Tin dolor den bida cu no tin nomber, cu no tin definicion, cu no tin manera di describi cu palabra humano, y pa Angie Nathalie Garcia Osorio, un mama di cinco yiu, cuater na bida y uno cu no ta fisicamente presente, su storia ta uno cu ta mustra con amor, fe y lucha interno por sostene un curason, hasta ora e ta kibra.
Angie Nathalie Garcia Osorio
Angie Nathalie Garcia Osorio
Angie (35) ta naci na Colombia bibando na Aruba pa 12 aña caba. E ta describi su mes como un persona alegre y extrovertido, pero c’un manera di biba profundo. E ta kere den circulonan chikito di amistad, pero profundo y duradero, manera su tres amiga di Colombia cu e ta comparti un amistad di mas di 20 aña y cu e ta considera como hende cu e kier cuida y mantene den su bida pa semper.
Pero banda di su personalidad alegre, Angie ta un mama di cinco yiu, cuater na bida, y un storia cu a marca su bida pa semper. Dia 4 di december di 2014, su yiu chikito, Sofia Galvez, cu apenas tabatin tres aña a cay den un pool y a fayece mientras Angie tabata trahando. E experiencia ey a laga tras un dolor profundo, yena di pregunta sin contesta, cu ainda awe p’e, ta hopi dificil di papia di dje, ainda despues di tanto aña.
Despues di e tragedia, e mundo di Angie a bira un luga silencioso, sera, yena di un dolor cu e no tabata por comparti facilmente. El a pasa door di un lucha interno intenso, confrontando bida, Dios y su mes, sintiendo cu tabatin un bashi profundo unda e no tabata mira salida, cera den su dolor.
Sinembargo, den medio di e oscuridad, tabatin un momento decisivo cu a cambia su direccion: su yiu mayor, Alexia, cu na e momento tabatin shete aña, a confront’e c’un mensahe simpel pero poderoso; “Mami, mi t’aki ainda, mi mester dibo”. Esaki tabata e ‘push’ cu e tabatin mester pa cuminsa sali poco a poco for di e buraco, den cual e tabata aden. Cu apoyo di psicologo, di su famia y di su yiunan, el a logra sigui dilanti, aunke e dolor nunca a bay completamente. Bida a sigui presentando oportunidad nobo ora un persona special a drenta su bida, awe su esposo y gran sosten incondicional, Julian Cruz, un persona serio, responsabel y amoroso cu kende el a forma un famia hunto, awor cu tres yiu mas: Julian (10), Jake (6) y James (4), mientras Alexia awe tin 19 aña.
Despues di e tragedia, Angie a drenta un proceso di duelo cu no tabata lineal ni facil. “Mi a keda sera hopi tempo den e dolor,” e ta reconoce, describiendo un etapa unda e no tabata mira salida. Den e buskeda pa ayudo, el a pasa door di diferente psicologo, te cu el a haya e guia correcto den Mily Lacle. “Cune, mi a haya comprension. El a yudami sali di e buraco,” e ta bisa cu gratitud. E caminda ey tabata yena di lucha interno, fe, y determinacion, pero tambe di honestidad: “Tin fecha cu ainda ta hopi dificil… december, su cumpleaño… tin dia cu mi no por traha ni papia.” Ainda asina, paso pa paso, Angie a sigui, sin pretension di “supera”, pero cu e compromiso pa no keda tras.
Den medio di e proceso di sanacion, Angie a haya un manera di reconecta cu su mes. “Mi a siña pa pensa un tiki mas den mi mes,” e ta bisa, reconociendo cu su bienestar personal tabata esencial pa su recuperacion. Asina, ehercicio a bira un parti fundamental di su bida. “E ta mi terapia… mi no por falta, mi curpa mes ta pidi esaki,” e ta expresa, describiendo con e movimento fisico a yud’e libera e carga emocional y haya un energia nobo. Pa Angie, gym no ta solamente un lugar pa entrena, e ta un espacio unda e por hala rosea, libera, y sali “hopi cansa pero hopi alegre,” un señal cu e ta recuperando su balance.
Banda di su rol como mama, Angie no a laga su pasion profesional. Desde 2014, el a sigui construi su negoshi, Lotus, cual el a cuminsa na Colombia caba y cu a crece na Aruba, pasando di un espacio chikito na cas di su mama, pa awor, un local propio. “Esaki ta algo semper den mi bida… e mundo di beyesa,” e ta bisa, resaltando su mision pa yuda otro muhernan sinti nan mes bon y subi nan autoestima. Cu mas di 18 aña di experiencia den estetica, e ta combina su storia personal cu su trabou, creando un espacio di cuidado y empoderamiento pa otro hende. Awe, como mama di Alexia, Julian, Jake y James, e ta sigui camina cu determinacion y amor.
Sofia Galvez, su yiu chikito cu apenas tabatin tres aña ora el a fayece, lo keda semper parti di Angie, di su storia di bida y di su curason. Awe, Angie ta mama di Alexia Cruz (19), Julian Cruz (10), Jake Cruz (7) y James Cruz (4), y aunke un espacio den su bida nunca lo wordo yena completamente, el a siña con pa sigui cana cu e amor ey den dje. “No ta algo cu bo ta lubida,” Angie ta bisa, “ pero si bo ta siña con pa biba cune.” E ta un dolor cu ta cambia forma cu tempo, pero cu nunca ta desaparece.
Mensahe final pa otro mama cu ta pasando pa un dolor similar: “Refugia den Dios, sin importa religion. E comunicacion directo cu Papa Dios ta hopi importante.” P’e, fe a bira un sosten den e momentonan mas scur di su bida. Pero banda di esey, e kier recorda mamanan cu nan no mester lubida nan mes. “Nos ta mama, pero tambe cu M di Muher,” e ta bisa. “No lubida di duna bo mes cariño y cuido propio… mama feliz, yiunan feliz.” Y talvez den e palabra simpel ey ta e esencia di tur su storia: un muher cu a conoce e dolor mas profundo, pero cu ainda ta scogiendo amor, bida y forsa tur dia.
Built with Shorthand