E ta peligroso pa uza informacion nan eroneo y incorecto pa no mira e beneficionan di Vacation Rentals pa Aruba
Como un isla renombra pa su industria turistico, Aruba semper a atrae bishitantenan cu ta busca solo, santo, paisahe, servicio y mas cu tur cos, experiencianan unico. E formato semper tabata cumpra ticket, busca hotel, auto y book e restaurant of servicionan adicional. Sinembargo, e comportacion di e biahero, mundialmente, a cambia, pues Aruba, no ta un excepcion. Leu e dianan unda hotelnan tradishonal tabata monopolisa e opcionnan di acomodashon pa bishitantenan a keda. E deseo creciente pa experencianan unico di bishitantenan cu kier autenticidad y un chens pa djis biba manera un local, a resulta den un aumento di popularidad di Vacation Rentals.
Bishitantenan awor por scoge for di un variedad di propiedadnan, manera apartamentonan, villa nan chikito, casnan serca di lama, cu bista, den naturalesa, den ciudad of den otro barionan di e isla, cada un cu nan carateristicanan y encanto propio. E subida di Vacation Rentals a crea tambe un caminda tambe pa Arubiano bira empresario di nan propio negoshi. Cu Vacation Rentals, localnan por comparti nan cas, nan cultura y nan perspectiva unico cu bishitantenan. Tur esaki, sin lubida cu e entrada cu ta keda genera di Vacation Rentals ta circula den economia local bek, via pagonan di impuesto y ganashi di e doño di cas, creando un efecto di prosperidad bek den e comunidad. Sinembargo, a cuminsa cu e discusion riba Vacation Rentals como e motibo di aumento di prijs nan di cas. Kico ta berdad?
Alex Cybul a cuminsa cu Vacation Rentals 7 aña pasa. Su experiencia ta amplio y e, mescos c’un grupo grandi di esnan cu ta traha den e ramo aki, ta mira e discusion aki yena cu informacionnan incompleto y eroneo.
“Un amigo di mi a inspirami pa drenta den e negoshi di huur cas. E la haci’e zona manera algo leuk y facil ya cu tur hende cu ta den vakantie ta alegre. Basa riba esaki mi a topa un cas na Koyari cu a bira mi prome vacation rental. E resto ta historia. Despues di esaki mi a cuminsa handle cas pa otro hende tambe. Awe Vacation Aruba ta maneha mas di 180 cas y/o apartamento. E crecemento aki a bin den un tempo di 7 aña. Tin un demanda hopi mas grandi y naturalmente, hopi mas cas disponibel tambe compara cu prome. COVID a cambia hopi hende nan manera di pensa.
Aworaki hopi hende ta prefera di ta den lugarnan mas priva y evita aglomerashon. Tin hende cu te hasta ta busca e cas cu nan ta desea di haci nan vakantie y despues ta wak unda e ta keda. Esaki ta mustra con importante e ta pa Aruba tin e variedad di producto pa ofrece pa por sigui ta competitivo como destinacion.
Na 2022 VRPA (Vacation Rentals Professionals Aruba) cu apoyo di AHATA y ATA a busca un compania di Merca specialisa na Estudio Economico di Vacation Rentals. E compania ‘ki a yega di traha full rond di mundo y nan a haci un estudio over di e Impacto Economico di Vacation Rentals na Aruba. Nan estudio a indica cu e impacto total tabata di $478 millon dollar. Mi ta kere nos a wak un crecemento den ultimo dos añanan y lo por asumi cu awor, e ta mas cu un biyon florin pa aña.
SUBIDA DI PRIJSNAN DI CAS
Mi ta kere ta prijsnan di casnan na Aruba a aumenta den e ultimo añanan mas cu normal pa diferente motibo, no por djis bisa cu ta pavia di Vacation Rentals. Factornan manera e.o. prijsnan di material di construccion (despues di e Covid, varios di esaki a subi y nunca no a baha bek na e prijs nan di prome), escases di tereno, prijs di labor di construccion, Covid y su efectonan cu no a bin bek na normalidad y e demanda general di kier tin un cas na Aruba y e crecemento di poblacion. Tur esakinan ta factornan cu ta influencia.
KEN TA DOÑO DI CASNAN PA VACATION RENTALS
Basa riba varios estudio cu a keda haci recientemente, incluyendo e informacion di e evaluacion cu a keda presenta pa e Amsterdam Bureau cu Minister Wever a pidi pa haci , a sali cu mas cu mitar di e doñonan di Vacation Rentals na Aruba ta local. Esaki ta importante ya cu e prueba cu mayoria di e placa ta keda riba nos isla.
