"Mi pasion pa periodismo a cuminsa desde mi infancia. Mi ta un mucha cu semper a gusta haci pregunta na tur hende, y semper mi mama tabata pasa berguensa pasobra mi tabata keda puntra hende di nan bida. Mi ta kere esey tabata e inicio di mi carera." Asina ta cuminsa e storia di Alejandra Forero, un periodista pasiona kende su biahe den mundo di periodismo ta wordo marca pa su deseo di conta storia y mantene e comunidad informa.

"Forero a eligi periodismo como su carera pasobra semper a sinti afinidad pa mundo di media y produccion. Pa Alejandra, periodismo ta un canal poderoso pa informa e comunidad, sea pa medio di radio, television, prensa, of social media." Su carera como periodista a cuminsa na edad di 18 aña ora cu el a drenta na universidad na Bogota. Despues di 5 aña di estudio, el a gradua como Comunicadora y despues a haci un enfasis den Periodismo, hunto c’un Diplomado den Gerencia Estrategica di Comunicacion. Despues di su formacion, el a completa unpractica na RCN, un di e canalnan mas importante na Colombia, y a traha como freelance na Caracol.

Cu 24 aña, el a yega Aruba, unda cu el a cuminsa traha su carera den periodismo, un lugar cu for di e principio a ricibi Alejandra, cu brasanan habri. “Mi tin hopi respet pa tur persona y profesional na Aruba cu apesar di no a studia den un universidad, nan ta traha den e ramo di prensa y cu tin basta experiencia. Mi ta kere cu nos profesion ta asina bunita y asina amplio cu hasta cu mi a studia profesionalmente, ta un pasion cu mi tin, pasobra cada dia ta un storia diferente di conta. Cada dia tin un suceso nobo pa comparti. Cada dia ta algo otro…”

Un di e oportunidadnan mas significativo cu el a topa na Aruba tabata e oportunidad pa presenta noticianan na Spaño, un idioma importante debi na e presencia grandi di comunidadnan Colombiano y Venezolano na e isla. “Wel, ami no ta kere mucho den coincidencia, mi ta kere cu si algo ta p’abo, ta p’abo e ta. Den mi caso, mi a conta cu hopi blessings, pasobra ora mi a yega Aruba mi no tabata conoce ningun otro hende aparte di mi famia. Dus e caminda ta bira un tiki mas dificil pero via mi prima, mi a conoce un meneer cu tabata traha na radio, Oscar Fernandez, un profesional den e campo.” Danki na su sosten, Alejandra a cuminsa traha den programa radial na Spaño y mas despues, den programa television na Spaño y bilingüe.

For di e tempo ey, el a colabora den diferente programa di noticia na Spaño, incluyendo 'Primera Plana con Alejandra Forero', cu el a crea hunto cu su colega Aldric Werleman. Adicionalmente, el a forma parti di e ekipo di 'Caliente 90.7 FM' den un programa di noticia matutino. Su versatilidad como periodista a permiti’e adapta na diferente plataforma di media y audiencia."

"Alejandra ta destaca e importancia di brinda noticia na Spaño na Aruba, pasobra cerca di 25 te 30% di poblacion ta papia e idioma aki. E ta kere cu ta fundamental pa mantene e comunidad informa, dunando nan acceso na informacion local y internacional relevante. Su estilo como periodista ta caracterisa pa su dinamismo, autenticidad y narracion di storia di manera atractivo y preciso. Aunke no tin un specialidad specifico, e ta disfruta specialmente di conta storia local y sucesonan cu ta impacta e bida di hende. Trahando como periodista na un isla manera Aruba ta presenta desafionan, manera maneho di tempo, pero tambe bentahanan, manera un comunidad mas sigur y e oportunidad pa conecta cu e audiencia.

Alejandra ta sinti su mes afortuna di a construi un coneccion solido cu e comunidad Arubano durante e aña nan. Alejandra tambe ta subraya e influencia di e medianan social riba noticia. E ta adapta constantemente na e era nobo aki, haciendo uso di plataforma digital pa trece informacion na diferente generacion. Su ekipo ta traha pa crea contenido interactivo y atractivo pa satisface e demanda nan cu ta cambia constantemente di e audiencia. “Mi tin un team dinamico cu ta yudami masha hopi mes y cu ta haci e trabou mas productivo y dinamico, mi ta traha cu Yerica Benitez cu ta mi editora/camara cu semper ta purba di haci magia den momento cu nos tin cu rush.”

Algun momento significativo den su carera ta inclui e cobertura di tragedianan humano, manera e accidente di un famia cu a bini for di Puerto Rico y a perde un di nan miembro di famia. Alejandra a sinti hopi e dolor di nan y a comparti e storia cu su audiencia.

Otro momento inolvidabel ta e anuncio di lock down durante e pandemia, unda cu e mester a informa e comunidad durante un periodo di incertidumbre y miedo. E experiencia di traha na Telearuba ta sumamente positivo pa Alejandra, unda el ta forma parti di un ekipo dinamico y ta sinti su mes afortuna pa e sinergia cu nan a crea cu otro departamento di Telearuba.

“Mundo ta cambiando constantemente, awo social media ta un tool hopi importante pa transmiti informacion, aunke tambe tin su risiko cu tin biaha hende ta mal informa. Pero den e era nobo aki bo tin cu transforma tambe bo contenido si bo kier ta den e trend. Si, den un forma e ta afecta e periodismo di television, pero si abo tambe lo por ofrece bo plataforma informativo no solo den e parti di television, pero si tambe den e forma digital bo por gara diferente generacion. Pasobra nos tin hopi hende cu ta gusta sinta wak television, y claro nos tin e generacion nobo cu ta consumi mas social media.”

“Pa locual ta trata e parte personal, mi tin mi pareha Jordy, e ta un hende super special cu a yega mi bida den e momento exacto y cu a añadi amor, comprencion, aventura y hopi respet. Den nos caso nos no kier haya yiu, momento cu nos a conoce otro esey tabata un punto hopi importante, dus cu nos tabata riba e mesun linea. E ta mi hogar, e ta mi famia y dor cu e tin su mesun compania di media, photo and video e ta compronde full mi dinamica, mi schedule y mi mundo.”

ENGLISH
TopBuilt with Shorthand