“Mi ta kere parcialmente e ta paso mi ta un hende cu ambicion pa sigui crece y tambe paso mi a sinti e necesidad pa crea mi vision den mi practica priva. Despues di casi 9 aña di traha den diferente tipo di compania, mi a realisa cu mi vision ta diferente y cu a bira tempo pa mi haci mi vision un realidad.
Tambe mi kier a sinti mas cerca di e comunidad pa asina por stimula nos comunidad pa por yega mas trempan na e ayudo psicologico. Tambe pa por traha mas na prevencion door di papia di topiconan di salud mental y tambe door di haci workshop of charla di topiconan actual den mi area di experticio.”
“Mi a scoge Qredits pa diferente motibo. Primordialmente mi ta kere paso Qredits ta traha pa un hende manera ami cu tin un soño pa habri su mesun practica, mirando cu nan ta sostene negoshi chikito door di ofrece porcentahenan mas abou y tambe door di ofrece guia y educacion gratis na nan clientenan. Mi ta sintimi sosteni door di Qredits. E no ta djis un instancia cu a duna mi un prestamo, pero mi ta sinti cu nan ta na mi banda pa por logra cu mi practica.
“Salud mental ta crucial paso e por impacta tambe nos salud fisico y asina nos salud en general. Manera p.e. solamente si bo tin un malesa fisico cronico cu bo ta enfrenta cu bo salud fisico den bo bida diario. Mientras cu nos ta confronta cu nos salud mental tur dia, hasta ora cu no tin un reto mental. Nos tur por tin pensamentonan cu ta stroba nos den nos bida diario sin cu nos por bisa cu tin di haber di p.e. ansiedad of depresion. Ora cu nos no cuida nos salud mental door cu nos no ta regularmente haci e rutina di higiena pa nos mente, e por bira un condicion mental cu ta bay haci impacto riba bo curpa y funcionamento. Pa e motibo aki e cuido di nos mente mester ta hinca den nos rutina diario mesun cos cu nos ta skeiro nos djente tur dia.”
“Na comienso e retonan tabata pa purba averigua tur cos p.e. con pa haci mi administracion, ki sistema mi kier uza, e sistema di paga belasting, e parti di traha un website y post riba social media. E ta hopi diferente tarea cu bo mester pensa riba dje y con abo mes kier haci esakinan. E cos great di esaki ta cu mi no mester a haya permiso di otro hende pa haci’e den mi manera. Si a papia cu hendenan cu tin mas experiencia pa por siña ki opcion tin y p’asina scoge locual ta traha mas miho pa mi.”
“Mi aspiracion ta pa por sigui haci locual cu mi ta apasiona di dje p’asina yuda nos comunidad pa eleva e salud mental di nos muchanan, adolescentenan y tambe nan mayornan. Pa mi por sigui comparti mi conocemento tambe cu docentenan cu tin e reto den anda cu e salud mental di nos muchanan na scol. Mi lo ta desea di haci mas den prevencion door di por yega na mas hende pareu. Mi ta kere cu mas nos sa, mas nos ta comprende di con nos mente y emocion nan ta traha, miho nos por haci pa nos mes y nos siguiente generacion nan.”
“Sigui cu bo vision y pa tuma e pasonan pa haci esaki un realidad. Mi ta kere nos tur tin un proposito na e mundo aki cu tambe ta duna nos mes satisfaccion y cu nos tin algo unico pa contribui cune. Por tin diferente hende cu ta eherce e mesun trabou cu bo pero ningun lo haci esaki den e mesun manera cu abo lo haci’e. Qredits ta yuda den e proceso aki pa guia bo pa por haci bo vision un realidad.”
Built with Shorthand