BENEFICIO PA KENDE?
Porfin un grupo di e localnan ta logrando haya un pida di bolo di e industria di e hospedahe di turismo. Aparte di esaki, nos ta wak cu tin hopi negoshinan cu ta aleha di e zona turistico cu a cuminsa haya mas bishita di nos huespedenan. Nos a mira cu mas cas nan ta keda renoba, pa esey mester un arkitecto local, e trabou ta keda haci pa un contratista loca. Tambe pool ta keda construi, mas compania di servicio di pool, mas hardinero y mas compania di housekeeping. E placa cu e turismo ta paga pa keda serca e Vacation Homes y placa cu nan ta gasta na negoshinan local, ta keda circula den nos economia local. Ademas di esaki, nos ta mira hopi oportunidad y crecemento den experiencianan “na cas” cu ta causa mas hende pa haci un “negoshi nobo”. Por ehempel, hopi turista ta pidi pa tin Yoga Classes, Chef, of Massage na cas. Esaki ta crea un oportunidad pa trabou nan of negoshi nobo.
Na nos compania, nos ta percura pa ora di crea cada cas nobo den nos sistema, nos pasa door di un checklist di cosnan cu mester zorg pa e casnan cumpli cune. Den esaki nos tin e informacion necesario pa por cobra y paga e Tourist Tax y Environmental Tax. Mester educa tur hende cu huur cas con pa haci esaki y cumpli cu e reglanan. E entrada aki ta importante pa nos sector y ta importante p’asina e industria keda mira cu mihor wowo. Si tin clientenan cu kier busca manera di evita esaki, mi lo prefera termina nos relacion laboral. Mi ta un co-founder y board member di VRPA e Vacation Rental Professionals of Aruba. Nos ta e asociacion cu ta representa e sector. Pa esun nan interesa di con pa cumpli of cua ta e deber nan como host of propery manager, please bay nan nos Facebook Page VRPA y manda nos un private message of email nos na info@VRPAruba.com
Mi ta kere mester haya informacion concreto di Aruba pa tuma e mihor decision nan posibel pa cu e situacion di cas na Aruba. Mester evita compara nos cu otro pais cu kizas tin diferente necesidad of problema pa tene na cuenta cune. Loke por cuminsa haci di biaha ta crea un registro p’asina crea un base di datos, zorg pa tur hende cu registra pa haya un number/certification y den e proceso di registra, splica tur hende cu ta huur kico precies mester cumpli cune y despues zorg pa nan cumpli.
Como un persona cu a maneha multiple Vacation Rentals pa 7 aña largo, nos a yega di tin 5 keho di sonido, esey ta tur. Nos a deal cu esaki mesora y a haci cambionan unda tabata necesario pa mitiga cu esaki lo por ripiti su mes. Nos tin reglanan pa e casnan y e huespednan mester cumpli cu esakinan. Aparte di esaki, awendia tin opcion cu tecnologia unda por controla of keda avisa si tin mas sonido mas duro cu loke ta permiti.
E topico di limita Vacation Homes na Aruba ta uno complica y cu mester hopi cautela ora di considera ya cu e ta un industria cu ta creciendo na Aruba y ta un trend mundial. E ta sumamente importante pa haya e balans corecto pa cu e Vacation Rentals, duda nan y/of preocupacion nan di e comunidad. Ami ta kere cu mester implementa regulacionnan husto y rasonabel. Esey ta e miho manera. Ta sumamente importante pa mantene tur e stakeholders den e combersacion pa compronde kico ta e situacion di Aruba. Discusionnan colaborativo, incluyendo nos lo yuda pa brainstorm y busca e mihor decision pa promove e industria di Vacation Rental na un manera responsabel y protehe interes di henter comunidad.
Mi ta mira un futuro positivo pa e sector aki na Aruba. Nos ta kere cu si nos adopta un strategia cu ta trece bon balans, por ta den beneficio di hopi hende y Aruba su turismo y economia en general. Pa esaki mester tin dialogo continuo, colaboracion, y bon practica di host management. Asina nos lo por crea unda e industria aki lo por crese na un manera saludabel y sigui hasi un contrubicionnan importante pa e desaroyo di nos Turismo.
Built with Shorthand