E storia di Angele Paesch no ta trata unicamente riba trahamento di joya, sino ta uno di e poder di pasion pa un arte y e forsa di boluntad di un mama riba un mision. Den pleno pandemia, ora cu incertidumbre y miedo tabata domina, Angele a pone un proposito su dilanti. El a siña y maestra e arte di traha joyas y asina su marca Piña pa A&E a nace. Awe, e ta mas sigur cu nuca di e paso cu el a tuma, creando piezanan unico pa cada cliente.
“Durante e añanan cu mi a traha den joyeria, mi a descubri cu mi pasion tabata pa crea un obra di arte mas significante cu por simbolisa un persona moderno, pero clasico na mes momento. Mi tabata kier crea mi propio marca di joya, pero no djis un marca comun sino uno cu por representa Aruba, e isla y cultura unda mi a nace. Durante e pandemia, mi a studia y practica te ora mi a siña con pa traha mi mesun piezanan di joyeria. E pandemia a siñami pasensia, speransa, creatividad y fe.”
Mescos cu tur hende tin un storia pa conta, cada piez tambe por conta un storia. Cu e pensamento aki, e proceso ta cuminsa serca Angele. “Mi ta goza crea un storia cu cada pieza cu mi ta traha, un storia di mi antepasado y un storia di esun cu ta bisti e joya. Mi ta goza haci algo unico y cu estilo, creando piezanan cu, aunke nan ta parce delicado, toch ta logra fortalece un aspecto di e personalidad di algun hende.
Prome cu tur cos, mi ta colecta inspiracion for di mundo natural y nos cultura. Despues di esey mi ta sinta y cuminsa skets piezanan cu e formanan cu a inspira mi te ora mi yega na e forma perfecto. E proceso cu ta sigui ta e seleccio di e piedranan precioso cu ta complimenta e diseño mihor ainda y despues mi ta pone mi man na obra pa crea e pieza final.”
Cuanto tempo e por dura pa crea un pieza? “Pa ta honesto, e por tuma di 30 minuut te algun siman, tur esaki ta depende di e tamaño di e pieza y e inspiracion. Tin biaha mi tin un idea den mi cabes pa un siman of dos, pero e ehecucion por slip for di mi dedenan te ora algo dunami inspiracion pa con pa haci'e.
“Mi ta kere cu tin dos cos cu ta pone nos diferencie di otro joyero nan den mercado: Personalisacion y Calidad. Como cu mi ta haci hopi di mi trabou den tienda, e cumprador tin hopi espacio pa tuma parti den e proceso di creacion. E cliente semper ta bonbini pa drenta y duna nan aporte durante e proceso di creacion di cualkier pieza duna. Nos calidad ta resalta for di e hecho cu tur nos piezanan ta traha na man localmente cu materialnan di calidad halto.
Mi ta usa principalmente piedranan semi-precioso manera Ametist, Cristal, Opal, Perla, Kwarts Ros, Turkesa, Onyx y Agat y metal di calidad halto, logrando un balans entre beyesa y accesibilidad. Mi ta kere cu hende ta gusta resalta for di e multitud, y nos piezanan unico ta realmente yudabo haci esey. Specialmente awendia cu tur cos ta na punta di bo dedenan, tin algo cu bo sa cu ta unico ta sinti special.
“Mi ta pensa cu ta hopi importante pa duna atencion y apoyo na arte local, specialmente den un mundo asina globalisa. Ta realmente vital pa nos uni y no manda tur nos placa duru gana pa fore.
“Mi sinti cu e industria di joyeria no ta tanto un club di hombernan, pero hopi di e desafionan cu mi a enfrenta a bin for di e tempo den cual mi a dicidi di habri mi negoshi. Habrimento di un negocio di joyeria durante temponan di pandemia caminda hende no tabata realmente preocupa pa bisti tabata un lucha, pero nos a maneha y awor nos ta floreciendo! E cambio principal p’ami awor, como mi propio hefe, ta cu mi por ofrece cada cliente loke nan mester sin miedo of preshon. Un desafio cu mi ta enfrentando riba e tereno aki ta pone limite entre mi negocio y bida personal.
Mi a descubri cu como bo mesun hefe, e inovacion di bo negocio ta keda exclusivamente riba bo mesun lomba. Dus mi mentalidad a cambia pa un sorto di pragmatismo caminda cu mi ta constantemente buscando fuentenan nobo di inspiracion, mientras mi ta keda cu mi pianan riba tera na kico por keda realisa.
Built with Shorthand