serio. Y recordanan cu semper pensa cu si nos kier, nos por.

MOTIVA UN OTRO
Sa cu nunca bo ta boso, semper tin un persona  eyfo cu por scuchabo y yudabo. Haci oracion y traha pa haci bo fe mas fuerte. Sea contento cu cada mehoracion di bo situacion y usa esey como e forza pa dal e next step.  Tur tempo malo ta pasahero, pero bo mester por yuda bo mes tambe. No sinta man cruza.

Nos hende muhernan ta e balans den nos comunidad.  Huntu cu hende homber nos ta forma nos mundo, cada cu di nos ta atribui na nos manera. Pero huntu nos por haci e diferencia mas grandi.

Nos mester steun otro, no cudisha otro, mustra empatia, respeta otro su opinion y pensa cu mescos c'un hende homber, nos por tur cos mes bon cu nan.

ORGUYOSO LOGRO
Mi dos yiunan pa cuminsa, nan a bira adultonan responsabel, cu tin nan curazon na su lugar, nan ta enfoka y semper ta tene consideracion cu e otro persona, vooral uno cu ta den mester. Tambe e echo cu pa hopi añas mi ta atende,  huntu cu un grupo fantastico di otro lidernan femenina,  dos grupo grandi di girl scouts tur diasabra, merdia na  Savaneta mi bario di infancia, y atardi na Noord  na unda cu mi ta biba.  Tur diasabra ta casi un total di 80 mucha muhenan di 4- 18 aña nos ta atende cu nan. Nos ta siñanan conoce e mundo di padvinderij, cu ta asina grandi y fantastico y sin cu nan sa , nos ta bezig ta yuda nan den formacion. Tur nos miembronan ta mucha muhe y tur nos lidernan ta feminanan tambe.  Dus nos ta echt kere den y ta mustra  e forza femenino.

BARERA

E tempo liber cu ta poco, e hende muhe hopi biaha ta tuma mas tarea di famia cu e hende homber. Y pa mamanan soltera e ta mas dificil ainda. Pero mi ta kere cu por si.  Nos por inspira den diferente forma, door di ta un bon mama, un bon yiu, un bon amiga, un bon persona, no necesariamente e mester ta cu trabou voluntario so tampoco.

UN OTRO MUHER CU TA INSPIRA BO

Mi no tin echt un persona cu ta inspirami, eta mas un situacion ta inspirami. Hopi biaha e ta casonan di personan cu ta yuda otro sin pidi nada a cambio ta inspirami. Manera esnan nomina den CNN HEROES of the YEAR. Despues di mira esaki, bo ta just haya gana di yuda otronan den necesidad.  Tambe personan  cu tine dificil y toch ta keda perservera y ta contento cu  locual nan tin, aunke sea cu e por ta menos cu otro, ta inspirami.

CONSEHO

Semper kere den nan mes, y den nan potencial, keda enfoka, no bira egocentrico.  Reconoce nan  areanan mas debil, y traha riba esakinan. Sea pro activo. Sea humilde y fuerte alavez. Presenta bo mes.  Durf tuma un risico. Sa cu como hende muhe nan por logra nan metanan, igual cu cualkier otro,  trahando duro y kedando positivo. Y nunca pusha un otro abou, pa bo mes bay dilanti.  Mantene semper e “MI POR “ attitude. Si nan cai 7 biaha, just lanta 8. Y nunca tene  miedo di pidi ayudo.

UN MOMENTO INOLVIDABEL DI INSPIRACION
Ora cu mi ex girl scoutnan cu ya ta hende grandi, y  tin nan mes famia, nan profesion, y  ta bisami, cu padvinderij a yuda formanan, cu nan a siña asina hopi cerca nos ora nan tabata mucha, y cu nunca nan lo lubida esey, of bijv  e braza cu nos  dunanan net e ora cu nan tabatin mester di dje, of interes cu nos ta mustra nan door di scucha nan, of con dushi nan a pasa den padvinderij,  ta cosnan cu ta pone mi sinti sumamante contento.  Y bo ta siniti cu nos tempo liber dedica na e causa, no ta invano. Hopi tabata e casonan den cual nos a yuda nos muchanan den necesidad di grupo tambe, den diferente forma, y eta un satisfaccion semper. Yuda cu un cama, paga gas, awa y coriente, yuda nan pa nan ta netjes uniforma mescos cu tur otro, busca un frigidaire pa un famia, yuda nan haya un trabou, prepara nan pa un interview di trabou, yuda cu cuminda, yuda cu school.  Y tur esaki nos ta haci huntu cu  nos lidernan, y  tambe huntu un grupo di mi amiganan, cu semper ta kla pa duna un man na esnan den necesidad. Ta huntu nos  forza mas grandi y nos por logra mas. Mi so no por. Pero e boluntad mester tey.

INSPIRA NOS MUCHANAN
Nos mester siñanan y mustranan cu nos tur por haci un diferencia den nos mes bida y rond di nos. Cu tur cos ta posibel si bo kier. Sigur nos mester siñanan di ta menos ego centrico cu ta posibel y no materialista; semper traha pa  bay dilanti, pero semper por yuda un otro tambe. Studia mas tanto cu bo por, y streef na ta e miho persona cu bo por ta.  Goza di cada momento di nan bida tambe, paso esaki ta pasa lihe bay. 

MUHERNAN NA ARUBA

E señora cu tabata keda cas , wak pa yiunan y cas, cu tin cu steun  riba e entrada di e pareha,  pa e hende muhe cu su mes carera y su mes entrada- dus independiente den tur sentido di e palabra. 

TopBuilt with Shorthand