Flor semper a hunga un rol special den bida di hende. Sea ta un ramo na un boda, un rosa na un aniversario, un bouquet den un momento di disculpa, celebracion of simplemente “mi ta pensa riba bo.”
BAHAR Y VICTORIA
BAHAR Y VICTORIA
Pero tur hende sa e berdad: beyesa di flor ta temporal. Despues di un par dia, e ta marchita y no t’ey mas. Dos dama, Bahar di Turkia y Victoria di Merca a haya nan hogar na Aruba y a haci nan mes e pregunta: que hubo si un flor por dura mes tanto cu e sentimento cu e ta representa? Asina Arosa a nace.
Bahar y Victoria no a bin Aruba pa cuminsa un negoshi. Nan a sigui amor. Nan a casa, nan a adapta, nan a siña construi un bida for di cero riba un isla cu no tabata nan lugar di origen. Den e proceso di crea un hogar nobo, nan amistad a crece. Y for di e conexion ey, un oportunidad a presenta pa tuma un negoshi over cual nan a logra dune nan estilo. Aruba ta un isla di celebracion, hotelnan, boda, proposal, turista cu kier hiba algo special nan cas. Pero flor tradicional ta limita.
E nomber Arosa mes tin un storia cu ta refleha su esencia. E ta un combinacion di “Rosa,” palabra na papiamento pa rose, cu “Aruba,” isla cu a bira nan cas. Pues un marca cu ta conecta amor, cultura y elegancia den un solo nomber. Cu Arosa, e producto ta simpel, e concepto di Eternity Florals: rosa y otro flor real, preserva, cu por dura un aña of mas sin awa. Nan no ta di plastic, nan no ta artificial. Nan ta naturalesa conserva cu tecnologia.
Arosa no ta opera manera un floresteria tradicional. Nan ta traha via e-commerce y pop-ups exclusivo, creando areglonan personalisa cu un tok’e moderno y di luho. Cada diseño ta combina naturalesa cu innovacion, creando un regalo cu no ta muri despues di un siman.
VICTORIA
VICTORIA
Un detaye interesante? Turistanan por hiba nan areglo for di aeropuerto sin problema, pasobra e flor no ta planta bibo. E ta preserva.
BAHAR
BAHAR
Nan a cuminsa principalmente cu rosa, pero marca ta expande su oferta, manera gardenia y ta prepara mas producto nobo pa 2026.
Cuminsa un marca nobo den un mercado chikito no ta facil. Pero Bahar y Victoria no tabata busca algo comun. Nan kier crea algo cu ta elegante, sostenibel y diferente.
Bahar y Victoria ta lidera direccion creativo, diseño floral, identidad di marca y operacion diario. Nan ta pensa riba cada detaye, di packaging te experiencia di cliente. Tras di vision strategico tin nan casanan Michael-Anthony Fowler y Samil Susebeek, cu ta guia crecemento, partnership cu hotelnan y wedding planners, y expansion di marca. Pero esencia di Arosa ta e dos muhernan cu a haya nan voz creativo den un isla cu a bira nan cas.
Arosa no ta djis bende flor, nan ta crea simbolonan cu ta keda.
Built with Shorthand