Den cuadro di e preparacion pa e proximo apertura inicial di e U.S. Check-In Terminal nobo na Aeropuerto Internacional Reina Beatrix, Aruba Airport Authority N.V. (AAA) a yama bonbini na e miembronan di prensa local pa un bishita exclusivo na e sitio. E tour aki a ofrece un bista paden di e sala di check-in di ultimo generacion y e sistema avansa di maneho di ekipahe, un factor clave di Fase 1A di e proyecto Gateway 2030.

E evento a inicia cu informacion y diferente presentacion riba e proyecto Gateway 2030 y e preparacionnan extenso pa e apertura di e terminal, duna pa Barbara Brown, Chief Revenue Development & Communications Officer; Gilbert Rafael, Chief Development & Technology Officer; y Marylou van der Linden, Operations Manager. Despues di esaki, Julian Chung, Project Executive, a dirigi un tour door di e sistema nobo di maneho di maleta, resaltando su caracteristicanan avansa diseña pa haci e experiencia di e pasahero uno mas eficiente. 

E apertura ta programa pa dia 8 di april 2025, na momento cu Delta, United, Southwest y Spirit lo cuminsa cu su operacionnan den e sala nobo di check-in. E transicion completo, incluyendo JetBlue y American Airlines, lo tuma luga dia 29 di april 2025, marcando un logro grandi den e esfuersonan di e modernisacion di e aeropuerto. Pa fin di luna di mei, tur pasahero cu ta bay Merca lo beneficia di e proceso di check-in simplifica, eliminando e necesidad pa piki of entrega e maletanan despues di screening di U.S. Customs and Border Protection (CBP) y e controlnan secundario di siguridad. 

Mientras cu e transicion ta acercando, Aeropuerto di Aruba lo ta comunicando activamente cu e pasaheronan pa medio di diferente plataforma pa garantisa cu nan sa unda pa bay y kico nan por spera. Informacion detaya, incluyendo indicacion y actualisacion riba medionan social lo guia e biaheronan den e proceso nobo di check-in, garantisando un experiencia suave y sin stress.  

 
Faltando apenas algun dia pa e apertura, Aeropuerto di Aruba ta finalisando cu e preparacionnan pa garantisa un transicion eficiente pa e aerolineanan como tambe pa e pasaheronan. E proyecto Gateway 2030 ta keda un testimonio di e vision cu aeropuerto tin pa ofrece un experiencia di biahe di clase mundial mientras ta mehora eficiencia y sostenibilidad. 

Subi www.airportaruba.com pa mas informacion of sigui nos riba nos medionan social. 

AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na mas cu 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 77% ta di Merca y Canada, 15% ta di Latino America, 4% ta di Europa y 4% ta di Caribe Hulandes.

AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.