Den e mundo di social media, hopi hende ta busca contenido cu ta sinti real—sin filter, sin pretension, sin drama. Anabel Leon, conoci riba Facebook/ Tik Tok como Ana Vibes, ta precisamente esaki: un muher cu ta mustra bida den forma entreteni, alegre y cu su propio estilo.
Ana Vibes
Ana Vibes
"Mi no ta influencer," e ta bisa prome cu tur cos. "Mi ta solamente mustrando bida manera e ta. Mi no ta perfecto, ni mi ta purba ta perfecto, ni mi ta busca pa "siña" hende nada. Bida ta simpel, mi ta mustrando con mi ta bib’é." E ta bisa cu e palabra influencer ta algo basta fuerte den su percepcion. “Mi no kier carga cu e nomber ey ni mi ta considera mi mes influencer! Obviamente mi ta hopi agradecido cu mi a keda considera como influencer di aña."
Ana Vibes
Ana Vibes
Naci y cria na Santa Cruz, Aruba, Anabel ta un combinacion di dos mundo—su mama ta di Republica Dominicana y su tata ta di Aruba. Cu 20 aña, e a lanta vuelo pa New York sin realisa cu esaki lo bira un decision cu lo impacta su bida pa semper. "Mi no tabata planea pa keda Merca. Mi tabata di bishita, pero mi a bira curioso di bida eynan. Asina mi a keda, a forma mi famia, y awor mi tin dos yiu: un di 11 aña y un otro di 9 aña."
Na Merca, Anabel a busca su espacio den social media, Su prome intento den social media tabata den crea contenido riba cuminda, cushinando y compartiendo receta. "Mi tabata haci mi video sin uza mi voz, y ora mi tabata uza mi voz, tabata den Ingles pasobra mi tabata na Merca.” El a purba pa 2 aña, pero, e no a funciona. “E ora ma cuminsa los par di video den Papiamento sea cushinando, haciendo cas limpi, food shopping etc, claro cu mi chispa tiki spicy. Mi a bisa no tabatin ningun hende di Aruba haciendo esaki na Merca dus mi di; ban dal aden pa mustra hende con e bida kinan ta.” E cambio di haci contenido puramente den Papiamento a haci e diferencia! Su audiencia y siguidornan a cuminsa crece. El a haya su niche den su mesun origen. Cu su energia spontaneo, alegre y ‘spicy’, el haya e formula cu a lick cu su siguidornan.
Na 2024, Anabel a keda nombra Influencer di Aña pa varios radio emisora, pero segun e, esaki no ta p’e..
Mi ta 100 porciento honesto den mi segmento nan, mi mes ta siña corigiendo mi mesun fout nan y mi ta habri pa mustra pueblo tambe cu mi mes sa haci fout. Esey no kermen cu mi no tin e cualidad nan pero No danki, mi no gusta haci tur cos un drukte. Bida ta simpel y esaki t’e.
Loke Ana Vibes a crea cu su plataforma no ta solamente bailamento, cushinamento y un bista den bida di un Arubiana na Merca. E tin un sentido hopi mas profundo ainda mirando cu e mes ta un persona cu ta kere den husticia social. “Ami no ta haci of uza mi segmento nan pa nada completamente for di man. Cu esaki mi kermen "abuso di mucha, droga, abuso sexual, alcohol y etc." Nada di e cosnan aki cu ta condenabel y super negativo den tur sentido di palabra. Nunca lo mi uza of promove e tipo di cosnan aki den mi segmento.”
Ana Vibes ta mustra bida, pero den un manera positivo—un plataforma caminda e comunidad ta sinti conectividad, alegria y un sinti di comunidad. “Mi video nan ta pa trece humor y "fun" aunke no ta tur hende ta wak’e asina pero mi ta compronde cu den e mundo’ ki, no ta tur hende mester ta di acuerdo semper cu otro. Esey ta ok p’ami."
Built with Shorthand