Full mi bida mi a lucha cu mi peso, pero e momento cu mi por bisa cu mi a “hit rock bottom” tabata aña pasa, ora cu mi 17 aña, mi a yega pasa 90 kilo, algo cu tabata afecta mi salud y bienestar. E peso no tabata baha, ni con cuanto mi tabata kier, y esaki a bira un frustracion grandi. Mi cara tabata yena di puistjes pa motibo di cuminda y hormonal imbalance, pero na final mi no tabata cuidando mi mes. Stress y bataya mental a pushami na come mas y mas. Shop pa paña tabata un lucha y saca potret tabata algo cu mi tabata evita; social media tabata mas edita cu real.

Hopi di e momentonan aki mi a sconde, tratando di mustra cu tur cos tabata bon, mientras den mi cabes tabata un otro lucha. T'e un dia cu mi a post e video. “Mi a pone mi cell riba cama y cuminsa yora. Mi tabatin miedo di kico hende lo pensa.” Pero despues mi a corda mi mes: esaki mi ta haci pa mi, pa mi salud. Ora e apoyo a drenta, e miedo a cambia den forsa.

25 di Augustus 2025. Un yamada. Un invitacion: representa Aruba na Teen Universe. Amalia no por a kere. “Kico Roberto Avalo ( estilista/prepador di reina) ta wak den mi?” El tabata tende comentario riba su peso tur tempo, pero e tabata bisa: “Hasta si mi subi riba stage cu 100 kilo, mi ta haci’e.” Pero despues el a pensa mas profundo. Con mi lo representa mi isla y papia di disciplina y liderazgo, si mi mes no ta cuida mi bida? E pensamento ey a habri un luz den su mente. Esaki no tabata trata di djis e tema di beyesa. Tabata riba coherencia. Riba honra e mensahe cu e kier hiba.

Tabatin hopi momento cu Amalia a kere cu e lo no logra, sigur na cuminsamento. “Mi tabata cansa, mi tabata duda di mi mes y tin biaha mi kier a stop. Pero locual a sigui pushami tabata mi disiplina. Una bes cu mi pone algo den mi mente, ningun hende no por saca esaki. No semper mi tabata sa con mi lo logra, pero mi tabata sigur cu mi lo logra. E apoyo di mi famia y amistadnan tabata esencial den e proceso, y mi ta profundamente gradicido cu nan ta den mi bida. E cambio di estilo di bida a siña mi cu sodo, lagrima y sacrificio, ta bale la pena.”

E cambio mental tabata e mas dificil e ta splica. “Ora mi mente a cuminsa compronde pakico mi tabata trahando, mi enfoke a bira mas cla. No tabata facil lanta tur mainta, traha duro y sigui positivo, pero cu tempo el a bira rutina. Awe, mi ta mira e diferencia grandi: mi ta halando rosea awo mas facil y e diferencia di cuida mi curpa compara cu no cuida ta super grandi mi ta ripar’e voraal na mi salud, mi cara a ‘clear up’, mi curpa no ta sinti hincha, mi no ta cansa tur ora, no tin echt ‘mood swing’ mas y mi condicion a bira super mas miho.”