Angelica, interior designer na Crown, e tienda di mueble mas grandi na Aruba, ta dedica su bida na transforma espacionan den lugarnan yena di estetica, funcionalidad y emocion. Desde chikito, Angelica semper a sinti un conexion special cu diseño y arte. “Mi mama semper a motiva mi pa siña. Despues di scol mi tabata asisti na les di ballet, musica, pintura y bordado,” e ta conta. E experiencia aki a guia Angelica na su pasion: transforma espacionan cu creatividad y estilo.
Ora el a yega na Aruba, Angelica a cuminsa traha den diseño di vitrinanan pa tienda nan, logo y tarheta di presentacion. Pero su gran oportunidad a yega ora un cliente Mericano a pidi su yudansa pa decora su cas cu e tabata renobando. “Mi a tuma e reto, y despues di wak e resultado, e cliente tabata hopi satisfecho.” E momento aki a marca e inicio di su carera den diseño di interior y eventualmente su ingreso den e ekipo di Crown.
Pa Angelica, cada proyecto ta cuminsa cu scucha y compronde e necesidadnan di su cliente. “E prome paso semper ta pa conoce e persona, su gusto y con nan kier uza nan espacionan,” e ta splica. Despues di analiza e lugar, color, iluminacion y texturanan, e ta desaroya un concepto cu ta guia e diseño.
“E momento di mas gratificacion den mi trabou ta ora mi entrega un espacio completamente transforma,” Angelica ta bisa. Di seleccion di mueblenan te na e ultimo detaye nan decorativo, su enfoke minimalista ta mescla cu su abilidad pa adapta su estilo na necesidadnan di su cliente y e articulonan disponibel den e tienda. “Diseña ta un colaboracion, unda sugerencianan di cliente ta enrikece e resultado final,” e ta agrega.
Angelica ta reconoce cu algun di e erornan mas comun den diseño ta maneho malo di espacio, uzo excesivo di colornan of patronan, y falta di atencion na iluminacion. “Scucha bo cliente cu atencion y mustr’e ehempel di diseñonan anterior ta clave pa crea confiansa,” e ta bisa. Aunke tin clientnan cu gusta participa activamente den e proceso, tin otro cu ta confia completamente den su vision.
Un reto memorabel tabata decora un cas completo den solamente tres dia. Apesar di e limitacionnan di tempo y recurso, Angelica a haci su mihor, aunke e cliente a cambia elemento cu a afecta e armonia di diseño. “E experiencia aki a siña mi cu comunicacion cla y colaboracion constante ta clave,” e ta splica. Awor, cu mas apoyo den e tienda, e por dedica mas tempo na proyectonan di servicio, asegurando resultadonan optimo.
“Como un muher den diseño di interior, mi enfoke ta emociona y inclusivo, c’un toke innovador cu ta promove igualdad di genero,” Angelica ta bisa. Su experiencia na Aruba a permiti di traha cu estilo varia, desde colonial te contemporaneo, semper adapta na e tendencia y necesidadnan di nos mercado local.
Pa Angelica, sigui un carera den un area cu bo ta gusta ta esencial. “Ora bo ta traha den algo cu bo stima, cada dia bo ta sinti motivacion pa siña, ta creativo y duna bo mihor.”
Built with Shorthand